ލިވަޕޫލް (އޭޕްރީލް 9) - އިނގިރޭސި ޕްރިމިއާ ލީގުގެ ގަދަ ހަތަރެއްގެ ރޭހުގައި އޮތް މެންޗެސްޓާ ޔުނައިޓެޑް 1-0 އިން ބަލިކޮށް ރެލިގޭޝަނުން އަރައިގަންނަން މަސައްކަތް ކުރަމުން އަންނަ އެވަޓަން އިން މުހިންމު ތިން ޕޮއިންޓާ އެކު ހިންދެމިލައިފި އެވެ.
ލީގުގެ ގަދަ ހަތަރެއްގައި ނިންމައި، އަންނަ ސީޒަނުގެ ޗެމްޕިއަންސް ލީގަށް ކޮލިފައިވުމުގެ އުންމީދުގައި މަސައްކަތް ކުރަމުން އައި ޔުނައިޓެޑް މިރޭ އެވަޓަން ދަނޑުގައި ބަލިވުމުން ވަނީ ހާސްކަން ކުރިމަތިވެފަ އެވެ.
ޔުނައިޓެޑް މި ވަގުތު އޮތީ ލީގުގެ ހަތް ވަނައިގަ އެވެ. އެއީ 31 މެޗުން 51 ޕޮއިންޓާ އެކު އެވެ. ހަ ވަނައިގައި އޮތް ވެސްޓް ހޭމް ޔުނައިޓެޑަށް ވެސް ވަނީ 31 މެޗުން 51 ޕޮއިންޓް ލިބިފަ އެވެ. ފަސް ވަނައިގައި އޮތް އާސެނަލަށް 29 މެޗުން 54 ޕޮއިންޓް ލިބިފައިވާއިރު، ހަތަރެއްގައި އޮތް ޓޮޓެންހަމް ހޮޓްސްޕާސް އަށް ވަނީ 30 މެޗުން 54 ޕޮއިންޓް ލިބިފަ އެވެ. އާސެނަލާއި ޓޮޓެންހަމުން މެޗު ހަމަކުރާއިރު، ޔުނައިޓެޑަށް ވުރެ ނުވަ ޕޮއިންޓަށް ކުރިއަށް ޖެހުމުގެ ފުރުސަތު އެބައޮތެެވެ.
ޔުނައިޓެޑްގެ ރޮނާލްޑޯ (ކ) އާއި ބްރޫނޯ ފެނާންޑޭސް މެޗުގެ ތެރެއިން.-- ފޮޓޯ: އޭއެފްޕީ
އަނެއްކޮޅުން އެވަޓަންގެ ކޯޗު ފްރޭންކް ލަމްޕާޑަށް ވަނީ މިރޭގެ މޮޅާ އެކު ހިތްހަމަޖެހުމެއް ލިބިފަ އެވެ. މިރޭގެ މެޗަށް އައިއިރު، ލަމްޕާޑްގެ ކޯޗުކަމުގައި ލީގުގައި އެވަޓަން ކުޅުނު 12 މެޗުގެ ތެރެއިން އަށް މެޗުން ވަނީ ބަލިވެފަ އެވެ. އެންމެ ފަހުން ލީގުގައި އެވަޓަން އިން ކުޅުނު ހަތް މެޗުގެ ތެރެއިން ހަ މެޗުން ބަލިވިއިރު، މި ހަފްތާގައި ބާންލީގެ އަތްދަށުވީ އެވަޓަން ލީޑުގައި އޮއްވައި ބާންލީ ފަހަތުން އަރައި ޖެހި ގޯލުތަކުން 3-2 އިންނެވެ. އެ ނަތީޖާ ހަނދާން ނައްތާލަން މިރޭގެ މެޗުން މޮޅުވާން އެވަޓަން އަށް އޮތީ މަޖުބޫރުވެފަ އެވެ.
ޖެހިޖެހިގެން ލީގުގައި އަމިއްލަ ދަނޑުގައި ހޯދި ދެ ވަނަ މޮޅާ އެކު އެވަޓަން ލީގުގެ 17 ވަނައިގައި އޮތީ 30 މެޗުން 28 ޕޮއިންޓާ އެކު އެވެ. ލީގުގެ 18 ވަނައިގައި އޮތް ބާންލީ އަށް 29 މެޗުން ވަނީ 24 ޕޮއިންޓް ލިބިފަ އެވެ.
ގުޑިސަން ޕާކުގައި މިރޭ ކުޅުނު މެޗު ފަށައިގެން ކުރީކޮޅުގައި ޔުނައިޓެޑްގެ މާކަސް ރެޝްފޯޑް ޖެހި ނުރައްކާތެރި ދެ ހަމަލާއެއް އެވަޓަން ކީޕަރު ޖޯޑަން ޕިކްފޯޑް ވަނީ މަތަކޮށްފަ އެވެ. މެޗުގައި ފެނިގެންދިޔަ ހަމަައެކަނި ގޯލު އެވަޓަން އިން ޖެހީ 21 އަހަރުގެ އެންތަނީ ގޯޑަން އެވެ. މެޗުގެ 27 ވަނަ މިނިޓްގައި އޭރިއާބޭރުން ގޯޑަން ޖެހި ބޯޅަ ގޯލަށް ވަނީ ޔުނައިޓެޑްގެ ކެޕްޓަން، ހެރީ މެގުއާ ގައިގައި ޖެހިފަ އެވެ. އެވަޓަން އަށް ލީޑުފުޅާކޮށްދޭން ރިޗާލިސަން ޖެހި ބޯޅަ ޔުނައިޓެޑްގެ ކީޕަރު ޑޭވިޑް ޑެހެއާ ވަނީ މަތަކޮށްފަ އެވެ.
މެޗުގައި ޖުމްލަކޮށް ޔުނައިޓެޑަށް ވުރެ ރަނގަޅަށް މަސައްކަތް ކޮށްގެން ކުޅުނީ އެވަޓަން އިންނެވެ. ބަދަލުތަކެއް ގެނެސްގެން ޔުނައިޓެޑުން ލަނޑެއް ޖެހޭތޯ ބެލި ނަމަވެސް ކާމިޔާބެއް ނުވި އެވެ. ޔުނައިޓެޑަށް ނަތީޖާ ހަމަހަމަކޮށްދޭން މެޗުގެ ފަހު ކޮޅުގައި ކްރިސްޓިއާނޯ ރޮނާލްޑޯ ރަނގަޅު ޝޮޓެއް ޖެހި އެވެ. އޭރިއާތެރެއިން ރޮނާލްޑޯ ފޮނުވާލި ބޯޅަ އެވަޓަންގެ މައިކަލް ކީން ގައިގައި ޖެހިފައި ދިޔަ ނަމަވެސް ކީޕަރު ޕިކްފޯޑް ވަނީ އެއް އަތުން މަތަކޮށްފަ އެވެ.
އެވަޓަން މޮޅުވެގެން މެޗު ނިމުމުން އެ ޓީމުގެ ކުޅުންތެރިންނާއި ބެންޗުގައި ތިބި އޮފިޝަލުން ވެސް ވަނީ ވަރަށް ބޮޑަށް އުފާފާޅުކޮށްފަ އެވެ. ޔުނައިޓެޑަށް މުހިންމު ޕޮއިންޓްތަކެއް ގެއްލުމުން އެ ޓީމުގެ ކުޅުންތެރިންގެ މޫނުމަތިން ފެނުނީ މާޔޫސްކަމެވެ.
ޔުނައިޓެޑްގެ ކޯޗުކަމާ ރަލްފް ރަންގްނިކް ހަވާލުވި ފަހުން އެ ޓީމުން ލީގުގައި ކުޅުނު 17 މެޗުގެ ތެރެއިން މޮޅުވީ އަށް މެޗުންނެވެ. ރަންގްނިކަކީ ޔުނައިޓެޑްގެ ކޯޗުކަމާ ހަވާލުވެ ލީގުގެ ފުރަތަމަ 17 މެޗަށް ބަލާއިރު، އެންމެ ރެކޯޑް ދަށް ކޯޗެވެ.
