ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ބުރާސްފަތި ދުވަހު ނެރުއްވި ގަރާރަކުން އިދިކޮޅުން ކުރިއަށްގެންދާ އިންޑިއާ އައުޓް ރަސްމީކޮށް މަނާކުރި ފަހުން، އެ ކެމްޕެއިނަށް ހިތްވަރުދިން ކަމަށް ތުހުމަތު ކުރެވޭ މައްސަލައެއްގައި ޓީޗަރަކު ވަޒީފާއަށް ނިކުތުން މަނާކޮށްފި އެވެ.
އަރަބިއްޔާ ސްކޫލްގެ ހަދީސް ޓީޗަރު އަދި ސޯޝަލް މީޑިއާ ޝަހްސިއްޔަތު ޒަމްޒަމް ފާރިޝް އޮފީހަށް ނުކުތުން މަނާ ކުރީ ޓީޗަރުންގެ އަހުލާގީ މިންގަނޑާ ހިލާފުވެ، އިންޑިއާ އައުޓް ކެމްޕެއިނަށް ހިތްވަރުލިބޭ ގޮތަށް ޓުވިޓާގައި ލިޔެފައިވާތީ ކަމަށް ސިވިލް ސާވިސް ކޮމިޝަނުން އޭނާއަށް ފޮނުވި ލިޔުމެއްގައި ބުނެފައިވެ އެވެ.
ސިވިލް ސާވިސް ކޮމިޝަނުން ފާހަގަކޮށްފައިވާ ޓުވީޓުގައި ބުނެފައި އޮތީ، "އިސްލާމް ދީނާ ދެކޮޅަށް ރިޕޯޓު ނެރެ، މުޅި ދުނިޔޭގައި އެ ދަމަމުން ދުވުމުން ވެސް ރާއްޖޭގެ ގައުމީ ސަލާމަތަށް ކުރިމަތި ނުވި ނުރައްކަލެއް، ގާނޫނާ ހިލާފަށް މިގައުމަށް އަރައިތިބި އިންޑިއާ ސިފައިން މިގައުމުން ބާލަން ދަމާލި ފޮތިކޮޅަކާ ހެދި ރާއްޖޭގެ ގައުމީ ސަލާމަތަށް ނުރައްކާވާނެ އެއްވެސް ގޮތެއް ނުވިސްނިގެން މިއުޅެނީ" މިހެނެވެ.
ރައީސް ސޯލިހު އިއްޔެ ނެރުއްވި ގަރާރުގައި ވިދާޅުވެފައި އޮތީ އިންޑިއާ އައުޓް ކެމްޕެއިނަކީ ދިވެހިރާއްޖޭގެ "ސުލުހަ މަސްލަސްކަން ނަގައިލުމުގެ ނިޔަތުގައި" ހިންގާ ކެމްޕެއިނެއް ކަމަށެވެ. އަދި އެއީ ރާއްޖޭގެ ތަރައްގީ އާއި މި ސަރަހައްދުގެ ހަމަޖެހުމަށް ހުރަސް އެޅުމަށް ކުރާ ކެމްޕެއިނެއް ކަމަށް ވެސް ރައީސް ވިދާޅުވި އެވެ.
ރައީސްގެ ގަރާރަށްފަހު އެމަނިކުފާނުގެ އޮފީހުގެ ޗީފް އޮފް ސްޓާފް އަލީ ޒާހިރު މި ނޫހާ ވާހަކަ ދައްކަވަމުން ވިދާޅުވީ، ރައީސުލްޖުމްހޫރިއްޔާގެ ރިޔާސީ ގަރާރަށް ފަހު "އިންޑިއާ އައުޓް" ކެމްޕެއިން ގާނޫނީ ގޮތުން މަނާވެފައިވާ ކަމަށެވެ. އަދި އެ އިންޑިއާ އައުޓް ކެމްޕެއިން "މޫވްމަންޓެއްގެ ގޮތުގައި ހިންގާ ނަމަ ކަމާ ބެހޭ ފަރާތްތަކުން އެކަން ހުއްޓުވާނެ" ކަމަށް ވެސް އޭނާ ވިދާޅުވި އެވެ.
[މީހުން ހައްޔަރުކޮށް، ދައުވާ ކުރާ] އެ ހިސާބަށް ވެސް ދާންޖެހުނީމަ ދާނެ އިނގޭތޯ. މިސާލަކަށް މިއަދު އެ ނެގުނު ތަކެއްޗަކީ ވެސް ހެކީގެ ގޮތުގައި ވެސް ބޭނުން ކުރެވޭނެ އެއްޗެހީގެ ގޮތުގައި އެ ހުރީ،" ރައީސް ޔާމީންގެ ގެކޮޅުން ފުލުހުން އިއްޔެ ނެގި ބޮޑު ބެނާއަށް އިޝާރާތް ކުރައްވާ އަލީ ޒާހިރު ވިދާޅުވި އެވެ.
