ކުރީގެ ކްރިކެޓް ތަރި، އުމުރުން 69 އަހަރުގެ އިމްރާން ހާން ޕާކިސްތާނުގެ ބޮޑު ވަޒީރުކަމުން ވަކި ކުރުމާ އެކު، އާ ބޮޑު ވަޒީރަކު ހޮވުމުގެ މަސައްކަތަށް ހޯމަ ދުވަހު ޕާލިމެންޓުގެ ބައްދަލުވުމެއް އޮންނާނެ އެވެ.
ރޭ ދަންވަރު ޕާލިމެންޓުގެ 342 މެމްބަރުންގެ ތެރެއިން އިދިކޮޅު ޕާޓީތަކާ އެއް ކޮޅަށް ވޯޓުދީ، އިމްރާން ހާންގެ އިތުބާރު ނެތް ކަމަށް ބުނީ 174 މެމްބަރުންނެވެ. އިދިކޮޅު ލީޑަރު ޝެހްބާޒް ޝަރީފް ވިދާޅުވީ ބޮޑު ކާރިސާއަކުން ގައުމުން މިނިވަން ކުރެވިއްޖެ ކަމަށެވެ.
"މުޅިން އާ ފަތިހަކަށް އަލިވިލިއްޖެ. [ޕާޓީތަކުގެ] މި ގުޅުމާ އެކު ޕާކިސްތާނު އަލުން ބިނާ ކުރެވޭނެ،" އުމުރުން 70 އަހަރުގެ ޝެހްބާޒް ޕާލިމެންޓުގެ ރޭ ވިދާޅުވި އެވެ.
ރިޕޯޓުތައް ބުނާ ގޮތުން ހޯމަ ދުވަހު ޕާލިމެންޓުގައި ކުރިއަށްދާ ބައްދަލުވުމުގައި އާ ބޮޑު ވަޒީރުކަމުގެ މަގާމަށް ކަނޑައަޅާނެ ކަމަށް އެންމެ ބޮޑަށް ބެލެވޭ ކެންޑިޑޭޓަކީ ޝެހްބާޒް އެވެ.
ޝެހްބާޒްއަކީ ޕާކިސްތާނުގައި މީގެ ކުރިން ތިން ފަހަރަށް ބޮޑު ވަޒީރުކަން ކުރައްވާފައިވާ ނަވާޒް ޝަރީފްގެ ކޮއްކޯފުޅެވެ. އެނެލިސްޓުން ދެކޭ ގޮތުގައި ނަވާޒްއާ ހިލާފަށް ޝެހްބާޒްއަކީ ޕާކިސްތާނުގެ ނުފޫޒު ގަދަ އަސްކަރިއްޔާއާ ރަނގަޅު ގުޅުމެއް އޮންނަ ބޭފުޅެކެވެ.
ގާތްގަނޑަކަށް 220 މިލިއަން މީހުންގެ އާބާދީއެއް އޮންނަ ނިޔުކްލިއާ ބާރު، ޕާކިސްތާނުގެ ހާރިޖީ އަދި ދިފާއީ ސިޔާސަތުގައި އަސްކަރިއްޔާގެ ނުފޫޒު ވަރަށް ބޮޑެވެ. އެހެންކަމުން، ބަގާވާތް ކުރުމުގެ ދިގު ތާރީހެއް އެ ގައުމުގައި އެބަ އޮތެވެ.
މީގެ ކުރިން ޕާކިސްތާނުގެ އަސްކަރީ ވެރިންގެ ސީދާ ނުފޫޒާއި ބާރުގެ ބޭނުންކޮށް، ތިން ފަހަރަށް ސަރުކާރު ވައްޓާލާފައިވެ އެވެ. އިނގިރޭސިވިލާތުގެ އަތުން 1947 ވަނަ އަހަރު ޕާކިސްތާނަށް މިނިވަންކަން ލިބުނު ފަހުން، އެއްވެސް ބޮޑު ވަޒީރަކަށް ފަސް އަހަރުގެ ދައުރެއް ފުރިހަމަ ކުރެއްވޭ ގޮތެއް ނުވެ އެވެ.
ޝެހްބާޒް ނިސްބަތްވެވަޑައިގަންނަވާ ޝަރީފް އާއިލާއަކީ ޕާކިސްތާނުގެ ބާރުގަދަ އަދި މުއްސަނދި އާއިލާ އެކެވެ. އެމަނިކުފާނަށް މަގްބޫލުކަން ލިބިފައި ވަނީ ކޮންމެ ކަމެއް ވެސް ކާމިޔާބު ވާނެ ކަމުގެ ވިސްނުމުގައި ގެންގުޅުއްވާ އިދާރީ ސްޓާއިލްގެ ސަބަބުންނެވެ.
މީގެ ކުރިން ޕަންޖާބް ޕްރޮވިންސްގެ ޗީފް މިނިސްޓަރަކަށް ޝެހްބާޒް ހުންނެވި އިރު، ރައްޔިތުންނަށް އެކަން ފެނި ގިނަ ބަޔެއްގެ ތައުރީފު ލިބުނެވެ.
އެ ޕްރޮވިންސްގެ ޗީފް މިނިސްޓަރުގެ ގޮތުގައި ސިޔާސީ ކެރިއަރު ޝެހްބާޒް ފެއްޓެވީ 1997 ވަނަ އަހަރު އެވެ. ނަމަވެސް އަސްކަރީ ބަގާވާތެއްގައި އެމަނިކުފާނު ޖަލުގައި ބަންދު ކުރި އެވެ. އޭގެ ފަހުން 2000 ވަނަ އަހަރު ސައުދީ އަރަބިއްޔާއަށް އަރުވާލި އެވެ.
ޝެހްބާޒް އެނބުރި ގައުމަށް ވަޑައިގެން، ޕަންޖާބް ޕްރޮވިންސްގައި ސިޔާސީ މަސައްކަތް އަލުން ފެއްޓެވީ 2007 ވަނަ އަހަރު އެވެ.
ޕަންޖާބް ޕްރޮވިންސްގެ ތަރައްގީއަށް ޗައިނާއާ ގުޅިގެން ގިނަ މަޝްރޫއުތަކެއް ހިންގެވި ޝަހްބާޒް މިދިޔަ ހަފްތާގައި ވިދާޅުވީ އެމެރިކާއާ އެކު ގާތް ގުޅުމެއް އޮތުން ޕާކިސްތާނަށް މުހިއްމު ކަމަށެވެ.
އެއީ ނިމިދިޔަ އިމްރާން ހާންގެ ސަރުކާރާ މުޅިން ތަފާތު ސިޔާސަތެކެވެ. އެމެރިކާއާ ދުރު ވިސްނުމެއް ގެންގުޅުއްވި، އިމްރާން ހާން ގެންދެވީ ރަޝިއާ އަދި ޗައިނާއާ ގާތް ގުޅުމެއް ބިނާ ކުރަމުންނެވެ.
ޕާކިސްތާނުގެ އާ ބޮޑު ވަޒީރުގެ މަގާމު ލިބިވަޑައިގެންފި ނަމަ، ޝެހްބާޒްއަށް ކުރިމަތިވެވަޑައިގަންނަވާނެ އެންމެ ބޮޑު މަސައްކަތަކީ އިގްތިސާދު ހަމައަކަށް އެޅުވުމެވެ.
އެނެލިސްޓުން ދެކޭ ގޮތުގައި ފުރިހަމަ މިނިވަންކަމާ އެކު މަސައްކަތް ކުރުމުގެ ފުރުސަތު އެމަނިކުފާނަކަށް ނެތެޗެ. އެއީ އިދިކޮޅު ކޯލިޝަނުގައި ހިމެނޭ އެހެން ޕާޓީތަކާއި ބޭބޭފުޅު ނަވާޒްގެ ބަސް ގަބޫލުކުރަން ފިއްތުންތައް އަންނާނެތީ އެވެ.
ނަވާޒް (ކ) ދަރިފުޅު މަރިޔަމް އަދި ޝެހްބާޒްއާ އެކު.
ކޮރަޕްޝަނުގެ ކުށް ސާބިތުވެ ޖަލުގައި ހުންނެވި ނަވާޒް ސިއްހީ ފަރުވާއަށް ދޫކޮށްލުމުން، މީގެ ދެ އަހަރު ކުރިން ލަންޑަނަށް ވަޑައިގެން އަދިވެސް ދިރިއުޅުއްވަނީ އެ ތަނުގަ އެވެ.
އިދިކޮޅު ޕާކިސްތާން މުސްލިމް ލީގް-ނަވާޒް (ޕީއެމްއެލް-އެން) ގެ ލީޑަރު ކަމަށް ޝެހްބާޒް ވަޑައިގެންނެވީ 2017 ވަނަ އަހަރު ނަވާޒްގެ މައްޗަށް ކުށް ސާބިތުވުމުންނެވެ.
އެއީ ކޮރަޕްޝަނާއި ނުހައްގު މުއްސަނދިކަން ސިއްރުން ފޮރުވައިގެން އުޅޭ ގިނަ ލީޑަރުންނާއި ނުފޫޒު ގަދަ ފަރާތްތަކުގެ ވާހަކަތައް ހާމަކުރި ޕެނެމޭ ޕޭޕާޒްގައިވާ ކަންކަމާ ގުޅިގެން އައި ހުކުމެކެވެ. ނަމަވެސް ޝަރީފް އާއިލާ އާއި އެ އާއިލާގެ ސަޕޯޓަރުން ބުނީ އެއީ ހަގީގަތެއް ނެތް، ސިޔާސީ ގޮތުން އުފުލާ ތުހުމަތުތަކެއް ކަމަށެވެ.
ނަވާޒްގެ އިތުރުން ޝެހްބާޒް އަށް ވެސް ކޮރަޕްޝަންގެ ތުހުމަތު ކުރެވެ އެވެ. ނަމަވެސް ޝެހްބާޒްގެ މައްޗަށް އެއްވެސް ކަމެއް ސާބިތުވެފައެއް ނުވެ އެވެ.
އާ ބޮޑު ވަޒީރަށް މަގާމުގައި ހުންނެވޭނީ އޮކްޓޯބަރު 2023 ވަނަ އަހަރާ ހަމައަށެވެ. އެއަށްފަހު އަނެއްކާވެސް ރައްޔިތުންގެ މެދުގައި ވޯޓެއް އޮންނާނެ އެވެ.
