މަސްވެރިންގެ މުޒާހަރާއާ ގުޅިގެން ކުރެވުނު މަޝްވަރާތަކަށް ފަހު މިހާރު ކޫއްޑޫ ބަނދަރުގައި އޮތް ދޯނިފަހަރުގެ ހުރިހާ މަހެއް ކިރަން ނިންމައިފި އެވެ.
ރައީސް އޮފީހުގެ އޮފިޝަލަކު ވިދާޅުވީ މަސްވެރިންގެ ޝަކުވާތައް އަޑުއަހައި، ހައްލެއް ހޯދުމަށްޓަކައި މޯލްޑިވްސް ފިޝަރީޒް ކޮމްޕެނީ (މިފްކޯ) އެކު ކުރެވުނު މަޝްވަރާތަކަށް ފަހު ރޭ ދަންވަރު ދޯނި ފަހަރުން މަސް ކިރަން ވެސް ފަށާފައިވާ ކަމަށެވެ.
"މަސްވެރިންނަށް އެއްބަސްވެވޭ ފަދަ ގޮތަކަށް ސަރުކާރުން ވަނީ އިމްޕްލިމެންޓޭޝަން ޕްލޭނެއް ހަދާފަ. އަދި، މަސްވެރިންނަށް ކިއު އޯޑަރެއް ހަމަޖައްސައި އެ އޯޑަރާ އެއްގޮތައް މަސްކިރޭނެ އިންތިޒާމްތައް ކޫއްޑޫގައި ސަރުކާރުން މިހާރު ވަނީ ހަމަޖައްސާފަ. މި ޕްލޭންގެ ދަށުން މަސް ކިރޭނެ ތަރުތީބާއި ދުވަސް އެ މަސްވެރިންނަށް ވަނީ އަންގާފަ. މިވަގުތު ކޫއްޑޫ ފަޅުގައި އޮތް ހުރިހާ މަސް ދޯންޏެއްގެ ހުރިހާ މަސް ކިރޭނެ،" އޮފިޝަލް ވިދާޅުވި އެވެ.
ދެކުނުގެ އަތޮޅުތަކަށް މަސްވެރިކަން އާދަޔާ ހިލާފަށް ތިޔާގިވެ، ކޫއްޑޫގެ ކޯލްޑް ސްޓޯރޭޖަށް ނުތަކާވަރަށް ދޯނިފަހަރު މަސްބާނަން ފެށުމުން، ހަމަހަމަ ގޮތެއްގައި މަސް ގަތުމަށްޓަކައި ކޮންމެ ދޯންޏަކުން ފަސް ޓަނުގެ މަސް ކިރާ ގޮތަށް، މި މަހުގެ ހައެއްގައި މިފްކޯ އިން ހަމަޖެއްސި އެވެ.
އެއަށް ފަހުން މަސްވެރިން އައީ ހިތްހަމަ ނުޖެހުން ފާޅުކުރަމުންނެވެ. އެންމެ ފަހުން އިއްޔެ މަދު ދޯންޏެއްގެ ބަޔަކު މުޒާހަރާކޮށް ކޫއްޑޫގެ އޮޕަރޭޝަން ހުއްޓުވި އެވެ.
ދެކުނުގެ މަސްވެރިކަން ތިޔާގިވެފައިވާތީ މަސްވެރިން ބާނާ މަސް ގަނެވޭނެ ގޮތެއް ހޯދުމަށްޓަކައި ބޭރުގެ މަސްކިރާ ބޯޓެއް ގެންނަން ހަމަޖެހިފައިވާ ކަމަށް ފިޝަރީޒް މިނިސްޓަރު ޑރ. ހުސައިން ރަޝީދު ހޮނިހިރު ދުވަހު ވިދާޅުވި އެވެ.
ޖާގައިގެ ދަތިކަން ހައްލުކުރަން ބިޔަ މަޝްރޫއެއް ވަނީ ފަށައިފަ
މަސް ގަނެ، އެކްސްޕޯޓްކުރެވޭ މިންވަރު އިތުރުކުރުމަށްޓަކައި ދުވާލަކު 100 ޓަނު މަސް ފިނި ކުރެވޭ އަދި 300 ޓަނު މަސް ސްޓޯރު ކުރެވޭ ބޯޓަކާއި އަދި މަސް އެކްސްޕޯރޓް ކުރުމަށް 2400 ޓަނުގެ ކެރިއަރެއް ވަނީ މިފްކޯއިން މިދިޔަ އަހަރުގެ ޖުލައި މަހު ގެނަ އެވެ.
ކޫއްޑޫގެ ފަޅު ބޮޑުކޮށް އަދި ކޯލްޑް ސްޓޯރޭޖަށް 4،000 ޓަން އިތުރުކޮށް ޖުމްލަ 6،000 ޓަނަށް ކޯލްޑް ސްޓޯރޭޖް ބޮޑުކުރަން ވަނީ ނިންމައިފަ އެވެ. އަދި ފެލިވަރުގައި މުޅިން އަލަށް 4000 ޓަނުގެ ކޯލްޑް ސްޓޯރޭޖަކާއި 200 ޓަނުގެ ބްރައިން ފްރީންޒިން އަދި 80 ޓަނުގެ އާރުއެސްޑަބްލިޔޫ ސިސްޓަމެއް ގާއިމްކުރުމާއި، 3500 ޓަނުގެ ކާގޯ ވެސަލް ކައިރިކުރެވޭ ފެންވަރަށް ތަރައްގީ ކުރުމާއި، މަސްކިރާނެ ޖެޓީއަކާއި ފެލިވަރުގެ ބޭނުންތަކަށް އިތުރު ޖެޓީއެއް ތަރައްގީ ކުރުމުގެ އަމަލީ މަސައްކަތް ވަނީ ވަނީ ފަށައިފަ އެވެ. އަދި 100 ޓަނުގެ ޕްރޮސެސިސް ކޭނެރީއެއް ވެސް ފެލިވަރުގައި ގާއިމުކުރެ އެވެ.
މި މަޝްރޫއު ހިންގުމަށްޓަކައި ފެލިވަރުގެ ބިމަށް އިތުރުކުރެވޭ ފަސް ހެކްޓަރުގެ ބިން ހިއްކުމަށާއި، އަދި ކުރިން ދެންނެވި ޖެޓީތައް ހަދާ އެ ސަރަޙައްދުގެ ނެރާއި ފަޅު ފުންކުރުމަށް އެމްޓީސީސީއާ ޙަވާލުކޮށް މަސައްކަތް ވަނީ ފަށައިފަ އެވެ. ފެލިވަރުގެ ތަރައްގީގެ މަޝްރޫއުގެ އަގަކީ 113 މިލިޔަން ރުފިޔާ ކަމަށް މިފްކޯއިން ބުނެފައިވެ އެވެ.
