ލުބްނާނަށް ކުރިމަތިވެފައިވާ ޕާނުގެ ދަތިކަން ހައްލު ކުރަން 15 މިލިއަން ޑޮލަރު ހޭދަކުރަން ނިންމާފައިވާ ކަމަށް އިކޮނޮމީ މިނިސްޓަރު އަމީން ސަލާމް ވިދާޅުވެއްޖެ އެވެ.
ނަމަވެސް އޭނާ ވިދާޅުވީ އެ ފައިސާއިން ލިބޭނީ ވަގުތީ ހައްލެއް ކަމަށާއި އޭގެން ޕާން ހަމަޖެހޭނީ ދުވަސްކޮޅަކަށް ކަމަށެވެ.
ސަބްސިޑީ ފޯރުކޮށްދޭ މުދަލަށް ސަރުކާރުން ދޭ ކްރެޑިޓް ލައިން ދިގުދަންމާފައި ނުވާތީ މިދިޔަ ހޯމަ ދުވަހުން ފެށިގެން ލުބްނާނުގައި ވަނީ ޕާނުގެ ދަތިކަން ކުރިމަތިވެފަ އެވެ.
އެހެންވެ، ކޮންމެ ދުވަހަކު ވެސް ބޭކަރީތަކުގެ ބޭރުގައި ޕާން ގަންނަން ދިގު ކިޔުތައް ހަދާފައި އޮވެ އެވެ. މިކަން ދިމާވީ ރޯދަ މަހުގައި ކަމަށް ވާތީ އާއްމުން ދަނީ ހިތްހަމަނުޖެހުން ފާޅު ކުރަމުންނެވެ.
އިކޮނޮމީ މިނިސްޓަރު ސަލާމް ވިދާޅުވީ މައްސަލައަށް ވަގުތީ ހައްލެއް ގެނައުމުގެ ގޮތުން ސަރުކާރުން އިމްޕޯޓަރުންނަށް 15.3 މިލިއަން ޑޮލަރު ކްރެޑިޓްގެ ގޮތުގައި ދޫކުރާނެ ކަމަށެވެ.
"އެ ފިޔަވަޅު އެޅުމުން ދެ، ތިން ހަފްތާއަށް މައްސަލަ ހައްލު ވާނެ. އެ މުއްދަތުގައި އަނެއްކާވެސް ޖެހޭނީ މަސައްކަތް ކުރަން. އަޅުގަނޑުމެން ވާނީ 21 މިލިއަން ޑޮލަރުގެ ކްރެޑިޓް ލައިނަކަށް އެދިފައި."
އޭނާ ވިދާޅުވީ ޕާން ގަތުމަށް ރައްޔިތުންނަށް ދޭ ސަބްސިޑީ އުވާލަން ސަރުކާރުން ނުވިސްނާ ކަމަށާއި މަސައްކަތް ކުރަނީ ކާބޯތަކެތީގެ ރައްކާތެރިކަން ކަށަވަރު ކުރަން ވޯލްޑް ބޭންކާ އެކު 150 މިލިއަން ޑޮލަރުގެ އެއްބަސްވުމަކަށް ދިޔުމަށް ކަމަށެވެ.
ލުބްނާނަށް ބޭނުންވާ މެޖޯރިޓީ ކާބޯތަކެތި ޖެހެނީ އިމްޕޯޓް ކުރާށެވެ. އަދި އިމްޕޯޓަށް ފައިސާ ދައްކަނީ ޑޮލަރުންނެވެ. ނަމަވެސް 2019 ވަނަ އަހަރު އިގްތިސާދު ހުއްޓުމަކަށް އައި ފަހުން، ޑޮލަރު ލިބުން ވަރަށް ދައްޗެވެ.
ވޯލްޑް ފުޑް ޕްރޮގްރާމުން ބުނީ ލުބްނާން ޕައުންޑްގެ އަގު 90 ޕަސެންޓް ވެއްޓި، ކާބޯތަކެތީގެ އަގު 11 ގުނަ ބޮޑުވެފައިވާ ކަމަށެވެ.
ޕާނުގެ ދަތިކަން އިތުރަށް ގޯސްވީ ޔޫކްރެއިންގައި ހަނގުރާމަ ފެށުމުންނެވެ. ލުބްނާނަށް ބޭނުންވާ ފުށުގެ ބޮޑު ސަޕްލައި ގެންނަނީ ޔޫކްރެއިނުންނެވެ. އޭގެ އިތުރުން 2020 ވަނަ އަހަރު ބެއިރޫތު ބަނދަރުގައި ހިނގި ބޮޑު ގޮވުމުގައި ފުށް ރައްކާކުރާ ގުދަންތައް ހަލާކުވެފައި ވާތީ، ފުށް ރައްކާ ކުރެވޭނެ ގޮތެއް ވެސް ނެތެވެ.
