އިންޑިއާގެ ނިއު ދިއްލީގެ ޖަހާންގިރްޕޫރީގައި މުސްލިމުންނާއި ހިންދޫންނާ ދެމެދު މިދިޔަ ހޮނިހިރު ދުވަހު ބޮޑު ހަމަނުޖެހުމެއް ހިނގައި ގިނަ ބަޔަކަށް އަނިޔާވެއްޖެ އެވެ.
ނުވަ މީހުންނަށް އަނިޔާވި އިރު އޭގެ ތެރެއިން ހަތް މީހުންނަކީ ފުލުހުންނެވެ. އެއް ފުލުހަކަށް އަނިޔާވީ ވަޒަނެއް އަރައިގެން ކަމަށް ރިޕޯޓުތައް ބުނެ އެވެ.
ގިނަ އަދަދެެއްގެ ފަގީރުން ދިރިއުޅޭ ޖަހާންގިރްޕޫރީގައި ބެންގާލީ ބަހުން ވާހަކަ ދައްކާ މުސްލިމުންގެ އާބާދީ ވަރަށް ބޮޑެވެ. ހަމަނުޖެހުން ހިނގީ ހިންދޫން ބޮޑު ހިނގާލުމެއް ބޭއްވި ފަހުންނެވެ.
މަންޒަރު ދުށް މީހުން ބުނާ ގޮތުގައި ހިންދޫ ކަނާއަތު ފިޔައިގެ ގްރޫޕުތަކަށް ނިސްބަތްވާ މީހުން، އެ ދީނުގެ ކަލާނގެއެއް ކަމުގައިވާ ހަނޫމާންގެ އުފަން ދުވަސް ފާހަގަކުރަން ހިނގާލުމެއް ބޭއްވި އެވެ.
ވީޑިއޯތަކުން ފެންނަނީ ކަނޑި އާއި އެހެން ހަތިޔާރު ފަދަ ތަކެތި ހިފައިގެން ހިންދޫ ދީނުގެ ގޮވުންތައް ގޮވަމުން ހިނގާ މަންޒަރެވެ.
ހަމަނުޖެހުން ހިނގީ މިސްކިތެއް ކައިރިން އެ މީހުން ދިޔަ ހިސާބުންނެވެ. އެއް ބަޔަކު އަނެއް ބަޔަކަށް ގާ އުކައި، ބޮޑު ހަމަނުޖެހުމަކަށް ބަދަލުވީ ކަމަށް ރިޕޯޓުތައް ބުނެ އެވެ.
ހިންދޫން ތުހުމަތު ކުރާ ގޮތުގައި މުސްލިމުން ރާވައިގެން ފުރާޅުތައް މަތީގައި ތިބެ، ތޫނު ހަތިޔާރު އެ މީހުންނާ ދިމާލަށް އުކީ އެވެ. ނަމަވެސް މުސްލިމުން ބުނީ މިސްކިތް ކައިރީގައި މުސްލިމުންނަށް އަމާޒުކޮށް ތަފާތު ގޮވުންތައް ގޮވުމުން، ޒުވާބެއް އުފެދި ހަމަނުޖެހުން ފެށުނީ ކަމަށެވެ.
ދިއްލީގެ ފުލުހުން 23 މީހުން ހައްޔަރުކޮށްފައިވާ އިރު، އޭގެ ތެރޭގައި ދެ ކުޑަކުދިން ހިމެނެ އެވެ. ހަމަނުޖެހުން އުފެދުނު ގޮތް ބަލަމުންދާ ކަމަށް ފުލުހުން ބުނެ އެވެ.
ވެރިކަން ކުރާ ބަރަތިޔަ ޖަނަތަ ޕާޓީ (ބީޖޭޕީ) ގެ ވެރިން ބުނީ އެކަމުގެ ފަހަތުގައި ތިބީ "ބަންގްލަދޭޝުން އައިސްގެން ގަވާއިދާ ހިލާފަށް އުޅޭ ބަޔަކު" ކަމަށެވެ.
މިއީ 2020 ވަނަ އަހަރު ދިއްލީގައި މުސްލިމުންނާއި ހިންދޫންނާ ދެމެދު ކުރިމަތިލުމަށް ފަހު ދިމާވި އެންމެ ބޮޑު ހަމަނުޖެހުމެވެ. އެ ފަހަރު 50 މީހުން މަރުވި އިރު، ގިނައިން ހިމެނެނީ މުސްލިމުންނެވެ.
ނަމަވެސް މަދްޔާ ޕްރަދޭޝް އާއި ރާޖަސްތާން ފަދަ އެހެން ބައެއް ސްޓޭޓްތަކުގައި ފަހަކަށް އައިސް މިފަދަ ކުރިމަތިލުންތައް ރިޕޯޓު ކޮށްފައިވެ އެވެ. އެ ދެ ތަނުގައި ވެސް މައްސަލަ ބޮޑުވީ ހިންދޫން މިސްކިތްތައް ކައިރީ ހިނގާލުން ބޭއްވުމުންނެވެ.
ޖަހާންގިރްޕޫރީގެ ހަމަނުޖެހުމަށް ފަހު އިދިކޮޅު 13 ޕާޓީ ގުޅިގެން ނެރުނު ބަޔާނުގައި ވަނީ ބޮޑު ވަޒީރު ނަރެންދްރަ މޯދީ ހަނު ހުންނަވާތީ ހައިރާންކަން ފާޅުކޮށްފަ އެވެ.
