ކޮވިޑް ފެތުރޭތީ ލޮކްޑައުންކޮށްފައިވާ ޗައިނާގެ ޝަންހާއީ ސިޓީގައި އާއްމުންނާއި ފުލުހުންނާ ދެމެދު ހަމަނުޖެހުން ހިނގާ މަންޒަރު ފެންނަ ވީޑިއޯ އާއްމުވެއްޖެ އެވެ.
ޝަންހާއީ ސިޓީ ތިން ވަނަ ހަފްތާއަކަށް ލޮކްޑައުންކޮށްފައިވާ އިރު، ބައެއް އާއްމުން ގަދަކަމުން ގެތަކުން ނެރިގެން ގެންދާ ކަމަށް ރިޕޯޓުތައް ބުނެ އެވެ.
އާއްމުން ދިރިއުޅޭ ބައެއް އިމާރާތްތައް ކަރަންޓީން ސެންޓަރުތަކަށް ދަނީ ބަދަލު ކުރަމުންނެވެ.
ޝަންހާއީގައި އެތައް މިލިއަން މީހުން ގޭގައި ބަންދުވެފައިވާ އިރު، ބައްޔަށް ޕޮޒިޓިވްވާ ކޮންމެ މީހަކު ހުންނަން ޖެހެނީ ކަރަންޓީނުގަ އެވެ.
އެކަމަކު ކޮންމެ ދުވަހަކު ވެސް އެ ސިޓީއިން 20،000 އަށް ވުރެ ގިނަ މީހުން ޕޮޒިޓިވްވަމުން ދާތީ، ކަރަންޓީނުގައި މީހުން ބަހައްޓާނެ ޖާގައިގެ ދަތިކަން އެބަ އޮތެވެ.
މައުރަޒުތައް ބާއްވާ ސެންޓަރުތަކާއި ސްކޫލްތަކުގައި ކަރަންޓީން ސެންޓަރު ގާއިމްކޮށްފައިވާ އިރު، ކޮވިޑަށް ހާއްސަ ވަގުތީ ހޮސްޕިޓަލްތައް ވެސް ވަނީ އަޅާފަ އެވެ.
ގިނަ އަދަދެއްގެ ކޭސް ފެނުނު ނަމަވެސް، ސީރިއަސް ކޭސްތައް މަދުވުމާ އެކު އެހާ ހަރުކަށި ލޮކްޑައުނެއް ތަންފީޒު ކުރުމުގެ ބޭނުމާ މެދު އާއްމުން ދަނީ ސުވާލު ކުރަމުންނެވެ.
ފިޔަވަޅުތައް ހަރުކަށިވުމާއި ކާބޯތަކެތި ހުސްވަމުން ދާތީ ގިނަ ބަޔަކު ސޯޝަލް މީޑިއާގައި ހިޔާލު ފާޅުކުރަމުން ދެ އެވެ. ތަކެއްޗަށް އޯޑަރު ދިނުމުން ގެޔަށް ޑެލިވާ ކުރަނީ ސަރުކާރުގެ މުވައްޒަފުންނެވެ.
ނަމަވެސް މުވައްޒަފުން އެކަށީގެންވާ މިންވަރަށް ނެތުމުން، ފެނާއި ކާބޯތަކެތީގެ އޯޑަރު ގެތަކަށް ޑެލިވާ ކުރުމުގައި ލަސްތައް ކުރިމަތިވަމުންދާ ކަމަށް ވެ އެވެ.
ޝަންހާއީގައި ހިންގާ މުހިއްމު 660 ކުންފުންޏެއްގެ މަސައްކަތް ނުހުއްޓާ ކުރިއަށް ގެންދެވޭނެ ގޮތް މަގުފަހި ކުރުމަށް ސަރުކާރުން ހާއްސަ ޓީމުތަކެއް ވަނީ ފޮނުވާފަ އެވެ.
ޗައިނާގައި ތަކެތި އުފެއްދުމުގެ ސިނާއަތް ވަގުތީ ގޮތުން ހުއްޓުމަކަށް އައުމުގެ ބިރު އެބަ އޮތެވެ. އެއީ ޝަންހާއީގެ ކުންފުނިތަކުގެ މަސައްކަތް ހުއްޓިފައި ވާތީ ބޭނުންވާ މުހިއްމު ސާނާމު ނުލިބޭނެ ކަމަށް ބެލެވޭތީ އެވެ.
ގިނަ ގައުމުތަކުން ކޮވިޑާ ގުޅިގެން އެޅި ފިޔަވަޅުތަކަށް ލުއިދީފައިވި ނަމަވެސް، ޗައިނާއިން ތަންފީޒު ކުރަނީ "ޒީރޯ ކޮވިޑް" ގެ ސިޔާސަތެކެވެ.
