އުތުރު ކޮރެއާގެ ޓެކްޓިކަލް ނިޔުކްލިއާ ހަތިޔާރުގެ ބާރު ވަރުގަދަ ކުރުމަށް ހާއްސަ މުޅިން އާ ހަތިޔާރު ނިޒާމެއް އާދީއްތަ ދުވަހުގެ ހެނދުނު ޓެސްޓުކޮށްފި އެވެ.
ކާމިޔާބުކަމާ އެކު އާ ހަތިޔާރު ޓެސްޓު ކުރި އިރު، ލީޑަރު ކިމް ޖޮންގް އުން އެ މަންޒަރު ބެއްލެވި އެވެ.
ކޮރެއަން ސެންޓްރަލް ނިއުސް އެޖެންސީ (ކޭސީއެންއޭ) އިން ބުނީ އަލަށް ޓެސްޓު ކުރި "ޓެކްޓިކަލް ގައިޑެޑް" ހަތިޔާރުން ނިޔުކްލިއާ ބާރު އަދި ދިގު ރާސްތާގެ ހަތިޔާރު ވަރުގަދަ ކުރެވޭނެ ކަމަށެވެ.
މިދިޔަ ހުކުރު ދުވަހު އުތުރު ކޮރެއާއިން ވަނީ އެ ގައުމުގެ ފައުންޑަރު އަދި ކިމްގެ ކާފާފުޅު، ކިމްއިލް ސުންގްގެ އުފަން ދުވަސް ފާހަގަކޮށްފަ އެވެ.
ބޮޑެތި އެއްވުންތަކާއި، ހަވާ އެރުވުމާއި، ނެށުމުގެ ޝޯތައް އޮތް ނަމަވެސް މި ފަހަރު ޕެރޭޑެއް ނުބާއްވަ އެވެ. އެނެލިސްޓުން ބުނީ އެ ދުވަހާ ދިމާކޮށް އާ ހަތިޔާރެއް ޓެސްޓު ކުރުން އެކަށީގެންވާ ކަމަށެވެ.
މީގެ ތިން ހަފްތާ ކުރިން އުތުރު ކޮރެއާއިން ވަނީ އެ ގައުމުން މިހާތަނަށް ޓެސްޓު ކުރި އެންމެ ބޮޑު "އިންޓަކޮންޓިނެންޓަލް ބެލިސްޓިކް" މިސައިލް ޓެސްޓުކޮށްފަ އެވެ.
އެއީ އުތުރު ކޮރެއާގެ އަތުގައިވާ އެންމެ ބާރުގަދަ ހަތިޔާރެވެ. ދުރު ރާސްތާގެ އެ މިސައިލަކީ އެމެރިކާގެ ސަރަހައްދާ ހަމައަށް ދަތުރު ކުރުމުގެ ގާބިލްކަން ލިބިގެންވާ އެއްޗެކެވެ.
މި އަހަރުގެ ތެރޭގައި އުތުރު ކޮރެއާއިން ވަނީ ދަތި ކުރުމުގެ ފިޔަވަޅުތަކަށް ބެލުމެއް ނެތި ރެކޯޑް އަދަދަކަށް ހަތިޔާރު ޓެސްޓުކޮށްފަ އެވެ.
