ކުޅުންތެރިންނަށް މުސާރަ ނުދޭ މައްސަލައިގައި ސަސްޕެންޑްކޮށްފައި އޮތް، ރާއްޖޭގެ އެންމެ ބޮޑު އެއް ކްލަބް، ނިއު ރޭޑިއަންޓުން އެ ކްލަބުގެ ކުރީގެ ކޯޗު ޕޯޗުގަލްގެ ބެނާޑޯ ޓަވަރޭޒް ދޭން ޖެހޭ ފައިސާ ދައްކަން ފީފާ އިން އަނެއްކާ ވެސް އިތުރު މުހުލަތެއް ދީފި އެވެ.
ނިއު އަށް 2017 ވަނަ އަހަރު ކޯޗުކޮށްދިން ޓަވަރޭޒް، މަގާމުން ވަކިކުރީ އުސޫލާ ހިލާފަށް ކަމަށް ބުނެ، އޭނާ ފީފާ އަށް މައްސަލަ ގެންދިޔައީ އެވެ. ފީފާ އިން އެ މައްސަލައިގައި އެންމެ ފުރަތަމަ 2017 ވަނަ އަހަރު، ސެޕްޓެމްބަރު ހަތަރެއްގައި ނިއު އަށް އެންގީ 30 ދުވަހުގެ ތެރޭގައި ޓަވަރޭޒަށް ދޭން ޖެހޭ ފައިސާ ދިނުމަށެވެ.
އެ މުއްދަތުގެ ތެރޭގައި ވެސް އެކަން ކޮށްފައިނުވާއިރު، ފީފާ އިން އިއްޔެ ނިއު އާއި އެފްއޭއެމަށް ފޮނުވި ސިޓީއެއްގައި ބުނެފައިވަނީ ކުރިއަށް އޮތް ހަ ދުވަހުގެ ތެރޭގައި ޓަވަރޭޒަށް ދޭން ޖެހޭ ފައިސާ އަދާކުރުމަށެވެ. އެ ގޮތަށް އެކަން ނުކޮށްފިނަމަ ނިއުއާ މެދު އިތުރު ފިޔަވަޅު އަޅާނެ ކަމަށް ވެސް ސިޓީގައިވެ އެވެ. ކުރިން ދީފައިވާ މުހުލަތުގައި ނިއު އިން ޓަވަރޭޒްގެ މުސާރަ ނުދީ އޮތުމުން ފީފާ އިން ވަނީ ނިއު އަށް އާ ކުޅުންތެރިން ރަޖިސްޓްރީ ނުކުރެވޭ ގޮތަށް އަދަބުދީފަ އެވެ.
މި ފަހަރު ފީފާ އިން މިދިން މުއްދަތުގައި ނިއު އިން ޓަވަރޭޒަށް ދޭން ޖެހޭ މުސާރަ ނުދީފިނަމަ އަލުން ފީފާ ޑިސިޕްލިނަރީ ކޮމިޓީން މި މައްސަަލަ އަންނަ މަހުގެ ފަސް ވަނަ ދުވަހު ތާވަލުކޮށް، ކުރިއަށް ގެންދަން ވަނީ ނިންމައިފަ އެވެ.
ޓަވަރޭޒަށް ދޭން އެންމެ ފަހުން ފީފާ އިން ނިއު އަށް އެންގި ފައިސާގެ ތަފްސީލަށް ބަލާއިރު، މުސާރައިގެ ގޮތުގައި ދޭން ޖެހޭ 4000 އެމެރިކާ ޑޮލަރު (61،680 ރުފިޔާ) އާއި ނިއު އިން ހަދާފައިވާ ކޮންޓްރެކްޓާއި ހިލާފުވެފައިވާތީވެ ބަދަލެއްގެ ގޮތުން ދޭން ޖެހޭ 20،000 އެމެރިކާ ޑޮލަރު (308،400 ރުފިޔާ) އަދި ފީފާ އަށް ދޭން ޖެހޭ 8000 ސްވިސް ފްރެންކްސް (124087 ރުފިޔާ) އާއި ޖޫރިމަނާގެ ގޮތުގައި 5000 ސްވިސް ފްރެންކް (77,557 ރުފިޔާ) އެވެ. މިއީ ޖުމްލަ އެއްކޮށް ބަލާއިރު، 571،724 ރުފިޔާ އެވެ.
ޓަވަރޭޒަށް މުސާރަ ދޭން ފީފާ އިން ނިއު އަށް އަަނެއްކާ ވެސް މުހުލަތެއް ދީފައި މިވަނީ، ނިއުގެ ސަޕޯޓަރުންތަކެއް އިސްވެ، ރޭޑިއަންޓް ނަމުގައި ކްލަބެއް ވުޖޫދުކޮށް މަސައްކަތް ފަށައިގެން އުޅޭ ދަނޑިވަޅެއްގަ އެވެ. ރޭޑިއަންޓަކީ ނިއު ރޭޑިއަންޓްގެ ސްޕޯޓިން ސަކްސެސާގެ ގޮތުގައި އޭއެފްސީން ކަނޑައަޅާފައިވާ ކަމަށް އެފްއޭއެމުން ވަނީ ބުނެފަ އެވެ. އަދި ނިއު ރޭޑިއަންޓްގެ ސްޕޯޓިން ސަކްސެސާއެއްގެ ގޮތުގައި ރޭޑިއަންޓަށް ކުރިއަށް ދެވޭނީ ނިއުގެ ދަރަންޏާ ހަވާލުވެގެން ކަމަށް އުސޫލުތަކުގައި އޮންނަ ކަމަށް ވެސް އެފްއޭއެމުން ވަނީ ބުނެފަ އެވެ.
ނިއު އިން އެންމެ ފަހުން އިންތިހާބުކުރި ބޯޑުގެ މުއްދަތު އޮތީ ހަމަވެފަ އެވެ. އެހެންކަމުން، ފީފާގެ މި އެންގުންތަކަށް އެ ކްލަބުން އަމަލުކުރާނެ ރަސްމީ ހައިސިއްޔަތެއް އޮތް ލީޑަޝިޕެއް ނެތެވެ.
