ފިލިޕީންސްއަށް އެރި ތޫފާން މެގީގެ ސަބަބުން ފެންބޮޑުވެ ބިންގަނޑު ކަނޑާއިގެން ދިޔުމުގެ ހާދިސާތައް ހިނގައި، މިހާތަނަށް 25 މީހުން މަރުވެއްޖެ އެވެ.
އެ ގައުމުގެ އިރުމަތީ އަދި ދެކުނު އައްސޭރިފަށުގައި ހާލުގައި ޖެހިފައި ތިބި މީހުން ސަލާމަތް ކުރުމުގެ މަސައްކަތް ރެސްކިއު ޓީމުތަކުން އަންގާރަ ދުވަހު ދަނީ ކުރަމުންނެވެ.
މެގީ ފިލިޕީންސްއަށް އެރީ ގަޑިއަކު 65 ކިލޯމީޓަރުގެ ގަދަ ވަޔާ އެކު މިދިޔަ އާދީއްތަ ދުވަހު އެވެ. މިއީ ކޮންމެ އަހަރަކު ވެސް އެވްރެޖުކޮށް 10 ތޫފާން ކުރިމަތިވާ ފިލިޕީންސްއަށް މި އަހަރުގެ އެރި ފުރަތަމަ ތޫފާނެވެ.
މިދިޔަ ޑިސެމްބަރު މަހު ފިލިޕީންސްއަށް ތޫފާން ރާއީގެ ސަބަބުން 375 މީހުން މަރުވެ، 500،000 އަށް ވުރެ ގިނަ މީހުން ހާލުގައި ޖެހުނެވެ.
އެއީ 2021 ވަނަ އަހަރު ފިލިޕީންސްއަށް ކުރިމަތިވި އެންމެ ބާރުގަދަ ތޫފާނެވެ. ސައިންސްވެރިން ބުނާ ގޮތުގައި ތޫފާން ކުރިމަތިވުން އިތުރުވެ، ބާރު ގަދަވާން މެދުވެރިވަނީ މޫސުމީ ބަދަލުގެ ސަބަބުންނެވެ.
