ޕާކިސްތާނުގެ ޕާލިމެންޓް އުވާލީ ގޯސްކޮށް ކަމަށާއި ބޮޑު ވަޒީރު އިމްރާން ހާންގެ އިތުބާރު ނެތްކަމުގެ މައްސަލަ ވެސް ބޭރުކޮށްލީ ގޯސްކޮށް ކަމަށް ސުޕްރީމް ކޯޓުން ކަނޑައަޅައިފި އެވެ.
އުއްތަމަ ފަނޑިޔާރު އުމަރް އަތާ ބަންދިއަލް ވިދާޅުވީ އިތުބާރު ނެތްކަމުގެ މައްސަލަ ބޭރުކޮށްލީ ގާނޫނު އަސާސީގެ 95 ވަނަ މާއްދާއާ ހިލާފަށް ކަމަށެވެ.
ސުޕްރީމް ކޯޓުން އެގޮތަށް ނިންމުމާ އެކު އިމްރާން ހާންގެ އިރުބާރު ނެތްކަމުގެ މައްސަލަ އަންނަ ހޮނިހިރު ދުވަހު ޕާލިމެންޓުގައި ކުރިއަށް ދާނެ އެވެ.
މިދިޔަ ހަފްތާގައި އިމްރާން ހާން ވަނީ ޕާކިސްތާނުގެ ދާހިލީ ކަންކަމަށް އެމެރިކާއިން ނުފޫޒު ފޯރުވާ ކަމަށް ވިދާޅުވެފަ އެވެ. ޕާކިސްތާނުގެ ނޫސްތަކުން ބުނީ އެމެރިކާއިން ޕާކިސްތާނަށް ކަނޑައަޅާފައި ހުންނަ ސަފީރު އިމްރާން ހާނަށް ފޮނުއްވި ސިޓީއެއްގައި، އެމަނިކުފާނު މަގާމުން ވަކިވެއްޖެ ނަމަ ދެ ގައުމުގެ ގުޅުން މިހާރަށް ވުރެ ރަނގަޅު ވާނެ ކަމަށް ވިދާޅުވި ކަމަށެވެ. ނަމަވެސް އެމެރިކާއިން އެކަން ދޮގުކުރެ އެވެ.
ޕާލިމެންޓަށް ހުށަހެޅި އިތުބާރު ނެތްކަމުގެ މައްސަލަ ބޭރުކޮށްލީ ބޭރުގެ ނުފޫޒު އެ މައްސަލައިގައި ހިމެނޭތީ ކަމަށް ޕާލިމެންޓުގެ ނައިބު ރައީސް ވިދާޅުވި އެވެ.
މައްސަލަ ބޭރު ކުރިތާ ކުޑައިރުކޮޅެއް ފަހުން އިމްރާން ހާން ވަނީ ޕާލިމެންޓް އުވާލުމަށް ރައީސްގެ ކިބައިން އެދިވަޑައިގެންފަ އެވެ. އެއާ އެކު ޕާލިމެންޓު އުވާލިކަމަށް ކަނޑައަޅައި، އާ އިންތިހާބަކަށް ތައްޔާރުވަމުންދާ ކަމަށް އިމްރާން ހާން ވިދާޅުވި އެވެ.
ޕާކިސްތާނުގެ ތާރީހުގައި އެއްވެސް ބޮޑު ވަޒީރަކު ދައުރު ފުރިހަމަ ކުރައްވާފައެއް ނުވެ އެވެ. އިމްރާން ހާން އެ މަގާމަށް އިންތިހާބުވެވަޑައިގެންނެވީ 2018 ވަނަ އަހަރު އެވެ.
އިތުބާރު ނެތްކަމުގެ ވޯޓަކީ އެމަނިކުފާނުގެ ދައުރުގައި މިހާތަނަށް ކުރިމަތިވާ އެންމެ ބޮޑު ގޮންޖެހުމެވެ. އިދިކޮޅު ފަރާތްތަކުން ތުހުމަތު ކުރަނީ ސަރުކާރުގެ ހާރިޖީ ސިޔާސަތު ހަމަނުޖެހޭ ކަމަށާއި އިގްތިސާދު ވެސް މެނޭޖު ނުކުރެވޭ ކަމަށެވެ.
އިމްރާން ހާން ވިދާޅުވީ ޕާކިސްތާނުގެ އިދިކޮޅު ގްރޫޕްތަކުން އެމެރިކާއާ ގުޅިގެން މަސައްކަތް ކުރަނީ، ދުނިޔޭގެ ބޮޑެތި މައްސަލަތަކުގައި އެމެރިކާ އާ އެއް ވިސްނުމެއް އެމަނިކުފާނު ނުގެންގުޅޭތީ ކަމަށެވެ. އެގޮތުން, ޗައިނާ އާއި ރަޝިއާގެ މައްސަލަ ފާހަގަކުރެއްވި އެވެ.
ޕާކިސްތާނުގެ އިދިކޮޅުގައި އުޅެނީ މުސްލިމް ލީގް-އެން (ޕީއެމްއެލް-އެން) އަދި ޕާކިސްތާން ޕީޕަލްސް ޕާޓީ (ޕީޕީޕީ) އެވެ.
