އިއްޔެ ހަވީރު މަސްވެރިންގެ ޕާކް ސަރަހައްދުން އުރީދޫގެ ފޯރިގަދަ މަސް ރޭހަށް ފަސް ޓީމެއް ފުރިއިރު އެ ތަނުގައި "އަންޑަޑޯގު" ނުވަތަ މޮޅުވުމުގެ ޗާންސު އެންމެ ދަށް ބަޔެއްގެ ގޮތުގައި ތިބީ "ސްޓެލްކޯ ކަނބަލުން"ގެ ޓީމެވެ. ނަމަވެސް، މަސް ކިރައި ނިމި ނަތީޖާތަކަށް ބަލާލިއިރު ހީކުރި ގޮތާ ހިލާފަށް ދެވަނަ ދުވަހުގެ ޗެމްޕިއަންކަން ހޯދީ އެ ޓީމުންނެވެ.
މުބާރާތުގެ ފައިނަލްގެ ޖާގައެއް ހޯދުމުގެ އިތުރުން އެ ޓީމުން މަސް ރޭހުގެ ތާރީހު ވެސް އިއްޔެ ބަދަލުކޮށްލީ އެވެ. މަސް ރޭހުގެ 11 ސީޒަން މިހާތަނަށް ބާއްވާފައިވާއިރު މިއިން ދުވަހަކު ޓީމަކުން ނުހޯދާ ވަރަށް އެ ޓީމުން ޕޮއިންޓު ހޯދި އެވެ. ޖުމްލަ 837.90 ޕޮއިންޓު ހޯދި އެވެ.
މަހަށް ފުރިއިރު އެ ޓީމުން މިފަދަ ނަތީޖާއެއް ނެރެފާނެ ކަމަށް ހީކުރީ މަދު ބަޔެކެވެ. ސަބަބުތަކެއް ނެތިއެއް ނޫނެވެ. މުބާރާތުގެ ޗެމްޕިއަންކަން ތިންފަހަރު ހޯދި "ޓީމް ސްޓެލްކޯ" ޓީމު ވެސް އިއްޔެ މަހަށް ފުރި އެވެ. އެއީ ސްޓެލްކޯ ފިރިހެން މުވައްޒަފުންގެ ޓީމެވެ.
އޭގެ އިތުރުން، ބީއެމްއެލް، ރޭންޖާސް، ރަތްމަސް، އަދި ނާލު ބައްތެލި ޓީމު ވެސް އިއްޔެ ވާދަކުރި އެވެ. މިއީ ވަރުގަދަ ޓީމުތަކެކެވެ.
"ސްޓެލްކޯ ކަނބަލުން" ގެ ޓީމުގެ އެންމެ ބޮޑު ތަފާތަކީ އެ ޓީމުގައި ގިނައީ ކުންފުނީގެ އަންހެން މުވައްޒަފުން ކަމެވެ. ދެ ފިރިހެނުން ފިޔަވައި ދެން ހުސް ތިބީ އަންހެނުންނެވެ. އާންމު ގޮތެއްގައި މަސް ރޭހުން އަންހެން ޓީމުތައް ފެންނަނީ ވަރަށް މަދުންނެވެ. އެހެންކަމުން އިއްޔެ އެ ޓީމުން ހެދި ރެކޯޑު ވަކިން ހާއްސަ ވެ އެވެ.
ދެވަނަ ދުވަހުގެ އެންމެ ގިނަ މަސް ބޭނީ ވެސް "ސްޓެލްކޯ ކަނބަލުން" ޓީމުގެ މެމްބަރެކެވެ. އެގޮތުން، އެ ޓީމުގެ ދެ މެމްބަރުންގެ ތެރެއިން އަޒީޒު 26 މަސް ބޭނި އެވެ.
ދެވަނަ ދުވަހުގެ ޗެމްޕިއަންކަން އެ ޓީމުން ހޯދުމުން 5،000ރ. ގެ ފައިސާގެ އިނާމު ހަވާލުކޮށްދެއްވީ ސައުދީ އަރަބިއްޔާއިން ރާއްޖެއަށް ކަނޑައަޅުއްވާފައި ހުންނަވާ އެމްބެސެޑަރެވެ.
"ސްޓެލްކޯ ކަނބަލުން" ގެ ޓީމު ތިބީ މިވަރުން ދޫކޮށްލާކަށެއް ނޫނެވެ. އެ ޓީމު އޮތީ ފައިނަލުގައި ވާދަކޮށް މަސް ރޭހުގެ މިއަހަރުގެ ޗެމްޕިއަންކަން ހޯދުމުގެ އަޒުމުގަ އެވެ. އިއްޔެ ނެރުނު ނަތީޖާއިން މިކަން ނުވެދާނެ ކަމަށް ގަބޫލުކުރެވެން ނެތެވެ. މިއީ ތަފާތު ޓީމެކެވެ. ނަތީޖާއިން އެކަން ސާބިތު ކޮށްދީފި އެވެ.
އެއް ވަނައަށް ދާ ޓީމަކަށް ބައިލައްކަ ރުފިޔާގެ އިނާމެއް ދޭ ގޮތަށް ކުރިއަށް ގެންދާ މަސްރޭހުގައި މިއަހަރު 23 ޓީމެއް ބައިވެރިވި އެވެ.
ކޮވިޑުގެ ބަލިމަޑުކަމާ ގުޅިގެން ދެ އަހަރުގެ މެދުކެނޑުމަކަށް ފަހު ބާއްވާ މި ހަރަކާތަށް ބޮޑު ތަރުހީބެއް ލިބިފައިވާތީ މިފަހަރު ރަޖިސްޓްރީވި ހުރިހާ ޓީމަކަށްވެސް ބައިވެރިވުމުގެ ފުރުސަތު އުރީދޫން ދިނެވެ.
