ލިވަޕޫލް (އޭޕްރީލް 10) - އިނގިރޭސި ޕްރިމިއާ ލީގުގައި ރޭ އެވަޓަން އަތުން 1-0 އިން މެންޗެސްޓާ ޔުނައިޓެޑް ބަލިވި މެޗަށް ފަހު އެ ޓީމުގެ ތަރި ކްރިސްޓިއާނޯ ރޮނާލްޑޯ، އެވަޓަން ސަޕޯޓަރެއްގެ ފޯނު ބިން މައްޗަށް ހޫރާލައި، ހަލާކުކޮށްލުމަށް ފަހު އެ ކަމަށް މާފަށް އެދިއްޖެ އެވެ.
އެވަޓަން ދަނޑުގައި ކުޅުނު މެޗަށް ފަހު ރޮނާލްޑޯ ޓަނަލް ތެރެއިން ވަންނަން ދިޔަ ވަގުތު އޭނާ އެވަޓަން ސަޕޯޓަރެއްގެ ފޯނު ބިން މައްޗަށް އެއްލާލާ މަންޒަރު ފެނުނެވެ. ރޮނާލްޑޯ އެ ފޯނު އެއްލާލީ އޭނާގެ ވީޑިއޯ އެއް ކުރަން އެވަޓަންގެ ސަޕޯޓަރު މަސައްކަތްކުރި ވަގުތުގައި ހިތްހަމަނުޖެހިގެން ކަމަށް މަންޒަރު ދުށް އެވަޓަންގެ އެހެެން ސަޕޯޓަރެއް ވަނީ މީޑިއާ އަށް މައުލޫމާތު ދީފަ އެވެ.
އެ ވީޑިއޯ މެއިންސްޓްރީމް މީޑިއާތަކުގައި ރިޕޯޓްކުރިއިރު، ސޯޝަލް މީޑިއާގައި ވެސް ވަނީ ވައިރަލްވެފަ އެވެ. އެ ސަޕޯޓަރު ވަނީ އެވަޓަން އާއި މާސީސައިޑް ފުލުހުންގެ ސަމާލުކަމަށް މި ހާދިސާ ގެނެސްފަ އެވެ.
މައްސަލަ ހޫނުވުމާ ގުޅިގެން އުމުރުން 37 އަހަރުގެ ރޮނާލްޑޯ ވަނީ ސޯޝަލް މީޑިއާގައި އާންމުކުރި ބަޔާނެއް މެދުވެރިކޮށް އެ ސަޕޯޓަރު ކިބައިން މާފަށް އެދިފަ އެވެ.
ރޮނާލްޑޯ ބުނީ ބައެއް ކަހަލަ ވަގުތުތަކީ ހާލަތުގެ ގޮތުން ޖަޒުބާތުގައި ޖެހިގެން އެންމެ ރަނގަޅަށް ކަންކުރެވޭނެ ފަހަރުތަކެއް ނޫން ކަމަށެވެ. އެންމެނަށް އިހުތިރާމްކުރުމާއި ކުޑަކުދިންނާއި އެހެން މީހުންނަށް މިސާލު ދެއްކުމުގެ ރީތި އާދައިގެ މަތީގައި ސާބިތުވެ ހުރުމަކީ ފުޓްބޯޅައިގެ ތެރެއިން ކުރަން ޖެހޭނެ ކަމެއް ކަމަށް ވެސް ރޮނާލްޑޯ ބުނެފައިވެ އެވެ.
"އަހަންނަށް އުޅެވުނު ގޮތުން މާފަށް އެެދެން. ދެން، އަހަރެން ބޭނުން އެކަން ވާން އޮތިއްޔާ އެ ސަޕޯޓަރު އޯލްޑް ޓްރެފޯޑަށް މެޗެއް ބަލަން ދައުވަތު ދޭން. އެއީ ފެއާޕްލޭ އާއި ސްޕޯޓްސްމެންޝިޕްގެ މިސާލެއްގެ ގޮތުން،" ރޮނާލްޑޯ ބުންޏެވެ.
ޔުނައިޓެޑްގެ ތަރުޖަމާނު މީޑިއާ އަށް އާންމުކުރި ބަޔާނެއްގައި ބުނެފައިވަނީ ރޮނާލްޑޯ، އެވަޓަން ސަޕޯޓަރުގެ ފޯނު އެއްލާލި މައްސަލައިގައި ފުލުހުންނަށް ޖަވާބުދާރީވާން ޖެހޭ ކަންކަމުގައި ކްލަބްގެ ފުރިހަމަ އެއްބާރުލުން ލިބޭނެ ކަމަށެވެ.
އިއްޔެގެ މެޗުގެ ދެ ވަނަ ހާފްގެ ފަހުކޮޅުގައި އެއްލުމަކަށް ދިޔަ ބޯޅައެއް ދަނޑު ތެރެއަށް އައުމުން އެ ބޯޅަ ދިނުމުގެ ބަދަލުގައި އެވަޓަން ބެންޗަށް ގަސްދުގައި ބާރަށް ބޯޅަ ޖެހުމުން މެޗުގެ ރެފްރީ ޖޯން މޮސް ވަނީ ރޮނާލްޑޯ އަށް ރީނދޫ ކާޑެއް ދައްކައިފަ އެވެ.
މެޗަށް ފަހު ރޮނާލްޑޯ އަޅައިގެން ހުރި ކަށިމަތިނެގިއިރު، މެޗުގެ ތެރެއިން އެވަޓަން ކުޅުންތެރިއަކު ފަރާތުން ހިނގި ފައުލެއްގައި ރޮނާލްޑޯ ކަށިމަތިން ލޭ އޮހޮރިފައި ހުރި މަންޒަރު ފެންނަ ފޮޓޯ ވަނީ ސޯޝަލް މީޑިއާގައި ދަައުރުވެފަ އެވެ.
