މަޝްހޫރު މިޔުޒިކް ތަރިންގެ ޔޫޓިއުބް ޗެނަލްތައް ހެކް ކުރި މައްސަލަ ތަހުގީގު ކުރަން ފަށާފައިވާ ކަމަށް މިޔުޒިކް ހޯސްޓިން ހިދުމަތް ދޭ، ވީވޯއިން ބުނެފި އެވެ.
ޖަސްޓިން ބީބާ، ޓެއިލާ ސްވިފްޓް އަދި އެހެން މަޝްހޫރު އާޓިސްޓުންގެ ޗެނަލްތައް ހެކް ކުރުމަށް ފަހު، ކުށްވެރިއެއްގެ ވީޑިއޯތައް ވަނީ އަޕްލޯޑްކޮށްފަ އެވެ.
ޔޫޓިއުބާއި އެހެން ޕްލެޓްފޯމްތަކަށް ތަރިންގެ މިޔުޒިކް ވީޑިއޯ ފޯރުކޮށްދޭ ވީވޯއިން ބުނީ ހެކް ކުރުމަށް ފަހު އަޕްލޯޑް ކުރި ކޮންޓެންޓް ޑިލީޓުކޮށްފައިވާ ކަމަށާއި އެކަމުގެ ތަހުގީގެއް ފަށާފައިވާ ކަމަށެވެ.
ޖަސްޓިން ބީބާ އާއި ޓެއިލާ ސްވިފްޓްގެ އިތުރުން އެރިއާނާ ގްރާންޑް، ޑްރޭކް، އެމިނެމް، މައިކަލް ޖެކްސަން އަދި ކާންޔޭ ވެސްޓްގެ ޔޫޓިއުބް ޗެނަލްއަށް ވެސް ހެކަރުން އަމާޒު ކުރި އެވެ.
ހެކް ކުރުމަށް ފަހު ޗެނަލްތަކަށް އަޕްލޯޑް ކުރީ މިދިޔަ އަހަރު ޖަލަށް ހުކުމް ކުރި ސްޕެއިންގެ ޕާކޯ ސާންޒްގެ ވީޑިއޯ އެވެ. އޭނާއަކީ ކެންސަރު ބަލީގައި މަރުވަނީ ކަމަށް ބުނެ، ގިނަ އަދަދެއްގެ ސެލެބްރިޓީންނާއި އެހެން މީހުން އޮޅުވާލައިގެން އުޅުނު ސްކޭމަރެކެވެ.
ވީވޯއަކީ ޔުނިވާސަލް މިޔުޒިކާއި ސޮނީ މިޔުޒިކް ގުޅިގެން 2009 ވަނަ އަހަރު އުފެއްދި ޖޮއިންޓް ވެންޗާ އެކެވެ. މީގެ ހަތަރު ކުރިން ވެސް ހެކަރުން ވީވޯއަށް ހަމަލާ ދިނެވެ. އެ ފަހަރު ބައެއް ލަވަތަކުގެ ވީޑިއޯ ބަދަލުކޮށް، ހިޓު ލަވަ "ޑެސްޕަސީޓޯ" ވީވޯގެ ހިދުމަތުން ވަގުތީ ގޮތުން ގެއްލުނެވެ.
