މާޗް މަހުގެ ފަހުކޮޅު ޗައިނާގެ ޝަންހާއީ ލޮކްޑައުން ކުރި ފަހުން، އެ ސިޓީއިން ފުރަތަމަ ފަހަރަށް ކޮވިޑް ޖެހިގެން ބަޔަކު މަރުވެއްޖެ އެވެ.
ސިޓީ ހެލްތު ކޮމިޝަނުން ބުނީ މަރުވި އުމުރުން 89 އަހަރާއި 91 އަހަރުގެ ތިން މީހުން ކަމަށެވެ. އެ މީހުން ތިބީ ކޮވިޑް ވެކްސިން ނުޖަހަ އެވެ.
ޝަންހާއީގެ އޮފިޝަލުން ބުނާ ގޮތުގައި އެ ސިޓީގެ އުމުރުން 60 އަހަރުން މަތީގެ މީހުންގެ ތެރެއިން ވެކްސިން ފުރިހަމަކޮށްފައިވާ އެންމެ 38 ޕަސެންޓް މީހުންނެވެ.
މިހާރު އެ ސިޓީގެ އޮފިޝަލުން ތައްޔާރު ވަނީ އަނެއްކާވެސް ހުރިހާ ރައްޔިތުން ޓެސްޓު ކުރުމަށެވެ. އެހެންކަމުން ހަތަރު ވަނަ ހަފްތާއަކަށް ލޮކްޑައުން ދެމިއޮންނާނެ ކަމަށް ބެލެވެ އެވެ.
މިއަދާ ހަމައަށް ވެސް ޗައިނާއިން ބުނަމުން ދިޔާއީ ޝަންހާއީގައި ކޮވިޑް ޖެހިގެން އެއްވެސް މީހަކު މަރު ނުވާ ކަމަށެވެ. ނަމަވެސް އެކަމާ މެދު ބައެއް ފަރާތްތަކުން ސުވާލު އުފެއްދި އެވެ.
ޝަންހާއީގައި ހަރުކަށި ލޮކްޑައުނެއް ތަންފީޒު ކުރާތީ ރައްޔިތުން ތިބީ ހިތްހަމަނުޖެހިފަ އެވެ. ފުލުހުންނާއި އާއްމުންނާ ދެމެދު ހަމަނުޖެހުން ހިނގާ މަންޒަރު ފެންނަ ވީޑިއޯތައް ވެސް ވަނީ އާއްމުވެފަ އެވެ.
ގިނަ އަދަދެއްގެ ކޭސް ފެނުނު ނަމަވެސް، ސީރިއަސް ކޭސްތައް މަދުވުމާ އެކު އެހާ ހަރުކަށި ލޮކްޑައުނެއް ތަންފީޒު ކުރުމުގެ ބޭނުމާ މެދު އާއްމުން ދަނީ ސުވާލު ކުރަމުންނެވެ.
ފިޔަވަޅުތައް ހަރުކަށިވުމާއި ކާބޯތަކެތި ހުސްވަމުން ދާތީ ގިނަ ބަޔަކު ސޯޝަލް މީޑިއާގައި ހިޔާލު ފާޅުކުރަމުން ދެ އެވެ. ތަކެއްޗަށް އޯޑަރު ދިނުމުން ގެޔަށް ޑެލިވާ ކުރަނީ ސަރުކާރުގެ މުވައްޒަފުންނެވެ.
ނަމަވެސް މުވައްޒަފުން އެކަށީގެންވާ މިންވަރަށް ނެތުމުން، ފެނާއި ކާބޯތަކެތީގެ އޯޑަރު ގެތަކަށް ޑެލިވާ ކުރުމުގައި ލަސްތައް ކުރިމަތިވަމުންދާ ކަމަށް ވެ އެވެ.
