ގާތްގަނޑަކަށް 750 ޓަނުގެ ޑީސެލްއާ އެކު މިސްރުން ފުރައިގެން މޯލްޓާއަށް ދަތުރު ކުރަމުން ދިޔަ ޓޭންކަރެއް ޓިއުނީޝިއާގެ އިރުދެކުނު އައްސޭރިފަށާ ދިމާލުން އަޑިއަށް ހިނގައްޖެ އެވެ.
"ބޯޓު އަޑިއަށް ދިޔައީ ހޮނިހިރު ދުވަހު ހެނދުނު. މި ވަގުތަށް އެއްވެސް ލީކެއް ނެތް،" ޓިއުނީޝިއާގެ އޮފިޝަލަކު ބުންޏެވެ.
އޭނާ ބުނީ ކާރިސާއެއް ކުރިމަތިވެދާނެތީ އަވަސް ފިޔަވަޅު އެޅުމަށް ހާއްސަ ކޮމިޓީއިން ބައްދަލުވުމެއް ބާއްވައި، އަޅާނެ ފިޔަވަޅުތަކާ މެދު ގޮތް ނިންމާނެ ކަމަށެވެ.
އަޑިއަށް ދިޔައީ އިކުއެޓޯރިއަލް ގިނީގެ ދިދައާ އެކު ދަތުރު ކުރި ޒެލޯ ނަމަކަށް ކިޔާ ޓޭންކަރެކެވެ. އޭތި ދަތުރު ފެށީ މިސްރުގެ ޑެމިއެޓާ ބަނދަރުން، ޔޫރަޕްގެ މޯލްޓާއަށް ދިޔުމަށެވެ.
އެ ޓޭންކަރު ޓިއުނީޝިއާގެ ސަރަހައްދަށް ވަންނަން ހުކުރު ދުވަހުގެ ހަވީރު ހުއްދައަށް އެދުނީ މާ ބޮޑަށް މޫސުން ގޯސްވުމުން ކަމަށް ރިޕޯޓުތައް ބުނެ އެވެ.
ޓޭންކަރުގައި ތިބި ހަތް ފަޅުވެރިން ސަލާމަތްކޮށްފައިވާ އިރު ހާލަތު ވަޒަން ކުރުމަށް އެންވާރަމަންޓް މިނިސްޓަރު ލެއިލާ ޗިކައުއީ އެ ސަރަހައްދަށް ވަޑައިގަންނަވާނެ އެވެ.
ޓިއުނީޝިއާއާ ގުޅޭ ކަނޑުމަތީގެ ބޮޑު ހާދިސާއެއް އެންމެ ފަހުން ހިނގީ އޮކްޓޯބަރު 2018 ގަ އެވެ. އެ ފަހަރު ޓިއުނީޝިއާގެ މަނަވަރު ޔުލިސޭ އާއި ސައިޕްރަސްގެ މަނަވަރު ވާޖިނިއާ ޖެހި، ފްރާންސްގެ ކޯސިކާ ރަށް ކައިރިން އެތައް ސަތޭކަ ޓަނުގެ ތެޔޮ މެޑިޓެރޭނިއަން ކަނޑަށް އެޅުނެވެ.
