ނިދާ ހޭލައިގެން ފާރުގައި ހުރި ގަޑިއަށް ބަލައިލާ ހިސާބުން ފެށިގެން އެފެންނަން ފެށީ ބިއްލޫރި އެވެ. ދެން ހަމަ ބަލައިލި ކޮންމެ ދިމާލަލުން ފެންނާނީ ބިއްލޫރި އެވެ. މޫނުދޮވެލައި، ރީތިވެލަން ގޮސް އޭގެ ކުރިމައްޗަށް ހުއްޓޭ ކަންނާޑީން ފެށިގެން ގޭގެ ކުޑަދޮރުތަކުން ގޮސް ފެންނަނީ ހުސް ބިއްލޫރި އެވެ.
އަހަރެމެންގެ ދިރިއުޅުމާ މިހާ ބޮޑަށް ގުޅިފައިވާ ބިއްލޫރީގެ ހަގީގަތް އެނގެން ޔަގީނުން ވެސް އެތައް ބަޔަކު ބޭނުންވާނެ އެވެ. ބިއްލޫރިއަކީ މީހުން އަމިއްލައަށް އުފައްދާ އެއްޗެެއްތޯ ނުވަތަ އެއީ ގުދުރަތީ ވަސީލަތެއްތޯ ބަލައިލާ ހިތްވާ ބަޔަކުވެސް ތިބެދާނެ އެވެ.
ބިއްލޫރި އާ ބެހޭ ގޮތުން އަހަރެމެން އެންމެން ވެސް އަހާފައިވާ އެންމެ ގަދީމީ ވާހަކައަކީ ސުލައިމާން އަލައިހިއްސަލާމްގެ ގަނޑުވަރަށް، ބަލްގިސް ރަނިން ވަޑައިގެންނެވުމުން ކަންހިނގި ގޮތުގެ ވާހަކަ އެވެ. ބޮޑު ބިއްލޫރި ޝީޓަކުން އަޅާފައިވާ ތަޅުމަކީ ފެންގަނޑެއް ކަމަށް ހީފުޅުކުރައްވައި ބަލްގިސް ރަނިން، އެކަމަނާގެ ފޭރާންކޮޅު ކޮށިކުރައްވަން އުޅުއްވި ކަމަށް އެ ވާހަކަގައި ކިޔަ އެވެ.
އިންސާނުން ބިއްލޫރި ބޭނުންކުރަން ފެށީ ކިހާ ކުރިއަކުން ކަން އެވާހަކައިން ވެސް އެނގެ އެވެ.
އިންސާނުންގެ ލޯތަކަށް ނުހަނު އަރާމު ގެނެސްދޭ ބިއްލޫރީގެ އަސްލަކީ ބޭނުންވަރަކަށް އަހަރެމެންނަށް ލިބެން އޮތް އެއްޗެއް ކަމަށްވާ ވެއްޔޭ ބުނެފި ނަމަ ގަބޫލުނުކުރާނެ މީހުން ވެސް ތިބެދާނެ އެވެ. އެކަމަކު ހަގީގަތަކީ އެ އެވެ.
ގުދުރަތީ ބިއްލޫރި
ތާރީހު ދިރާސާކުރާ ފަރާތްތަކުން ލިޔުއްވާފައިވާ ގޮތުގައި ބިއްލޫރި އުފައްދާނެ ގޮތް ދަސްވުމުގެ އެތައް ހާސް އަހަރެއް ކުރިން ފެށިގެން ވެސް އަހަރެމެންގެ ކާބަފައިން ވަނީ އެތައް ކަމަކަށް ބިއްލޫރި ބޭނުންކޮށްފަ އެވެ. އޭރު ބޭނުންކުރީ ގުދުރަތީ ގޮތުން އުފެދޭ ބިއްލޫރި އެވެ. އަލިފާން ފަރުބަދައިން އުފެދޭ "އޮބްސީޑިއަން" ބިއްލޫރި އެންމެ ފުރަތަަމަ ބޭނުންކުރިކަމަށް އެނގެން އޮތީ މަޝްހޫރު ހަތިޔާރެއްކަމަށް ވާ ދުނިދަނޑިއަށް ލައްވާ ދުނީގެ ތުނޑު ހެދުމަށާއި ވަޅިއާއި ގަހަނާ އަދި ފައިސާ އުފެއްދުމަށެވެ.
ގުދުރަތީ ބިއްލޫރި އުފެދޭ އެއް ގޮތަކީ އަލިފާން ފަރުބަދައިން ފައިބާ، މަތީ މިންވަރަކަށް ސިލިކާ އެކުލެވޭ ލާވާގެ ބޮޑެތި އެތިގަނޑުގަނޑު ގޮސް ބިމުގައި ޖެހި، ކުއްލިއަކަށް ހިހޫ ވުމެވެ. މިގޮތަށް ދިމާވާ އެއް ސަބަބަކީ ލާވާ ގޮސް ފެނުގައި ޖެހުމެވެ.
އަނެއް ގޮތަކީ ސިލިކާ ސޭންޑް (ވެލީގެ ވަކި ބާވަތެއް) ހުންނަ ސަރަހައްދެއްގެ ބިންގަނޑަށް ހޮނު އެޅުމެވެ. އެކަންއާއްމުކޮށް ހިނގަނީ ސަހަރާގަ އެވެ.
ބިއްލޫރި އުފެއްދުން
ގަދީމީ ރޯމަނުންގެ ތާރީހީ އިލްމުވެެރިޔާ ޕްލިނީ ލިއުއްވާފައިވާ ގޮތުގައި އެންމެ ފުރަތަމަ ބިއްލޫރި އުފައްދައި ބޭނުންކުރަން ފެށކަމަށް ބެލެވެނީ އީސާ އަލައިހިއްސަލާމްގެ 5000 އަހަރު ކުރިން، މިޒަމާނުގެ ސީރިއާ އެ އޮތް ސަރަހައްދުގަ އެވެ. އެހެން ނަމަވެސް ލިބެން ހުރި އާކިއޮލޮޖިކަލް ހެކިތަކަށް ބަލާއިރު އެންމެ ފުރަތަމަ ބިއްލޫރި އުފައްދައި ބޭނުންކުރަން ފެށީ އީސާގެފާނުގެ 3500 އަހަރުކުރިން މިސްރާއި މެސޮޕޮޓޭމިއާ ގަ އެވެ. މެސަޕޮޓޭމިއާ އަކީ މިހާރުގެ އިރާގު ސަރަހައްދެވެ. ބިއްލޫރީގެ ކަންވާރެއް އެންމެ ފުރަތަމަ އުފެއްދީ ބެލެވޭ ގޮތުގައި އީސާގެފާނުގެ 1500 އަހަރު ކުރިން ހަމަ އެ ދެ ސަރަހައްދުގަ އެވެ.
އޭގެ ފަހަށް އައި 300 ވަރަކަށް އަހަރުގެ ތެރޭގައި ބިއްލޫރި އުފެއްދުމުގެ ސިނާއަތު ކުރިއަރައިގެން ދިޔަ ނަމަވެސް އޭގެ ފަހުން ދިޔައީ ދަށަށެވެ. އެ ސިނާއަތުން އަލުން ނަގައި ކޮޅަށް ޖެހުމުގެ މަސައްކަތް މިސްރުގައި ފެށިކަމަށް ބެލެވެނީ އީސާގެފާނުގެ 700 އަހަރު ކުރިންނެވެ. އޭގެ ފަހަށް އައި 500 އަހަރު ވެސް މިސްރާއި ޝާމާއި މެޑިޓަރޭނިއަން ކަނޑުގެ އައްސޭރީގެ ބައެއް ސަރަހައްދުތައް ވެފައި އޮތީ ބިއްލޫރި އުފެއްދުމުގެ މަރުކަޒު ތަކަކަށެވެެ.
ބިއްލޫރިން ތަކެތި އުފެއްދުމުގައި ބޭނުންކުރާ އުކުޅުތައް ތަފާތުވެފައި، އެ ޓެކްނޮލޮޖީ ކިތަންމެ ކުރި އެރިޔަސް އޭގެ އަސާސަކީ ސިލިލާ އެކުލެވޭ ވެލި އާދަޔާ ހިލާފަށް ހޫނުކޮށްލުމެވެ. އެގޮތުން ކުރަންޖެހޭ ކަމަކީ އެފަދަ ވެލި 1700 ޑިގްރީ ސެލްސިއަސް އަށް ހޫނުކުރުމެވެ. މިހެން ހޫނުކުރުމުގެ މަސައްކަތް އެކި ޒަމާންތަކުގައި ކޮށްފައި އޮންނާނީ އެކި ގޮތްތަކަށަށެވެ.
މިޒަމާނުގައި މިފެންނަ ފަދަ ބޮޑެތި ބިއްލޫރި ޝީޓްތައް ހުރިހާ ދިމާލެއްގެ ބޯމިން އެއްވަރެއްގައި ހުންނާނޭހެން އުފައްދަން ފެށީ 1950ގެ އަހަރުތަކުގައި ޕިލްކިންޓަން އިންނެވެ. އެކުންފުނިން އީޖާދުކުރި މެތަޑަށް ކިޔަނީ "ފްލޯޓް ގްލާސް ޕްރޮސެސް" އެވެ. އެ މެތަޑްގައި ކުރާ ކަމަކީ ވިރުވާފައިވާ ބިއްލޫރި ވިރުވާފައިވާ މައުދަނެއްގެ މަތިން ގެންދިއުމެވެ. އެކަމަށް ބޭނުންކުރާ މައުދަނަކީ ޓިން ނުވަތަ އެހެން މައުދަކަށް ވެސް ވެދާނެ އެވެ.
ގެދޮރު ޒީނަތްތެރިކުރަން މިހާރު ކިތަންމެ ބާވަތެއްގެ ބިއްލޫރި އެއް ލިބެން އެބަހުއްޓެވެ. ލެޑް ބޭސްޑް ގްލާސް، ޓެމްޕާޑް ގްލާަސް، ސޮޑާ ލައިމް ގްލާސް، ސްޓެއިންޑް ގްލާސް އަދި ޓިންޓެޑް ގްލާސް ފަދަ ކިތަންމެ ބާވަތެކެވެ. އެކަމަކު މިހުރިހާ ބިއްލޫރިއެއް އުފެއްދުމުގައި ވެސް ފްލޯޓް ގްލާސް ޕްރޮސެސް އަދިވެސް ބޭނުންކުރެ އެވެ.
