މަސްތުވާތަކެއްޗާ ދުރުހެލިވުމަށް ނެޝަނަލް ޑްރަގު އެޖެންސީގެ ފަރުވާ ޕްރޮގްރާމް ފުރިހަމަ ކުރާ ފަރާތްތަކަށް ވަޒީފާގެ ފުރުސަތު ހޯދައިދިނުމަށް އެ އެޖެންސީން އެމްޓީސީސީގެ އެޕްރެންޓިސްޝިޕް ޕްރޮގްރާމާއެކު މިއަދު އެމްއޯޔޫއެއްގައި ސޮއިކޮށްފި އެވެ.
ތިން އަހަރު ދުވަހުގެ އެ އެއްބަސްވުމުގެ އެންޑީއޭގެ ފަރުވާ ޕްރޮގްރާމް ނިންމުމަށްފަހު އަލުން މުޖުތަމައުއަށް ނިކުންނަ ފަރާތްތައް މުޖުތަމައުއަށް އަހުލުވެރިކުރުވުމަށް ކުރިޔަށްގެންދާ "ރީއިންޓްގެރޭޝަން އެންޑް އާފްޓާ ކެއާ" ޕްރޮގްރާމުގައި ބައިވެރިވާ ފަރާތްތަކަށް އެމްޓީސީސީގެ އެޕްރެންޓިސްޝިޕް ޕްރޮގްރާމުން ވަޒީފާގެ ފުރުސަތު ފަހިކޮށްދޭނެ އެވެ.
އެމްޓީސީސީން ބުނީ އެ ކުންފުނީގެ އެޕްރެންޓިސްޝިޕް ޕްރޮގްރާމުގައި ބައިވެރިވާ ފަރާތްތައް ހޮވާނީ އެންޑީއޭއިން ދޭ ލިސްޓެއްގެ މައްޗަށް ބިނާކޮށް އެޕްރެންޓިސްޝިޕް ޕްރޮގްރާމުގެ ޝަރުތު ފުރިހަމަވާނަަމަ އެވެ.
އެ ޕްރޮގްރާމުގައި ބައިވެރިވުމަށްފަހު އެމީހުން އުޅުމާއި އަހުލާގު އަދި ސުލޫކު ހުންނަ ގޮތާއި މަސައްކަތުގެ ރިވިއު ރިޕޯޓެއް ކޮންމެ މަހަކު އެމްޓީސީސީން އެންޑީއޭ އާ ހިއްސާކުރާނެ އެވެ.
މި އެމްއޯޔޫގައި އެމްޓީސީސީގެ ފަރާތުން ސޮއިކުރެއްވީ އެ ކުންފުނީގެ ސީއީއޯ އާދަމް އާޒިމް އެވެ. އަދި، އެންޑީއޭގެ ފަރާތުން ސޮއިކުރެއްވީ އެ އިދާރާގެ އެކްޓިން ސީއީއޯ މަރިޔަމް ހާލިދާ އެވެ.
އެމްޓީސީސީން ބުނީ މި ޕްރޮގްރާމަކީ ކުންފުނީގެ ސީއެސްއާރުގެ ދަށުން ހިންގާ ޕްރޮގްރާމެއް ކަމަށެވެ. އަދި، މިއަދު ސޮއިކުރި އެމްއޯޔޫގެ ބޭނުމަކީ އެ އެމްއޯޔޫގެ ދަށުން ތަމްރީނުވާ މީހުންނަކީ މުޖުތަމައުއަށް ބޭނުންތެރި ބައެއްގެ ގޮތުގައި ހެދުން ކަމަށެވެ.
