އިނގިރޭސި ބޮޑު ވަޒީރު ބޮރިސް ޖޯންސަންގެ ދަތުރުގައި އިންޑިއާ އާއި އިނގިރޭސިވިލާތާ ދެމެދު ވިޔަފާރީގެ ގުޅުން ވަރުގަދަ ކުރަން އެއްބަސްވެއްޖެ އެވެ.
ޖޯންސަން ވަނީ ނިއު ދިއްލީގައި އިންޑިއާގެ ބޮޑު ވަޒީރު ނަރެންދްރަ މޯދީއާ ބައްދަލުކުރައްވާފަ އެވެ. ދެ ބޭފުޅުން ނިންމެވީ އޮކްޓޯބަރު މަސް ނިމުމުގެ ކުރިން އެއްބަސްވުމުގައި ސޮއިކުރުމަށެވެ.
ވިޔަފާރި ގުޅުން ވަރުގަދަ ކުރުމާ ބެހޭ މަޝްވަރާތަކުގެ އާ ބުރެއް އަންނަ ހަފްތާގައި އޮންނަ އިރު، ޖޯންސަން ވިދާޅުވީ އެފަދަ އެއްބަސްވުމަކުން ދެ ގައުމުގެ ވިޔަފާރި އާ ހަރުފަތަކަށް ގެންދެވޭނެ ކަމަށެވެ.
މޯދީއާ ބައްދަލުކުރެއްވުމަށް ފަހު ޖޯންސަން ވިދާޅުވީ އިންޑިއާއަކީ "އޭޝިއާގައި ކުރިއަރަމުން އަންނަ އާދަޔާ ހިލާފު ބާރެއް" ކަމަށާއި ވިޔަފާރީގެ ގުޅުން ވަރުގަދަ ކުރުން މުހިއްމު ކަމަށެވެ.
އެއްބަސްވުމުގައި ހިމެނުމަށް އިންޑިއާއިން އެންމެ ބޮޑަށް ބޭނުންވާ އެއް ކަމަކީ އިންޑިއާ ރައްޔިތުންނަށް އިނގިރޭސިވިލާތުން ވަޒީފާ ހޯދަން ފަސޭހަ ގޮތްތަކެއް ހަމަޖެއްސުމެވެ.
އެކަމާ ގުޅިގެން ޖޯންސަން ވިދާޅުވީ އިންޑިއާ ރައްޔިތުންގެ ހުނަރުން އިނގިރޭސިވިލާތުގެ އައިޓީ ދާއިރާއަށް ފައިދާތަކެއް ހޯދޭނެ ކަމަށެވެ.
"ހުނަރާއި މަސައްކަތުގެ އަހުލާގު ހުރި މީހުން އިނގިރޭސިވިލާތަށް އައުން އަޅުގަނޑު މަނައެއް ނުކުރާނަން. އެކަމަކު ހުއްދަ ދެވޭނީ ކޮންޓްރޯލް ކޮށްގެން،" ޖޯންސަން ވިދާޅުވި އެވެ.
އިނގިރޭސިވިލާތުން ބުނީ އެ ގައުމުގައި އުފައްދާ އަސްކަރީ ސާމާނު އިންޑިއާއަށް އެކްސްޕޯޓް ކުރުމުގައި ހުރި ދަތިތައް އުވާލަން މަސައްކަތް ކުރާނެ ކަމަށެވެ.
އޭގެ އިތުރުން ހަނގުރާމަ މަތީ ޖެޓުތައް އިންޑިއާގައި އުފެއްދުމަށް އިނގިރޭސިވިލާތުން އެއްބާރުލުން ދޭނެ ކަމަށާއި ބޭނުމަކީ އިންޑިއާއަށް ހަތިޔާރު ހޯދުމަށް ރަޝިއާއަށް ބަރޯސާވުން ކުޑަ ކުރުން ކަމަށް އިނގިރޭސިވިލާތުން ބުންޏެވެ.
މޯދީ އާއި ޖޯންސަންގެ ބައްދަލުވުމުގައި ވާހަކަ ދެއްކެވި ކަންކަމުގެ ތެރޭގައި އިންޑިއާ އާއި ރަޝިއާގެ ގުޅުން ހިމެނެ އެވެ.
ރަޝިއާ ސިފައިން ޔޫކްރެއިނަށް އަރައި ކުރަމުންދާ ހަނގުރާމައާ ގުޅިގެން އިންޑިއާއިން މިހާތަނަށް ރަޝިއާ ކުށްވެރިކޮށްފައެއް ނުވެ އެވެ.
ހުޅަނގުގެ ގައުމުތަކުން ބޭނުން ވަނީ އިންޑިއާއިން ރަޝިއާއަށް ތާއީދު ކުރުން ހުއްޓާލައި، ދަތި ކުރުމުގެ ފިޔަވަޅުތައް ތަންފީޒު ކުރުމުގައި ބައިވެރިވުމަށެވެ.
ނަމަވެސް އިންޑިއާއަށް އެންމެ ގިނައިން ހަތިޔާރު ފޯރުކޮށްދޭ ގައުމަކީ ރަޝިއާ އެވެ. އަދި ރަޝިއާއިން ވަނީ އެ ގައުމުގެ ތެލުން ހާއްސަ ޑިސްކައުންޓެއް އިންޑިއާއަށް ދީފަ އެވެ.
