އައްމާން، އުރުދުން (އެޕްރީލް 3) - ރަސްގެފާން އަބްދުﷲ ދެ ވަނައާ ދެކޮޅަށް ބަގާވާތެއް ހިންގަން އުޅުނު ކަމަށް އެއްބަސްވެވަޑައިގެންނެވި އުރުދުންގެ ކުރީގެ ވަލީ އަހުދު ހަމްޒާ އަމީރުކަން ދޫކޮށްލައިފި އެވެ.
ޓްވިޓާގައި އާއްމު ކުރި ބަޔާނެއްގައި ހަމްޒާ ވިދާޅުވީ "އަމީރުކަމުގެ ލަގަބު ދޫކޮށްލަން" ނިންމާފައިވާ ކަމަށެވެ. މިދިޔަ އަހަރު ބަގާވާތެއް ހިންގަން އުޅުނު މައްސަލައިގައި ރަސްގެފާނުގެ ކިބައިން ހަމްޒާ މައާފަށް އެދިވަޑައިގެންނެވި ކަމަށް އުރުދުންގެ ޝާހީ ކޯޓުން ބުނީ މީގެ މަހެއް ކުރިންނެވެ.
"މިދިޔަ އަހަރުތަކުގައި އަޅުގަނޑަށް ފެނުނު މަންޒަރަށް ބަލާއިރު، ގައުމުގެ އިދާރާތަކުގެ ވިސްނުމާއި އަމަލުތައް ހުރީ އަޅުގަނޑުގެ ބައްޕަ އަޅުގަނޑަށް އުނގަންނައި ދެއްވި ކަންކަމާ ތަފާތުކޮށް. މި ލަގަބުގެ ބޭނުން ހިފައި، އަޅުގަނޑުގެ ލޯބިވާ ގައުމާއި، ލޯބިވާ ރައްޔިތުންނަށް ހިދުމަތްތަކެއް ކުރެވިއްޖެ،" ހަމްޒާ ވިދާޅުވި އެވެ.
"އަޅުގަނޑު ދިރިހުރިހާ ހިނދަކު، ލޯބިވާ އުރުދުންއަށް ވަފާތެރިވާނަން."
މާޗް އަށް ވަނަ ދުވަހު އުރުދުންގެ ޝާހީ ކޯޓުން ބުނީ ރަސްގެފާނާ ދެކޮޅު އަމަލުތަކެއް ހިންގި ކަމަށް ހަމްޒާ އެއްބަސްވެވަޑައިގަންނަވާ ކަމަށެވެ.
އުރުދުންގައި ހަމަނުޖެހުން އުފައްދައި ބަގާވާތެއް ހިންގައި އުޅެނިކޮށް، އެކަން ހުއްޓުވާފައިވާ ކަމަށް އިއުލާނު ކުރީ މިދިޔަ އަހަރުގެ އެޕްރީލް މަހު އެވެ.
އަމީރު ހަމްޒާއަކީ ރަސްގެފާނު އަބްދުﷲ އާ އެއް ބަފާ ކޮއްކޮ އެވެ. ހަމްޒާ އޭރު ހާމަކުރި ވީޑިއޯއެއްގައި ވަނީ ގައުމުގެ ވެރިންނަށް ކޮރަޕްޝަނުގެ ތުހުމަތު ކުރައްވާފަ އެވެ.
"މިއަދު ހެނދުނު އުރުދުންގެ އަސްކަރީ ބާރުގެ ވެރިޔާ އަޅުގަނޑަށް ޒިޔާރަތްކޮށް، ބޭރަށް ނިކުތުމާއި، މީހުންނާ ބައްދަލުކޮށް ވާހަކަދެއްކުން މަނާ ކަމަށް ވިދާޅުވި. އެއީ މީގެ ކުރިން އަޅުގަނޑު ބައިވެރިވި ބައްދަލުވުންތަކުގައި ރަސްގެފާނާއި ސަރުކާރަށް ފާޑުކިޔާފައި ވާތީ،" މިދިޔަ އަހަރުގެ އެޕްރީލް މަހު އާއްމު ކުރި އެ ވީޑިއޯގައި ވެއެވެ.
ޝާހީ ގަނޑުވަރުގެ ކުރީގެ ވެރިޔާ ބައްސާމް އަވާދުﷲ އާއި ސައުދީ އަރަބިއްޔާގެ ކުރީގެ މަންދޫބު ޝާރިފް ހަސަން ބިން ޒައިދަށް ބަގާވާތުގެ މައްސަލައިގައި 15 އަހަރުގެ ޖަލު ހުކުމެއް އިއްވީ މިދިޔަ ޖުލައި މަހު އެވެ. ހަމްޒާއާ ދެކޮޅަށް ދައުވާ އުފުލާފައެއް ނުވެ އެވެ.
އުރުދުންގެ ވަލީ އަހުދު ކަމަށް ހަމްޒާ އައްޔަނު ކުރެއްވީ 1999 ވަނަ އަހަރު ރަސްގެފާނު އަބްދުﷲ ދެ ވަނަ އެވެ. އެގޮތަށް ނިންމެވީ ދެ ބޭފުޅުންގެ ބައްޕާފުޅު އަދި ކުރީގެ ރަސްގެފާނު ހުސެންގެ އެދިވަޑައިގެންނެވުމަކަށެވެ.
ނަމަވެސް އޭގެ ފަހުން 2004 ވަނަ އަހަރު ހަމްޒާ ވަލީ އަހުދުކަމުން ވަކި ކުރައްވައި، އެ މަގާމަށް އައްޔަން ކުރެއްވީ ރަސްގެފާނު އަބްދުﷲ ގެ ފިރިހެން ދަރިކަލުން، އަމީރު ހުސެން އެވެ.
