މެންޗެސްޓާ (އޭޕްރީލް 23) - ގަބްރިއެލް ޖީސޫސްގެ ހަތަރު ގޯލާ އެކު 5-1 އިން ވަޓްފޯޑް ބަލިކޮށް މެންޗެންސްޓާ ސިޓީން އިނގިރޭސި ޕްރިމިއާ ލީގުގެ އެއް ވަނައިގައި ހަތަރު ޕޮއިންޓުގެ ލީޑެއް ނަގައިފި އެވެ.
ޓޮޓެންހަމް ހޮޓްސްޕާސް ކުޅުނު މެޗުން ރަށުންބޭރުގައި ބްރެންޓްފޯޑާ 0-0 އިން އެއްވަރުވެ، ގަދަ ހަތަރަކަށް އަރަން ލިބުނު ފުރުސަތުގެ ބޭނުން ޓޮޓެންހަމަަށް ނުހިފުނެވެ.
ލީގުގެ އެއް ވަަނައިގައި ސިޓީ އޮތީ 33 މެޗުން 80 ޕޮއިންޓާ އެކު އެވެ. ދެ ވަނައިގައި ލިވަޕޫލް އޮތީ 32 މެޗުން 76 ޕޮއިންޓް ހޯދައިގެންނެވެ. ލިވަޕޫލުން މާދަމާރޭ އަމިއްލަ ދަނޑުގައި އެވަޓަން ބަލިކޮށްގެން ސިޓީއާ ޕޮއިންޓަކަށް ކައިރިއަށް ޖެހިލެވޭނެ އެވެ. ތިން ވަނައިގައި އޮތީ 31 މެޗުން 62 ޕޮއިންޓް ލިބިފައިވާ ޗެލްސީ އެވެ. ހަތަރެއްގައި އޮތީ މިރޭ މެންޗެސްޓާ ޔުނައިޓެޑް ބަލިކުރި އާސެނަލް އެވެ، އާސެނަލަށް ވަނީ 33 މެޗުން 60 ޕޮއިންޓް ލިބިފަ އެވެ. ފަސް ވަނައިގައި އޮތް ޓޮޓެންހަމަށް ވަނީ 33 މެޗުން 58 ޕޮއިންޓް ލިބިފަ އެެވެ. ހަ ވަނައިގައި ޔުނައިޓެޑް އޮތީ 34 މެޗުން 54 ޕޮއިންޓް ހޯދައިގެންނެވެ.
އިއްތިހާދު ސްޓޭޑިއަމްގައި މިރޭ ސިޓީން ކުޅުނު މެޗުގައި ލީޑުނެގީ ހަތަރު ވަނަ މިނިޓްގައި ޖީސޫސް ޖެހި ގޯލުންނެވެ. މެޗުގެ 23 ވަނަ މިނިޓްގައި ޖީސޫސް ސިޓީގެ ލީޑުފުޅާކޮށްދިން ނަމަވެސް އޭގެ ފަސް މިނިޓް ފަހުން މެޗުގެ 28 ވަނަ މިނިޓްގައި ވަޓްފޯޑްގެ ހަސާނޭ ކަމާރާ ވަނީ ގޯލެއް ޖަހައިފަ އެވެ. އެކަމަކު، މެޗުގެ 34 ވަނަ މިނިޓްގައި ސިޓީގެ ރޮޑްރީ އޭރިއާބޭރުން ޖެހި މޮޅު ގޯލުން އަނެއްކާ ވެސް އެ ޓީމުން ލީޑުފުޅާކުރި އެވެ.
ދެ ވަނަ ހާފްގެ ކުޅުން ފަށައިގެން ހަތަރު ވަނަ މިނިޓްގައި ޖީސޫސް ވަނީ ޕެނަލްޓީ އަކުން އޭނާގެ ހެޓްރިކް ފުރިހަމަކޮށްފަ އެވެ. މިއީ 2016 ވަނަ އަހަރު ސިޓީއާ ގުޅުނު ޖީސޫސް ޕްރިމިއާ ލީގުގައި ހެދި ފުރަތަމަ ހެޓްރިކް އެވެ. ޖީސޫސް ވަނީ މެޗުގެ 53 ވަނަ މިނިޓްގައި ކެވިން ޑިބްރޭނާ ދިން ބޯޅައަކުން ސިޓީގެ ފަަސް ވަނަ ގޯލު ޖަހައިފަ އެވެ.
މިރޭ ބްރެންޓްފޯޑް ދަނޑުގައި އެ ޓީމުން ވަނީ ޓޮޓެންހަމް ހިފެހެއްޓުމުގައި މޮޅު ކުޅުމެއް ދައްކައިފަ އެވެ. ޓޮޓެންހަމްގެ ހެރީ ކޭން އާއި ސޮން ހެއުން މިން އާއި ޑޭޖާން ކުލުސެވްސްކީ ފޮނުވާލި ބޯޅަތައް ގޯލަކަށް ހަދައިނުލެވުނެވެ. މެޗުގެެ ފަހު ކޮޅު ބްރެންޓްފޯޑްގެ އިވާން ޓޯނޭ ބޮލުން ޖެހި ބޯޅައެއް ވަނީ ގޯލުގެ ދަނޑިއަށް އަމާޒުވެފަ އެވެ.
ލީގުގައި މިރޭ ކުޅުނު އެހެން މެޗުތަކަށް ބަލާއިރު، ލެސްޓާ ސިޓީ ދަނޑުގައި ވަނީ އެސްޓަން ވިލާއާ 0-0 އިން އެއްވަރުވެފަ އެވެ. އަދި ނިއުކާސަލް ޔުނައިޓެޑުން ވަނީ ރަށުންބޭރުގައި 3-0 އިން ނޮރިޗް ސިޓީ ބަލިކޮށް ލީގުގެ ނުވަ ވަނަ އަށް ޖެހިލައިފަ އެވެ. ނިއުކާސަލްގެ ތިން ގޯލުގެ ތެރެއިން ފުރަތަމަ ދެ ގޯލު ޖެހީ ބްރެޒިލްގެ ފޯވާޑް ޖޮއެލިންޓަން އެވެ. މިއީ ޕްރިމިއާ ލީގުގައި ޖޮއެލިންޓަންގެ 100 ވަނަ މެޗެވެ. އަނެއް ގޯލު ޖެހީ ފަހަކަށް އައިސް ރަނގަޅު ފޯމެއްގައި ކުޅެމުން އަންނަ ބްރެޒިލްގެ މިޑްފީލްޑަރު ބްރޫނޯ ގިމާރޭސް އެވެ.
