މާ ބޮޑަށް މަރުވުމަކީ ރަހިމުގެ ކެންސަރު ޖެހުމުގެ ނުރައްކާ ބޮޑުވާ ކަމެއް ކަމުގައި ދިރާސާއަކުން ދައްކައިފި އެވެ.
އިސްކޮޅުގައި ފަސް ފޫޓު ފަސް އިންޗި ހުންނަ އަންހެނަކު ހުންނަން ޖެހޭ ވަރަށް ވުރެ 12.7 ކިލޯ ބަރު ނަމަ ނުރައްކާ ދެ ގުނަ ބޮޑުވާ ކަމަށް ދިރާސާގައިވެ އެވެ.
ކެންސާ ރިސާޗް ޔޫކޭ ޖަމިއްޔާއިން ފަންޑު ކުރި ދިރާސާގައި އެމެރިކާ، އިނގިރޭސިވިލާތް އަދި އިތުރު ފަސް ގައުމަކުން 120،000 އަށް ވުރެ ގިނަ އަންހެނުން ބައިވެރިވި އެވެ.
އެ ޖަމިއްޔާއިން ބުނީ ދުޅަހެޔޮ ބަރުދަނެއް ދެމެހެއްޓުމަކީ ތަފާތު 13 ބާވަތެއްގެ ކެންސަރުން ރައްކާތެރިވުމަށް ކުރެވޭނެ ކަމެއް ކަމަށެވެ. ނަމަވެސް ޖީންސް އާއި ހޯމޯންސް ފަދަ ކަންކަމަކީ ވެސް ނުރައްކާ ބޮޑުވާ ސަބަބުގެ ގޮތުގައި ފާހަގަކުރެ އެވެ.
ދިރާސާގައި ބަޔާންކުރި އެއް ތިއަރީގައިވާ ގޮތުން ހަށިގަނޑުގައި ހުންނަ ފެޓް ސެލްތައް އާއްމު ހާލަތަށް ވުރެ އަވަހަށް ސެލްތައް އިތުރުވުމަށް ސިގްނަލް ފޮނުވަ އެވެ. އެއީ ކެންސަރަށް މަގުފަހިވެދާނެ ކަމެއް ކަމަށް ބުންޏެވެ.
ބައެއް ބާވަތްތަކުގެ އުރަތަމީގެ ކެންސަރާއި އަންހެނުންގެ ހޯމޯން އެސްޓްރޮޖެންއާ ގުޅުން އޮތް ކަމަށް ކުރީގެ ދިރާސާތަކުން ދައްކާފައިވެ އެވެ. އެސްޓްރޮޖެންއަކީ ފެޓް ސެލްގެ ސަބަބުން ވެސް އިތުރުވެދާނެ ހޯމޯނެކެވެ.
ޔުނިވާސިޓީ އޮފް ބްރިސްޓޮލްގެ ސައިންސްވެރިން ހެދި ދިރާސާ ޝާއިއު ކުރީ ބީއެމްސީ މެޑިސިން ޖާނަލްގަ އެވެ. މިއީ ފަލަވުން ނުވަތަ މާ ބޮޑަށް ބަރުވުމާއި ރަހިމުގެ ކެންސަރާ އޮތް ގުޅުން ބެލުމަށް މިހާތަނަށް ހެދި އެންމެ ބޮޑު އެއް ދިރާސާ އެވެ.
ދިރާސާއިން އެނގުނު ގޮތުގައި އުމުރުން ދުވަސްވާ ވަރަކަށް ބަރުދަން އިތުރުވުމާއި ރަހިމުގެ ކެންސަރާ ގުޅުން އޮތުމުގެ ފުރުސަތު ވަރަށް ބޮޑެވެ. މާ ބޮޑަށް ބަރުވުމާއި ރަހިމުގެ ކެންސަރާ ގުޅިފައިވާ ދެ ހޯމޯންގެ ގޮތުގައި ދިރާސާއިން ފާހަގަކުރީ ފާސްޓިން އިންސިއުލިން އާއި ޓެސްޓޮސްޓެރޯން އެވެ.
ސައިންސްވެރިންގެ އުއްމީދަކީ ރަހިމުގެ ކެންސަރު ޖެހުމުގެ ނުރައްކާ ބޮޑު ކަމަށް ބެލެވޭ މީހުންގެ ހަށިގަނޑުގައި އެ ދެ ހޯމޯން ހުންނަ ވަރު ރެގިއުލޭޓް ކުރުމަށް މުސްތަގްބަލުގައި ބޭސް ބޭނުން ކުރަން ފެށުމެވެ.
