މިދިޔަ އާދީއްތަ ދުވަހު އިސް އޮސްކާ އެވޯޑް ހަފްލާގެ ސްޓޭޖު މަތީގައި ކޮމީޑިއަން ކްރިސް ރޮކްގެ ކަންކަށި މަތީގައި ޖެހި މައްސަލައިގައި، އެމެރިކާގެ އެކްޓަރު ވިލް ސްމިތު އޮސްކާ އެކެޑެމީއިން އިސްތިއުފާ ދީފި އެވެ.
"ނުވަ ދިހަ ހަތަރު ވަނަ އެކެޑެމީ އެވޯޑް ދިނުމުގެ ހަފްލާގައި އަޅުގަނޑު އަމަލު ކުރީ ހައިރާން ކުރަނިވި، ވޭންދެނިވި އަދި އުޒުރެއް ދެއްކެން ނެތް ފަދަ ގޮތަކަށް،" ވިލް ސްމިތު ނެރުނު ބަޔާނެއްގައި ބުންޏެވެ.
އޮސްކާ އެކެޑެމީއިން ބުނީ ވިލް ސްމިތުގެ އިސްތިއުފާ ބަލައިގަންނަ ކަމަށާއި އޭނާއާ މެދު އިސްލާހީ ފިޔަވަޅުތައް އެޅުމުގެ މަސައްކަތް ކުރިއަށް ގެންދާނެ ކަމަށެވެ.
ވިލް ސްމިތު ރުޅި ގަދަވީ އޭނާގެ އަންހެނުންގެ ބޯ ތަލަކޮށްފައި ހުންނާތީ ކްރިސް ރޮކް ޖޯކު ޖެހުމުންނެވެ. ވިލް ސްމިތުގެ އަންހެނުން ބޯ ތަލަކޮށްފައި ހުންނަނީ ސިއްހީ މައްސަލައެއްގެ ސަބަބުންނެވެ.
ކްރިސް ރޮކް ޖޯކު ޖެހުމުން، ވިލް ސްމިތު ވަނީ ސްޓޭޖަށް އަރައި އޭނާގެ ކަންކަށި މަތީގައި ޖަހައި، އަންހެނުންގެ ވާހަކަ ނުދެއްކުމަށް އިންޒާރު ދީފަ އެވެ.
އޭގެ އެއް ގަޑިއިރު ފަހުން ވިލް ސްމިތަށް ވަނީ "ކިންގް ރިޗަޑް" ގައި ކުޅުނު ރޯލަށް އެންމެ މޮޅު އެކްޓަރުގެ އެވޯޑު ދީފަ އެވެ.
މިދިޔަ ބުދަ ދުވަހު ކްރިސް ރޮކް ބުނީ އެ ހާދިސާ އަދިވެސް ރަނގަޅަށް "ޕްރޮސެސް ނުކުރެވޭ" ކަމަށެވެ. އުމުރުން 57 އަހަރުގެ އެކްޓަރު ނިންމީ ވިލް ސްމިތާ ދެކޮޅަށް ޖިނާއީ ދައުވާ ނުކުރުމަށެވެ.
