މޫސުމީ ބަދަލަކީ ހަގީގަތެއް ނޫން ކަމަށް ބުނާ އިޝްތިހާރުތައް ޓްވިޓާއިން މަނާކޮށްފި އެވެ.
ޓްވިޓާއިން އެގޮތަށް ނިންމީ ބައިނަލްއަގްވާމީ ދުނިޔޭގެ ދުވަހާ ދިމާކޮށެވެ. ބިލިއަނަރު އެލޮން މަސްކް ޓްވިޓާ ގަންނަން މަސައްކަތް ކުރަމުންދާ އިރު، އޭނާ ދެކޭ ގޮތުގައި ޓްވިޓާ ވާން ޖެހޭނީ ބޭނުން ހިޔާލެއް ފާޅު ކުރެވޭ ޕްލެޓްފޯމަކަށެވެ.
"މޫސުމީ ބަދަލާ ގުޅޭ ގޮތުން މެޖޯރިޓީ ސައިންސްވެރިން ދެކޭ ގޮތާ ހިލާފަށް، އޮޅުން އަރާ ފަދަ އިޝްތިހާރުތައް ޓްވިޓާގައި މަނާ ވާނެ،" ޓްވިޓާގެ ގްލޯބަލް ސަސްޓެއިނަބިލިޓީ މެނޭޖަރު ކޭސީ ޖުނޯދް ވިދާޅުވި އެވެ.
"މޫސުމީ ބަދަލާ ގުޅޭ ގޮތުން ނުރަނގަޅު މައުލޫމާތު ފެތުރުމަކީ ދުނިޔެ ރައްކާތެރި ކުރުމަށް ކުރާ މަސައްކަތަށް އެޅޭނެ ހުރަހެއް ކަމުގައި އަޅުގަނޑުމެން ދެކެން."
ޓްވިޓާގެ ވިސްނުމާ ހިލާފަށް، ކޮންމެ މީހަކަށް ވެސް ބޭނުން ހިޔާލެއް އެ ޕްލެޓްފޯމުގައި ފާޅު ކުރެވެން ޖެހޭނެ ކަމަށް ދެކޭ މަސްކް، ކުންފުނި ގަންނަން ކުރާ މަސައްކަތް ހުއްޓުވަން ޓްވިޓާއިން ބޭނުންވެ އެވެ.
މިހާރު ވެސް ކުންފުނީގެ މެޖޯރިޓީ ޝެއާހޯލްޑަރަކީ މަސްކް އެވެ. ކުންފުނީގެ ބޯޑު މެމްބަރުކަން ހުށަހެޅުމުން އެކަން ބޭނުން ނުވާ ކަމަށް ބުނެ، މަސްކް ހުށަހެޅީ 43 ބިލިއަން ޑޮލަރަށް ކުންފުނި ގަތުމަށެވެ.
