ހިޔާ ފްލެޓުތައް ކައިރީގައި ކާބޯތަކެތި ވިއްކުމުގެ ހިދުމަތް ދެމުން ގެންދާ ވަގުތީ ކެފޭތައް ހުސްކުރުން ދިން މުއްދަތު އިއްޔެ ހަމަވީއިރު ވެސް އެތަންތަން ނުނަގާ އެބަހުއްޓެވެ.
މިތަންތަނުގައި ހުރި ގޮނޑިތަކާއި މޭޒުތައް ނަގާ ހިދުމަތް ދިނުން ހުއްޓާލަން ހައުސިން ޑިވަލޮޕްމަންޓް ކޯޕަރޭޝަން (އެޗްޑީސީ)އިން އެންގީ މިދިޔަ ހަފުތާގެ ތެރޭގަ އެވެ. ނަމަވެސް މިއަދާ ހަމައަށް އެއިން އެއްވެސް ތަނެއް ހުސްކޮށްފައެއް ނުވެ އެވެ.
މިތަންތަނުން ހިދުމަތް ދިނުން ހުއްޓާލަން އެޗްޑީސީން އެންގީ ހިޔާ ފްލެޓު ސަރަހައްދަކީ ކޮންސްޓްރަކްޝަން ސައިޓަކަށް ވެފައި، ކާބޯތަކެތީގެ ހިދުމަތް ދޭން ޖެހޭ ތަންތަނުގައި ހުންނަންޖެހޭ ސާފުތާހިރުކަމުގެ މިންގަނޑުތަށް ކަށަވަރު ނުކުރެވޭތީ ކަމަށް ބުނެ އެވެ.
މިތަންތަނުގައި އާންމުކޮށް ވިއްކަނީ މޭވާ އާއި ތަރުކާރީ އާއި ތައްޔާރީ ކާނާގެ އިތުރުން ހެދިކާގެ ބާވަތްތަކެވެ. ބައެއް ތަންތަނުން ހޫނު ކޮފީ އާއި ސައި ވެސް ލިބެ އެވެ.
މިހެން ހުންނަ ތަންތަން އެންމެ ކުރީކޮޅު ވެސް އެޗްޑީސީން މަނާކުރި އެވެ. ނަމަވެސް އޭރު މި ސަރަހައްދުގައި އެހެން ފިހާރަތަކެއް ނެތުމާ އެކު އެކަމާ ފިޔަވަޅު ނާޅާ ވަނީ މަޑުޖައްސާލާފަ އެވެ.
ދިން މުހުލަތަށް ތަން ހުސްކޮށްފައި ނުވި ނަމަވެސް އިތުރު މުއްދަތެއް ދިނުމެއް ނެތި އެޗްޑީސީން ކުރިން ބުނި ގޮތަށް މިތަންތަން ހުސްކުރުމުގެ މަސައްކަތް ކުރިޔަށް ދާނެ ކަމަށް މައުލޫމާތު ލިބެ އެވެ.
