މިދިޔަ އަހަރު ހިނގި ބަޑި ޖެހުމުގެ ހާދިސާއަކާ ގުޅިގެން ލަވަކިޔުންތެރިޔާ ރިއާނާގެ ލޯބިވެރިޔާ އަދި ރެޕް އާޓިސްޓް އޭސެޕް ރޮކީ ހައްޔަރުކޮށްފި އެވެ.
ފުލުހުން ބުނީ އޭނާ ހައްޔަރު ކުރީ ލޮސް އެންޖެލިސް އެއާޕޯޓުން ކަމަށެވެ. އޭސެޕް ރޮކީ ނުވަތަ ރާކިމް މަޔޭޒް އެންމެ ފުރަތަމަ ހައްޔަރު ކުރީ މިދިޔަ ނޮބެމްބަރު މަހު އެވެ.
އެއީ ހޮލީވުޑްގައި ބަޑި ޖެހި ހާދިސާއަކާ ގުޅިގެންނެވެ. އުމުރުން 33 އަހަރުގެ މަޔޭޒް އާއި ރިއާނާ ލޯބީގެ ގޮތުން ގުޅިގެން އުޅޭ އިރު، ރިއާނާ އިނީ ފުރަތަމަ ދަރިފުޅަށް ބަލިވެ އެވެ.
އޭނާ އެއާޕޯޓުން ހައްޔަރު ކުރީ ރިއާނާގެ އުފަން ރަށް، ބާބޭޑޯސްއަށް ދަތުރު ކުރުމަށް ފަހު، ޕްރައިވެޓް ޖެޓުގައި ލޮސް އެންޖެލިސް އެއާޕޯޓަށް ޖެއްސުމުންނެވެ.
ފުލުހުން ބުނީ މިދިޔަ އަހަރު ހިނގި ބަޑި ޖެހުމުގެ ހާދިސާގައި އެކަކަށް ކުދި އަނިޔާ ލިބުނު ކަމަށެވެ. ބަޑި ޖެހީ މަޔޭޒް ކަމަށް ތުހުމަތު ކުރެވޭ އިރު، އޭނާ އެ ތަނުން ފިލީ ކަމަށް ފުލުހުން ބުންޏެވެ.
މަޔޭޒް އާއި ބިލިއަނަރު ރިއާނާ ލޯބީގެ ގޮތުން ގުޅިގެން އުޅޭކަން އިއުލާނު ކުރީ މިދިޔަ އަހަރު އެވެ. ޖީކިއު މެގެޒިންއަށް މޭ 2021 ގައި ދިން އިންޓަވިއުގައި މަޔޭޒް ބުނީ ރިއާނާއަކީ އޭނާގެ "ހަޔާތު ލޯބި" ކަމަށެވެ.
ނިއު ޔޯކަށް އުފަން މަޔޭޒް މީގެ ކުރިން ވެސް ހައްޔަރުކޮށްފައިވެ އެވެ. އެގޮތުން ސްޓޮކްހޯމްގައި 2019 ވަނަ އަހަރު މަގުމަތީގައި ހިނގި ތަޅާފޮޅުމެއްގެ ސަބަބުން މަހަކަށް ވުރެ ގިނަ ދުވަސް ޖަލުގައި ހޭދަކުރި އެވެ.
