ހިޔާ މަޝްރޫއުގެ ދަށުން ހުޅުމާލޭގެ ދެވަނަ ފިޔަވަހީގެ ބިމެއް ހިއްކައި އެ ބިމުގައި އިމާރާތް ކުރި ފްލެޓްތައް ލިބޭ ފަރާތްތަކުގެ އަމިއްލަ ހަރަދުގައި ފިނިޝިން ނިންމަން ޖެހޭ ގޮތަށް ހަވާލުކުރިއިރު، ފިނިޝިން ނިންމައިދޭން ހަވާލު ކުރި ބައެއް ކުންފުނިތަކުން ހިޔާނާތްތެރިވި މައްސަލައަށް މަޖިލީހުގައި ބަހުސް ނުކުރީ މަޖިލީހުގެ ބައެއް މެންބަރުންނާއި އެ ގްރޫޕްތަކާ ގުޅުން އޮންނާތީ ކަމަށް ތުހުމަތު ކޮށްފި އެވެ.
ރައްޔިތުންގެ މަޖިލީހުގެ މިއަދުގެ ޖަލްސާއަށް ފިނިޝިން ނިންމައިނުދޭ ކުންފުނިތަކުގެ މައްސަލަ ބަލަން ސަރުކާރަށް ގޮވާލައި ކުއްލި މައްސަލައެއް ހުށަހެޅުއްވީ ޕީއެންސީގެ ޕާލިމެންޓްރީ ގްރޫޕްގެ ލީޑަރު އަދި މަޑުއްވަރީ ދާއިރާގެ މެންބަރު އާދަމް ޝަރީފް އުމަރެވެ. އެ ކުއްލި މައްސަލައަށް ބަހުސް ކުރަން ފާހެއް ނުވެ އެވެ. ފާސް ކުރަން އެންމެ ހަ މެންބަރަކު ވޯޓު ދިންއިރު، 29 މެންބަރަކު ވޯޓު ދިނީ ބަހުސް ނުކުރުމަށެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދު އެއްބާރުލުން ދެއްވައިގެން މަޖިލީހުގެ އިދާރާގައި ޕީޕީއެމް ޕީއެންސީގެ ޕާލިމެންޓްރީ ގްރޫޕުން މިއަދު ބޭއްވި ނޫސްވެރިންގެ ބައްދަލުވުމުގައި އާދަމް ޝަރީފް ވިދާޅުވީ ހިޔާ ފްލެޓްތަކުގެ ކުލި އިންތިހާއަށް ބޮޑުވެ، އަމިއްލަ ހަރަދުގައި ފިނިޝިން ނިންމަން ޖެހުނު އެ ރައްޔިތުންނަށް ލިބިގެން ދިޔައީ އިއާދަ ނުކުރެވޭ ވަރުގެ ބޮޑު ގެއްލުމެއް ކަމަށެވެ.
"ފިނިޝިން ނިންމައި ނުދީ، އަދި ރައްޔިތުންގެ އަތުން ނެގި ފައިސާ އަނބުރާ ނުދީ، ހިޔާނާތްތެރިވި ކުންފުނިތައް، ގްރޫޕްތައް ސަރުކާރުން ހޯދަން ޖެހޭ، އަދި އެ ކުންފުނިތަކާއި މެދު ފިޔަވަޅު އެޅެން ޖެހޭ،" އާދަމް ޝަރީފްގެ ކުއްލި މައްސަލާގައި ހިމެނޭ ކަންކަން އޭނާ ވިދާޅުވި އެވެ.
"... ނަމަވެސް މި ކުންފުނިތަކާއި ކުންފުނިތަކުގައި އުޅޭ މީހުނާއި ސަރުކާރާއި، އަދި ރައްޔިތުންގެ މަޖިލީހުގެ އެމްޑީޕީގެ ބައެއް މެންބަރުންނާ ގުޅިފައި ތިބުމުން ރައްޔިތުންގެ މަޖިލީހުގައި ވެސް މި މައްސަލައަށް ބަހުސް ނުކޮށް މިއަދު ބޭރުކޮށްލީ،" ސަރުކާރުގެ އިސް ބޭފުޅުންނާއި އެމްޑީޕީގެ ޕާލިމެންޓްރީ ގްރޫޕްގެ މެންބަރުންނަށް ތުހުމަތު ކުރައްވަމުން އާދަމް ޝަރީފް ވިދާޅުވި އެވެ.
ރައްޔިތުންނާއި އެހާ ގުޅުން ހުރި މައްސަލަތަކަށް ބަހުސް ނުކުރަން އެމްޑީޕީގެ ޕާލިމެންޓްރީ ގްރޫޕުން ވިޕްލައިނެއް ނެރެފައި އޮތުމުން މަޖިލީހުގެ ރައީސް ނަޝީދު ވެސް މިއަދު ކަންބޮޑުވުން ފާޅު ކުރެއްވި އެވެ. ނަޝީދު ވިދާޅުވީ ރައްޔިތުންގެ ކަންބޮޑުވުން އެހާ ބޮޑަށް އޮތް މައްސަލަތަކުގައި، ކޮންމެ ފަރާތަކުން ހުށަހެޅިއަސް، އެ ކަންކަމަށް ބަހުސް ކުރަންވާނެ ކަމަށެވެ.
ހިޔާ ފްލެޓްތައް ދޫކުރި މީހުންގެ އަތުން މި މަހުން ފެށިގެން ކުލި ނަގަން ވަނީ ފަށައިފަ އެވެ. ފްލެޓްތައް ލިބުނު މީހުންގެ އަތުން ކުލި ނަގަން މި ފެށީ ފްލެޓް ދޫކުރިތާ ހަތް މަސް ފަހުންނެވެ. ނަމަވެސް ފިނިޝަން އަމިއްލަ ހަރަދުގައި ކުރަން ޖެހި، ގިނަ ފްލެޓްތަކުގެ ފިނިޝިން ދިން ކުންފުނިތަކުން ކަންތައް ކުރި ގޮތުން، ފްލެޓްތަކުގެ ކުލި ފަސް ކޮށްދޭން އަނެއްކާ ވެސް ހިޔާ ޔުނިއަނުން އެދިފައިވެ އެވެ. އެ ޔުނިއަން އަކީ ހިޔާ ފްލެޓްތަކުގައި ދިރިއުޅޭ މީހުން ތަމްސީލް ކުރާ ޔުނިއަން އެކެވެ.
ހިޔާ ފްލެޓަކުން ކޮންމެ މަހަކު މެއިންޓަނަސް ފީއާއި އެކު ޖުމުލަ 8،500 ރ. ކުލީގެ ގޮތުގައި ނަގަ އެވެ. އެއީ ވަރަށް ބޮޑު އަދަދެއް ކަމަށް ބުނެ ފްލެޓްތައް ލިބުނު ގިނަ ފަރާތްތަކުގެ ކަންބޮޑުވުން އެބަ އޮތެވެ. ނަމަވެސް އެ އަދަދަށް ކުލި ނުނަގައި އެޗްޑީސީން ނަގާފައިވާ ލޯނުތައް އަނބުރާ ނުދެއްކޭނެ ކަމަށް އެ ކުންފުނިން ބުނެފައިވެ އެވެ.
