ލިވަޕޫލް (އޭޕްރީލް 19) - އިނގިރޭސި ޕްރިމިއާ ލީގުގައި މިރޭ ލިވަޕޫލާއި މެންޗެސްޓާ ޔުނައިޓެޑް ބައްދަލުކުރާ މެޗަކީ ބޮޑު މެޗެއް ކަމަށާއި މި މެޗުގައި ޔުނައިޓަޑަށް އެއްވެސް ދުލެއް ނުދެވޭނެ ކަމަށް ލިވަޕޫލްގެ ކޯޗު ޔާގެން ކްލޮޕް ބުނެފި އެވެ.
ޕޮއިންޓް ތާވަލުގައި މި ދެ ޓީމު ކްލަބުގެ މެދުގައި ބޮޑު ފަރަގެއް އޮތަސް، ޒަމާންވީ މި ދެ ކްލަބުގެ ކުރިމަތިލުންތަކަކީ "ފިނި" ކޮށް ދާނެ މެޗުތަކެއް ނޫނެވެ. އެހެންކަމުން، މިރޭގެ މެޗަށް ބޮޑު ސަމާލުކަމެއް ލިބޭނެ އެވެ.
އަމިއްލަ ދަނޑުގައި މިރޭ ޔުނައިޓަޑާ ދެކޮޅަށް ނުކުންނައިރު، ލިވަޕޫލް އޮތީ ލީގު ޗެމްޕިއަންކަން ހޯދުމުގެ ރޭހުގަ އެވެ. ތާވަލްގެ އެއް ވަނައިގައި އޮތް މެންޗެސްޓާ ސިޓީ އާއި ލިވަޕޫލްއާ ދެމެދު މިހާރު އޮތީ އެއް ޕޮއިންޓްގެ ފަރަގެކެވެ. ލީގުގައި ބާކީ ހަތް މެޗު އޮތްއިރު، މިރޭގެ މެޗަކީ ލިވަޕޫލަށް ވެސް ނުހަނު މުހިންމު މެޗެކެވެ. މިރޭގެ މެޗުން ލިވަޕޫލް މޮޅުވެ، ނުވަތަ އެއްވަރުވެއްޖެ ނަމަ ތާވަލުގެ އެއް ވަނަ އަށް ޖެހިލާނެ އެވެ.
އިނގިރޭސި ޕްރިމިއާ ލީގުގައި އެންމެ ފަހުން ކުޅުނު މެޗުތަކުން އާސެނަލް އާއި ޓޮޓެންހަމް ހޮޓްސްޕާސް ބަލިވުމާ އެކު، ތާވަލްގެ ފަސް ވަނައިގައި ޔުނައިޓެޑަށް ވަނީ ގަދަ ހަތަރެއްގެ އުންމީދު އާވެފަ އެވެ. އެހެންކަމުން، ޒަމާންވީ ވާދަވެރިން ކަމަށްވާ ލިވަޕޫލް އަތުން މިރޭގެ މެޗުން މޮޅުވުމަކީ ޔުުނައިޓެޑަށް ވެސް މުހިންމު ކަމެކެވެ.
މި މެޗަށް ކުރިމަތިލާއިރު، ލީގުގައި މި ދެ ޓީމު ޔުނައިޓެޑްގެ ދަނޑުގައި ބައްދަލުކުރި މެޗުގައި، ލިވަޕޫލް އަތުން 5-0ގެ ލަދުވެތި ނަތީޖާއަކުން ޔުނައިޓެޑް ބަލިވިއިރު، އެ ނަތީޖާގެ ހިތިކަން ޔުނައިޓެޑްގެ ސަޕޯޓަރުންގެ އަރުތެރެއިން އަދި ނުކެނޑޭނެ އެވެ.
"ޔުނައިޓެޑަށް ވަރަށް ސަމާލުވާންޖެހޭނެ"
ލިވަޕޫލްގެ ކޯޗު ކްލޮޕް މެޗުގެ ކުރިން ދެއްކީ ވަރަށް މުހިންމު ވާހަކަ އެކެވެ. މިރޭގެ މެޗަށް ނުކުންނައިރު ޔުނައިޓެޑްގެ "މޯޓިވޭޝަން" ވެސް ރަނގަޅުވާނެ ކަމެވެ. އެގެ އެއް ސަބަބަކީ ލީގުގައި އެންމެ ފަހުން ކުޅުނު މެޗުގައި ނޮރިޗް ސިޓީ އަތުން 3-2 އިން ޔުނައިޓެޑް މޮޅުވެފައި އޮތުމެވެ.
ކްލޮޕް ބުނީ ޔުނައިޓެޑާ ދެކޮޅަށް ކުޅޭއިރު، ލިވަޕޫލަށް އެއްވެސް ދުލެއް ނުދެވޭނެ ކަމަށެވެ. އަދި މިރޭގެ މެޗުގައި ޔުނައިޓެޑުން ވެސް ލިވަޕޫލް ބަލިކުރަން "ކުރެވެން އޮތް ހުރިހާ ކަމެއް" ކުރާނެ ކަމަށެވެ.
"ޔުނައިޓެޑުން ބޭނުންވާ ކަންތައްތައް ކުރުމަށް ފުރުސަތު ދީފި ނަމަ، އަހަރަމެންނަށް ދެރަ ލިބޭނީ. އޭގެ ބަދަލުގައި އަހަރަމެން ނުކުންނަންޖެހޭނީ ފޯރީގައި،" ކްލޮޕް ބުންޏެވެ.
"މިއީ އެންމެ މުހިންމު މެޗުކަމަށް ދެކިގެން، އަތުގައި އެއްވެސް އެއްޗެއް ނެތް ކަމަށް ބަލައިގެން މި މެޗަށް ކުރިމަތިލާންޖެހޭނީ."
ކްލޮޕް ބުނީ މިރޭގެ މެޗަކީ "ދުނިޔޭގެ އެންމެ ބޮޑު ދެ ކްލަބު"ގެ ކުރިމަތިލުމެއް ކަމަށެވެ.
"މިއި ދުނިޔެގެ އެންމެ ބޮޑު ދެ ކްލަބުގެ ކުރިމަތިލުން. ފަހަރެއްގައި ސްޕެއިންގައި ހިޔާލު ތަފާތުވެދާނެ އެކަމަކު މިއީ ދުނިޔޭގެ އެންމެ ބޮޑު ދެ ކްލަބުގެ ކުރިމަތިލުން،" ކްލޮޕް ބުންޏެވެ.
މިއީ ކޯޗެއްގެ ގޮތުގައި ކްލޮޕްއާ ދެކޮޅަށް ޔުނައިޓެޑްގެ ކޯޗު ރަލްފް ރަންގްނިކް ނުކުންނަ 14 ވަނަ މެޗެވެ. އެކަމަކު ދެ ކޯޗުން ވެސް ނިސްބަތްވާ ޖަރުމަނުން ބޭރުގެ ލީގެއްގައި ދެ ކޯޗުން ކުރިމަތިލާ ފުރަތަމަ ފަހަރެވެ.
ކްލޮޕް ބުނީ ރަންގްނިކްގެ ކެރިއަރުގައި އޭނާ ވަނީ ބޮޑެތި ކާމިޔާބީތަކެއް ހޯދާފައި ކަމަށެވެ. އެކަމަކު، ޔުނައިޓެޑްގައި ރަންގްނިކަށް ހަމަޖެހިލެވޭ ގޮތް ނުވާ ކަމަށެވެ.
"ޔުނައިޓެޑްގެ ކޯޗުކަމާ ރަންގްނިކް ހަވާލުވި ފަހުން ގުޅުމެއް ނެތް. އެކަމަކު އެއީ ދެ މީހުންގެ މެދުގައި އޮތް އިހުތިރާމެއްގެ ސަބަބުން. މިހާރު ތިބި ވަޒީފާގެ ގޮތުން،" ކްލޮޕް ބުންޏެވެ.
ޔުނައިޓެޑްގެ ތަރި ކްރިސްޓިއާނޯ ރޮނާލްޑޯގެ ލޯބިވެރިޔާ ޖިއޮޖީނާ ރޮޑްރިގޭޒް، 27، ވިހެއި އެއްމާބަނޑު ދެ ކުދިންގެ ތެރެއިން އެއް ކުއްޖަކު އިއްޔެ މަރުވެފައިވާއިރު، އާއިލާ އަށް ވަގުތު ދޭން ވެގެން މިރޭގެ މެޗުގައި ރޮނާލްޑޯ ޓީމުގައި ނުހިމެނޭނެ އެވެ. އަނެއްކޮޅުން އަނިޔާގެ މައްސަލަތަކުގެ ސަބަބުން ޔުނައިޓެޑްގެ މުހިންމު ބައެއް ކުޅުންތެރިން ވެސް ތިބީ ކުޅުމާ ދުރުގަ އެވެ.
ލިވަޕޫލްގެ އެންފީލްޑް ސްޓޭޑިއަމްގައި މިރޭ ޔުނައިޓެޑާ ދެކޮޅަށް ކުޅޭ މެޗު ފަށާނީ 00:00 ގަ އެވެ.
