ޖަރުމަނުވިލާތުގައި ދާހިލީ ހަނގުރާމައެއް ފަށައި ޑިމޮކްރެޓިކް ވެރިކަން ވައްޓާލަން ރޭވި ހަތަރު މީހުން ހައްޔަރުކޮށްފި އެވެ.
ޕްރޮސެކިއުޓަރުން ބުނީ އެ ހަތަރު މީހުން ރޭވީ ގައުމުގެ ކަރަންޓު އުފައްދާ ސްޓޭޝަންތަކަށް ގެއްލުން ދީ، މުޅި ގައުމުން ކަރަންޓު ކަނޑާލުމަށް ކަމަށެވެ.
އޭގެ އިތުރުން ހެލްތު މިނިސްޓަރު ރަހީނު ކުރަން ވެސް ރޭވި އެވެ. އެ ހަތަރު މީހުންނަކީ ވެސް ކަނާއަތު ފިޔައިގެ، ކޮވިޑަކީ ހަގީގަތެއް ކަމަށް ގަބޫލު ނުކުރާ ބަޔެކެވެ.
އެ ހަތަރު މީހުންނާ އެކު ރޭވުންތައް ހެދުމުގައި އުޅުނު ފަސް ވަނަ މީހަކު ހޯދުމުގެ މަސައްކަތް ފުލުހުން ދަނީ ކުރަމުންނެވެ. ތަހުގީގު ޓީމުން މިހާތަނަށް ވަނީ ތުހުމަތު ކުރެވޭ 12 މީހުން ފާހަގަކޮށްފަ އެވެ.
އެ ގްރޫޕުން ކަންކަން ރާވައި މުއާސަލާތު ކުރުމަށް ބޭނުން ކުރީ ޓެލެގްރާމެވެ. އެ ގްރޫޕުން ހަދައިގެން އުޅޭ ނަމަކީ "ޔުނައިޓެޑް ޕޭޓްރިއަޓްސް" އެވެ.
އެ މީހުން ހައްޔަރު ކުރުމަށް ބުދަ ދުވަހު އޮޕަރޭޝަންތަކެއް ހިންގި އިރު، އެ މީހުންނާ އެކު ގިނަ އަދަދެއްގެ ބަޑި ވެސް ހިފެހެއްޓި އެވެ. އޭގެ އިތުރުން ރަނާއި ގިނަ އަދަދެއްގެ ނަގުދު ފައިސާ ފެނުނެވެ. ޔޫރޯ އާއި ބޭރު ފައިސާއިން ހުރި ނަގުދު ފައިސާގެ އަގު 21،800 ޑޮލަރަށް އަރަ އެވެ.
