މާލޭގެ އެކި އިމާރާތްތަކުގައި ދަމާފައި ހުރި "އިންޑިއާ އައުޓް" ބެނާތައް ނެގުމަށް ކޯޓު އަމުރު ދެއްވި ކްރިމިނަލް ކޯޓުގެ ފަނޑިޔާރު މުހައްމަދު މިސްބާހަށް، ކުރީގެ ކޮމިޝަނަރު އޮފް ކަސްޓަމްސް އައްބާސް އާދިލް ރިޒާގެ ނަމުގައި ހިންގާ ޓްވިޓާ އެކައުންޓަކުން އިންޒާރު ދީފި އެވެ.
ކުރީގެ ރައީސް ޔާމީންގެ ސަރުކާރުގައި ކަސްޓަމްސްގެ ކޮމިޝަނަރުގެ މަގާމުގައި ވެސް ހުންނެވި އައްބާސްގެ ނަމުގައި ހިންގާ އެ އެކައުންޓުން އިންޒާރުދިނީ ޓްވިޓާ މެދުވެރިކޮށް ފަނޑިޔާރަށް ގަންހިންގުވަން ވަނީ ގޮވާލައިފަ އެވެ.
މެލޭޝިއާގައި ހުންނަ ރާއްޖޭގެ އެމްބަސީގެ ސަރުކާރުގެ ޓްރޭޑް ރިޕްރެޒެންޓޭޓިވްއެއްގެ ގޮތުގައި ވެސް ޔާމީންގެ ސަރުކާރުގައި މަސައްކަތްކުރެއްވި އައްބާސް އެހެން ޓްވީޓް ކުރެއްވީ "އިންޑިއާ އައުޓް" ބެނާތައް ނެގުމަށް ފުލުހުން ބޭނުންކުރި ކޯޓު އަމުރުގައި ގާޒީ ސޮއިކުރައްވާފައިވާ ދިމާލުގެ ފޮޓޮއަކާއެކުގަ އެވެ.
އައްބާސް އާދިލް ރިޒާއަކީ ކުރީގެ ރައީސް އަދި މިހާރު އިދިކޮޅު ކޯލިޝަނުގެ އެޑްވައިޒަރު ޑރ. މުހައްމަދު ވަހީދު ހަސަން މަނިކުގެ ސަރުކާރުގައި ވެސް އިސް މަގާމުތަކެއް އަދާކުރެއްވި ބޭފުޅެކެވެ. އެގޮތުން އޭނާ ވަނީ އެ ސަރުކާރުގެ ތަރުޖަމާނުކަން ވެސް ކުރައްވައިފަ އެވެ.
އޭނާ ފިނޭންސް މިނިސްޓްރީގެ ސްޓޭޓް މިނިސްޓަރަކަށް ބަދަލުކުރީ ޖީއެމްއާރުގެ މައްސަލައިގައި އޭރު ރާއްޖޭގައި ހުންނެވި އިންޑިއާ ސަފީރަށް އަމާޒުކޮށް ކުރެއްވި ތުހުމަތުތަކަކަށް ފަހު އެވެ.
އޭނާ ވަނީ 2020 ވަނަ އަހަރު ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ހަށިކޮޅުގައި އަލިފާން ޖެހުމަށް ވެސް ލައިވް ޓީވީ ޕްރޮގްރާމެއްގައި ގޮވާލާފަ އެވެ. އެ މައްސަލަ ފުލުހުން ވަނީ ބަލައިފަ އެވެ.
