ކޮވިޑް ބަލިމަޑުކަމުގެ ތެރޭގައި ޗައިނާގައި ފުރަތަމަ ފަހަރަށް އެއް ދުވަސް ތެރޭ 20،000 ކޭސް ރިޕޯޓުކޮށްފި އެވެ.
ރެކޯޑް އަދަދަށް ކޭސްތައް ރިޕޯޓުކޮށްފައިވާ އިރު، އެންމެ ބޮޑަށް ބަލި ފެތުރެމުން ދަނީ ލޮކްޑައުންކޮށްފައިވާ ޝަންހާއީ ސިޓީގަ އެވެ.
މިދިޔަ މާޗް މަހާ ހަމައަށް ޗައިނާގެ ކޮވިޑް ކޭސްތައް ވަރަށް ބޮޑަށް ކޮންޓްރޯލް ކޮށްފައި ހުރި ނަމަވެސް، އޭގެ ފަހުން ކުއްލިއަކަށް ވަނީ އިތުރު ވާން ފަށާފަ އެވެ.
އޮފިޝަލުން ބުނީ ހަލުވިކަމާ އެކު ފެތުރޭ އޮމިކްރޯން ވޭރިއެންޓްގެ އާ މިޔުޓޭޝަނެއް ޝަންހާއީ ކައިރިން ފެނިފައިވާ ކަމަށެވެ.
ނޭޝަނަލް ހެލްތު ކޮމިޝަނުން ނެރުނު ބަޔާނެއްގައި ބުނީ ބުދަ ދުވަހު 20،472 ކޭސް ރިކޯޑް ކުރި އިރު، އެއްވެސް މީހަކު ބަލީގައި މަރުވެފައި ނުވާ ކަމަށެވެ.
ރެކޯޑް އަދަދަށް ކޭސްތައް މަތިވި ނަމަވެސް، ގިނަ ކޭސްތަކުގައި އެއްވެސް އަލާމާތެއް ނުފެނެ އެވެ.
"ޒީރޯ ކޮވިޑް" ގެ ސިޔާސަތެއް ގެންގުޅޭ ޗައިނާގައި ކޭސްތައް އެންމެ ބޮޑަށް އިތުރުވަމުންދާ ޝަންހާއީގެ ކަރަންޓީން ފެސިލިޓީތައް މިހާރު ވަނީ ފުރިފަ އެވެ.
އެ ސިޓީގައި ބައްޔަށް ޕޮޒިޓިވްވާ ތުއްތު ކުދިންނާއި ނެގެޓިވްވާ މައިންބަފައިން ބައިތިއްބަނީ ވަކިންނެވެ. އެ ސިޔާސަތާ ހެދި އާއްމުން ވަނީ ހިތްހަމަނުޖެހުން ފާޅުކޮށްފަ އެވެ.
ބުދަ ދުވަހު ރިކޯޑް ކުރި ކޭސްތަކުގެ 80 ޕަސެންޓް ނިސްބަތް ވަނީ ޝަންހާއީ އަށެވެ. ގާތްގަނޑަކަށް 25 މިލިއަން މީހުން ދިރިއުޅޭ އެ ސިޓީ ލޮކްޑައުން ކުރީ މިދިޔަ ހަފްތާގަ އެވެ.
