ހަތިމު އެންދުމަށް ފަހު އަދިވެސް އެކަން ތަކުރާރު ކުރާނެ ކަމަށް ކަނާއަތު ފިޔައިގެ ހަރުކަށި ގްރޫޕަކުން ބުނެފައި ވާތީ މީގެ ހަތަރު ދުވަސް ކުރިން ސްވިޑަންގެ ސިޓީތަކުގައި އުފެދުނު ހަމަނުޖެހުން އަދިވެސް ކުރިއަށް އެބަ ދެ އެވެ.
ސްވިޑަންގެ މީޑިއާއިން ބުނީ އިރުމަތީގައި އޮންނަ ނޯރްކޮޕިންގް ސިޓީގައި ތިން މީހުންނަށް އަނިޔާވެފައިވާ ކަމަށެވެ. ފުލުހުން ވަނީ އެ ތަނުގައި ހަމަނުޖެހުން އުފައްދަމުންދާ މީހުންނަށް އިންޒާރު ދިނުމުގެ ގޮތުން ބަޑި ޖަހާފަ އެވެ.
އެ ސިޓީގެ ގިނަ އަދަދެއްގެ އުޅަނދުތަކުގައި ހުޅު ޖަހާފައިވާ އިރު، ތުހުމަތު ކުރެވޭ 17 މީހުން ވަނީ ހައްޔަރުކޮށްފަ އެވެ.
ހޮނިހިރު ދުވަހު ކަނާއަތު ފިޔައިގެ ހަރުކަށި ގްރޫޕުން ދެކުނުގައި އޮންނަ މާލްމޯ ސިޓީގައި އެއްވުމެއް ބާއްވައި ހަމަނުޖެހުނެއް އުފެއްދި އެވެ. އެ މީހުން ވަނީ ބަހަކާއި އެހެނިހެން އުޅަނދުގައި ރޯކޮށްފަ އެވެ.
ހަތިމުގައި ރޯކުރި މައްސަލައިގައި ނުރުހުން ފާޅު ކުރުމަށް އިރާނާއި އިރާގުގެ ސަރުކާރުން ވަނީ ސްވިޑަންގެ ސަފީރުން ހާޒިރުކޮށްފަ އެވެ.
ޑެންމާކާއި ސްވިޑަންއަށް ނިސްބަތްވާ ކަނާއަތު ފިޔައިގެ ހަރުކަށި އެކްޓިވިސްޓް ރަސްމޫސް ޕަލުޑާން ބުނީ އޭނާ ހަތިމު އެންދި ކަމަށާއި އަދިވެސް އެކަން ތަކުރާރު ކުރާނެ ކަމަށެވެ. އޭނާއަކީ ސްޓްރޭމް ކޫރްސް ގްރޫޕުގެ ވެރިޔާ އެވެ.
ބުރާސްފަތި ދުވަހު ފެށި ހަމަނުޖެހުމުގައި 16 ފުލުހުންނަށް އަނިޔާވެ، ގިނަ އަދަދެއްގެ ފުލުހުންގެ އުޅަނދަށް ވެސް ވަނީ ގެއްލުންވެފަ އެވެ. ހުކުރު ދުވަހާއި ހޮނިހިރު ދުވަހު ހަރުކަށި ގްރޫޕުން ހަރަކާތްތައް ރޭވި ސިޓީތަކުގައި ހަމަނުޖެހުން ހިނގި އެވެ. އެގޮތުން ސްޓޮކްހޯމް، ލިންކޮޕިންގް އަދި ނޯރްކޮޕިންގް ފާހަގަކުރެވެ އެވެ.
ޕަލުޑާން ބުނެފައި ވަނީ ނޯރްކޮޕިންގައި އާދީއްތަ ދުވަހު އެއްވުމެއް ބާއްވާނެ ކަމަށެވެ. އެހެންކަމުން، އޭނާއާ ދެކޮޅު މީހުން އެތަނަށް އެއްވީ ކަމަށް ޑިޔުޝް ވެލް ނޫހުގައިވެ އެވެ.
ސްވިޑަން ފުލުހުންގެ ވެރިޔާ އެންޑާޒް ތޯންބާގް ވިދާޅުވީ މުޒާހަރާ ކުރާ މީހުން ފުލުހުންގެ ފުރާނައަށް ރައްކާތެރި ނުވާ ކަމަށާއި މިއީ މީގެ ކުރިން ފެނުނު ހަމަނުޖެހުންތަކާ ތަފާތު، ނުރައްކާތެރި ހަމަނުޖެހުމެއް ކަމަށެވެ.
މީގެ ކުރިން ވެސް ސްޓްރާމް ކޫރްސް ގްރޫޕުން ހަތިމު އަންދަން މަސައްކަތް ކުރުމުން ސްވިޑަންގައި އެތައް ފަހަރަކު ހަމަނުޖެހުން ހިނގާފައިވެ އެވެ. އެގޮތުން 2020 ވަނަ އަހަރު މާލްމޯގައި ގިނަ ބަޔަކު ވަނީ ކާރުތަކާއި ފިހާރަތަކުގައި ހުޅު ޖަހާފަ އެވެ.
ޕަލުޑާންއަކީ 2020 ވަނަ އަހަރު ނަސްލީ ތަފާތު ކުރުމާއި އެހެން ބައެއް ކުށްތައް ސާބިތުވެ، ޑެންމާކްގައި އެއް މަސް ޖަލުގައި ހޭދަކުރި މީހެކެވެ. އޭނާ ވަނީ ޔޫރަޕްގެ އެހެން ބައެއް ގައުމުތަކުގައި ވެސް ހަތިމު އަންދަން މަސައްކަތްކޮށްފަ އެވެ. އެގޮތުން ފްރާންސާއި ބެލްޖިއަމްގައި ވެސް އެފަދަ އެއްވުން ބާއްވަން ކުރިން ރޭވި އެވެ.
