މިދިޔަ އާދީއްތަ ދުވަހު ފިލިޕީންސްއަށް އެރި ތޫފާން މެގީގައި ހިނގި ފެންބޮޑުވުމާއި ބިންގަނޑު ކަނޑައިގެން ދިޔުމުގެ ހާދިސާތަކުގައި މަރުވި މީހުންގެ އަދަދު 167 އަށް އަރައިފި އެވެ.
ނޭޝަނަލް ޑިޒާޒްޓާ އެޖެންސީން ބުނީ އިތުރު 100 މީހުން ގެއްލިގެން ހޯދަމުންދާ ކަމަށާއި 1.9 މިލިއަން މީހުންނަށް ތޫފާނުގެ އަސަރުކޮށްފައިވާ ކަމަށެވެ.
ފިލިޕީންސްގެ މެދުތެރޭގައި އޮންނަ ލެއިޓޭ ޕްރޮވިންސްގެ ބޭބޭ ސިޓީ ވަށައިގެންވާ އަވަށްތަކަށް ވަރަށް ބޮޑަށް އަސަރުކުރި އެވެ. އެގޮތުން ބައެއް އަވަށްތައް އެއްކޮށް ފަސްއެޅިފައިވާ ކަމަށް ވެ އެވެ.
ނޭޝަނަލް ޑިޒާޒްޓާ އެޖެންސީން ބުނީ އެ ސަރަހައްދުގެ އިތުރުން ދެކުނު ޑަވާއޯ، މިންޑަނާއޯ އަދި މެދުތެރޭގައި އޮންނަ ނެގްރޯސް އޮރިއެންޓަލްސް ޕްރޮވިންސުން ވެސް މީހުން މަރުވި ކަމަށެވެ.
ގަޑިއަކު 65 ކިލޯމީޓަރުގެ ގަދަވަޔާ އެކު ތޫފާން އެރުމުން ގިނަ ބަޔަކު ވަނީ ގެތައް ދޫކޮށް ވަގުތީ ހިޔާތަކާއި ބިން އުސް ހިސާބުތަކަށް ބަދަލުވެފަ އެވެ.
ކޯސްޓްގާޑުން މީހުން ސަލާމަތް ކުރުމުގެ މަސައްކަތުގައި. -- ފޮޓޯ: ރޮއިޓާޒް
ފިލިޕީންސްގެ ކޯސްޓްގާޑުން އާއްމުކުރި ފޮޓޯތަކުން ފެންނަނީ އަނިޔާވެފައިވާ މީހުން ފެންގަނޑުގެ ތެރެއިން ސްޓްރެޗަރަށް ލައިގެން ބޯމަތިން އުފުއްލާލައި ގެންދާ މަންޒަރެވެ.
ތޫފާނުގެ އަސަރު އަންގާރަ ދުވަހު ކުޑަ ވާން ފެށި ނަމަވެސް، މެދުކެނޑުމެއް ނެތި ވާރޭ ވެހެމުން ދިޔުމުގެ ސަބަބުން މީހުން ސަލާމަތް ކުރުމުގެ މަސައްކަތަށް ހުރަސް އެޅުނެވެ.
ފިލިޕީންސްއަށް ކޮންމެ އަހަރަކު ވެސް އެވްރެޖުކޮށް 20 ތޫފާން އަރަ އެވެ. ތޫފާން މެގީއަކީ މި އަހަރު އެ ގައުމަށް ކުރިމަތިވި އެންމެ ފުރަތަމަ ތޫފާނެވެ.
