އިދިކޮޅު ޕްރޮގްރެސިވް ކޯލިޝަނުން ރާއްޖޭގައި އިންޑިއާ ސިފައިން ތިބޭ ތިބުމާ ދެކޮޅަށް ހިންގާ "އިންޑިއާ" އައުޓް" ހަރަކާތް ހުއްޓުވަން ކަމާބެހޭ ފަރާތްތަކަށް އަންގައި އެކަން ތަންފީޒުކުރަން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ގަރާރެއް ނެރުއްވައިފި އެވެ.
ރައީސް ނެރުއްވި އެ ގަރާރުގައި ވަނީ "އިންޑިއާ އައުޓް" އެ ހަރަކާތަކީ އެއްވެސް ޖާއިޒު މަގުސަދެއް ނެތި ސިޔާސީ ބޭނުމެއްގައި ވަކި ގައުމަކާ ދެކޮޅަށް ރޭވިގެން ހިންގާ ކެމްޕޭނެއްގެ ގޮތުގައި ސިފަކޮށްފަ އެވެ.
އަދި އެއީ ގައުމީ ސަލަމަތާ ގުޅުންހުރި ނުރައްކާތެރި ކަމެއް ކަމަށާއި ވަކި ގައުމަކާ ދެކޮޅަށް ހިންގޭ އެފަދަ ނަފުރަތު އުފެއްދުމުގެ ހަރަކާތްތައް ކަމާބެހޭ އިދާރާތަކުން ހުއްޓުވަން ޖެހޭނެ ކަމަށް ގައުމީ ސަލާމަތާބެހޭ މަޖިލީހުން ނިންމާފައިވާ ކަމަށް އެ ގަރާރުގައި ފާހަގަކުރެ އެވެ.
"އިންޑިއާ އައުޓް" އެ ހަރަކާތަކީ ރާއްޖޭގެ ގާނޫނުލްްއުގޫބާތުން ޖިނާއީ ކުށެއްގެ ގޮތުގައި ކަނޑައަޅައި މަނާކޮށްފައިވާ އަމަލުތަކުގެ ތެރެއިން ވަކި ނަސްލަކަށް ނުވަތަ ނަސަބަކަށް ވީތީ ދަތިކޮށް ފުރައްސާރަކޮށް ތަފާތުކުރުންފަދަ އަމަލެއް ކަމުގައި އެ ގަރާރުގައި ފުރަތަމަ ވެސް ފާހަގަކުރެ އެވެ.
އަދި ނަސްލީ ތަފާތުކުރުންތައް ހުއްޓުވަން އެކި އެކި މުއާހަދާތަކާއި އދ. ގެ އެކި އެކި ގަރާރުތަކުގައި އެފަދަ އަމަލުތައް މަނާކުރާ ކަމެއްކަމުގައި އެ ގަރާރުގައި ބުނެފައިވެ އެވެ.
އެ ގަރާރުގައި އިތުރަށް ބުނީ ދިވެހި ދައުލަތަށް ފުދުންތެރިކަމާއި ފާގަތިކަމުން ކުރާ ކޮންމެ ނޭދެވޭ އަސަރަކީ ރައްޔިތުންނަށް ލިބޭ އަނިޔާއެއް ކަމަށެވެ. އަދި ގައުމީ ސަލާމަތަށް ނުރައްކާވާ ކޮންމެ ހަރަކާތަކީ ސަރުކާރުން އެކަމެއް ހުއްޓުވަން ޖެހޭ ކަމެއް ކަމުގައި ވެސް އެ ގަރާރުގައި ބުންޏެވެ.
ހަމައެއާއެކު އެގަރާރުގައި ވަނީ "އިންޑިއާ އައުޓް" ހަރަކާތުން ދިވެހިންނަށާއި ދިވެހި ދައުލަތަށާއި ބިދޭސީންނަށް ފޯރުކޮށްދޭންޖެހޭ ރައްކާތެރިކަން ފޯރުކޮށްދިނުމަށް ދަތިވާނެކަމަށް ގަބޫލުކުރެވޭކަމަށް ބުނެފަ އެވެ. އަދި ރާއްޖެ މިނިވަން ދައުލަތެއްގެ ގޮތުގައި ދަމަހައްޓައި ބޭރު ގައުމުތަކުގައި ދިރިއުޅޭ ދިވެހިންނާއި ބޭރު ގައުމުތަކަށް ޒިޔާރަތްކުރާ ދިވެހިންނަށް ރައްކާތެރިކަން ކަށަވަރުކޮށްދިނުމަށް ވެސް ދަތިވާކަމަށް ގަބޫލުކުރެވޭ ކަމަށެވެ.
"އިންޑިއާ އައުޓް" ހަރަކާތުން ކުރިމަތިވާ ނުރައްކާތަކުން ރާއްޖެ ސަލާމަތް ނުކުރެވިއްޖެނަމަ އެކި ގޮތްގޮތުން ދިވެހިން ތަހައްމަލުކުރަންޖެހޭ ބުރަ މިން ނުކުރެވޭނެ ކަމަށް އެ ގަރާރުގައި ރައީސް ފާހަގަކުރައްވަ އެވެ.
އެ ގަރާރުގައި ދެން ފާހަގަކުރީ އެފަދަ ހަރަކާތްތަކުން ބައިނަލްއަގްވާމީ މައުދާނުގައި ރާއްޖެ އެކަހެރިވެ، އިތުބާރު ގެއްލި، ޒަމާނުއްސުރެ ދައުލަތުން ގެންގުޅެމުން އަންނަ ހާރިޖީ ސިޔާސަތު ރޫޅި ރާއްޖޭގެ މިނިވަންކަމާއި ސިޔާދަތާއި އިސްތިގުލާލަށް ނުރައްކާ ކުރިމަތިވެދާނެ ކަމަށެވެ.
އަދި ހަމަ އެއާއެކު ރާއްޖޭގެ އިގްތިސާދީ ރައްކާތެރިކަމާއި އިޖުތިމާއީ ނިޒާމު އަދި ސަރަހައްދީ ސަލާމަތާއި ރައްކާތެރިކަމަށް ވެސް އެފަދަ ހަރަކާތްތަކުން އަސަރުކުރުވާނޭ ކަމަށް އެ ގަރާރުގައި ފާހަގަކުރެ އެވެ.
އިންޑިއާ އާމެދު ނަފުރަތު އުފެއްދުމަށް ހިންގާ ހަރަކާތްތަކަކީ ގައުމީ ސަލާމަތަށް ނުރައްކާވާ ހިސާބަށް ގޮސްފައިވާ ހަރަކާތެއް ކަމުގައި އެ ގަރާރުގައި ސިފަކުރާއިރު، އޭގެ ސަބަބުން ރާއްޖޭގެ އެކި ސަރަހައްދުތަކުގައި އޮތް އަމަންއަމާންކަމާއި ސުލްހަ ގެއްލުވާލައި، ދާހިލީ ހަމަނުޖެހުން އުފެއްދުމަށް ވެސް މަގުފަހިކޮށްދޭ ކަމަށް އެ ގަރާރުގައި ބުނެ އެވެ.
އެ ގަރާރުގައި ވަނީ "އިންޑިއާ އައުޓް" ގާނޫނުއަސާސީން ލިބިދީފައިވާ ހިޔާލުފާޅުކުރުމުގެ މިނިވަންކަމާއި އެއްވެ އުޅުމުގެ މިނިވަންކަމުގެ ނާޖާއިޒު ފައިދާ ނަގައިގެން ކުރިޔަށް ގެންދާ ހަރަކާތެއް ކަމުގައި ވެސް ފާހަގަކުރެ އެވެ. އަދި އެއީ ސަރަހައްދީ އަމަންއަމާންކަމާއި ބައިނަލްއަގްވާމީ ފެންވަރުގައި ކުރާ މުހިންމު މަސައްކަތްތަކަށް ވެސް ހުރަސްއަޅަން ކުރިޔަށްގެންދާ ހަރަކާތެއްކަމުގައި ވެސް ވަނީ ސިފަކޮށްފަ އެވެ.
އިންޑިއާއާ މެދު ނަފުރަތު އުފައްދަން ހިންގާ ހަރަކާތްތަކަކީ ގައުމީ ސަލާމަތަށް ހުރި ނުރައްކަލެއް ކަމުގައި ގައުމީ ސަލާމަތާ ބެހޭ މަޖިލީހުން ކަނޑައަޅާފައިވާ ހިނދު އެފަދަ ހަރަކާތްތައް ހުއްޓުވަން ކަމާބެހޭ ފަރާތްތަކަށް އަންގައި އެކަން ތަންފީޒު ކުރަން ރައީސް ވަނީ އެގަރާރުގައި އަންގަވައިފަ އެވެ.
