ލުނބޯ އާއި މިރުހުގެ އަގު ރަނަށްވެ، ލޯކަލް މާރުކޭޓު ހުސްކޮށް!

ބާޒާރުގައި ލުނބޯ އާއި ގިތެޔޮ މިރުހުގެ އަގު ރަނަށްވެ، ރޯދަ އާ ދިމާވިއިރު އެންމެ ބޮޑު ލޯކަލް މާރުކޭޓު ވަރަށް ބޮޑަށް ހީނަރު ވެއްޖެ އެވެ.

ބާޒާރުގައި ލުނބޯ އާއި ގިތެޔޮ މިރުހުގެ އަގު މީން ޒަމާނަކު ވެސް ނުދާހާ މިންވަރަށް ވަނީ އުފުލިފަ އެވެ. ސަތޭކަ ގްރާމް މިރުސް 60ރ. އަށް ވިއްކާއިރު، މިރުސް ކިލޯއެއް ގަންނަން ލިބެނީ 700ރ. އަށެވެ.

މާރުކޭޓުގެ ހައެއްކަ ގޮޅީގައި ތާޒާ ގިތެޔޮ މިރުސް ވިއްކަން ހުރި ނަމަވެސް، ގޮޅިތަކުން ބުނާ ގޮތުގައި މިރުހުގެ އަގު އުފުލިފައި ވަނީ ބޭނުންވާ ވަރަށް ބާޒާރަށް މިރުސް ނުގެންނާތީ އެވެ.

ލުނބޯގެ އަގު އުފުލެމުން އަންނަތާ މަހެއްހާ ދުވަސް ވެފައިވާއިރު، މިއަދު ތާޒާ ލުނބޯ ކިލޯއެއްގެ އަގު ހުރީ 140ރ. އާ 150ރ. އަށެވެ.

ރާއްޖެ އަށް ލަންކާ އާއި އިންޑިޔާ އަދި ވިއެޓްނާމުން ލުނބޯ އެތެރެ ކުރެ އެވެ.

"މިއީ އިންޑިޔާގަ ލުނބޯ މޫސުމެއް ނޫން، ވިއެޓްނާމުން ވެސް ލިބުން ދަތިވެގެން އުޅޭނީ، އެހެން ވީމަ ލުނބޯގެ އަގު އެހާ ބޮޑީ،" ލުނބޯ އެތެރެކޮށް ވިއްކާ ފިހާރަ އަކުން ވާހަކަ ދެއްކި މީހަކު ބުންޏެވެ.

އޭނާ ބުނި ގޮތުގައި މިއަދު ހަވީރުގެ ވަގުތެއްގައި ބަންގްލަދޭޝް އިން ގެންނަ ލުނބޯ ވެސް ވިއްކާނީ 120ރ. އަށްވުރެ ބޮޑުކޮށެވެ. ލުނބޯގެ އަގު ދަށްވާނެ ދުވަހެއް އަދި ވަނީ ނޭނގުމެއްގެ ތެރޭގަ އެވެ.

އެންމެ ބޮޑު ލޯކަލް މާރުކޭޓުގެ ގޮޅިތައް: އަލަށް ދޫކުރުމާ ގުޅިގެން، ގިނަ ގޮޅިތައް މިއަދު ހުރީ ހުސްކޮށް-- އަދަދު ފޮޓޯ އަހުމަދު ސައީދު

އެންމެ ބޮޑު ލޯކަލް މާރުކޭޓު ހުސްކޮށް

ޒަމާނުއްސުރެ ބާޒާރު މަތީގައި ހިންގާ އެންމެ ބޮޑު ލޯކަލް މާރުކޭޓުގެ ގޮޅިތައް މިއަދު ހުރީ "ހުސްވެފަ" އެވެ. ގޮޅިތަކުގެ މީހުން ބުނާ ގޮތުގައި އެހެން ދިމާވީ ރޯދަ މަހާ ދިމާކޮށް އަލުން ގޮޅިތައް ދޫކުރުމުން، ގޮޅިތައް ލިބުނު މީހުންނަށް އަދި ތައްޔާރު ނުވެވޭތީ އެވެ.

"އެކި ގޮޅިތަކަށް މީހުން ބަދަލުވި ވަގުތެއް ވީމަ، އަދި ނުފެށިގެން އުޅޭނީ، މާދަމާ ގޮޅިތަކަށް އެއްޗެހި އަންނާނެ،" ގޮޅިއެއް ހިންގާ އއ. ތޮއްޑޫ އަލީ ހަސަން ބުންޏެވެ.

އެންމެ ބޮޑު މާރުކޭޓުގެ ގޮޅިތައް ހީނަރުވެފައިވީ ނަމަވެސް، މަސް މާރުކޭޓުގެ ކުރިމަތީ ހުންނަ ލޯކަލް މާރުކޭޓާއި މާލެ ތެރޭގައި ހިންގާ މާރުކޭޓު ތަކުގައި ގިނަ ބާވަތްތަކެއްގެ ތަރުކާރީ އާ މެވާ އެބަހުއްޓެވެ. ނަމަވެސް، ރޯދަމަސް ފެށޭ އިރާ ބަލާއިރު، ބާޒާރުގައި އުފެދުންތައް މަދުވެ އަގުވެސް ވަނީ އުފުލިފަ އެވެ.

ބާޒާރު މަތީގައި ހިންގާ ތަރުކާރީ އާ މޭވާ ވިއްކާ ފިހާރަ އަކުން މީހުން ވިޔަފާރި ކުރަނީ -- ފޮޓޯ: އަހުމަދު ސައީދު/އަދަދު

ބައެއް ބާވަތްތަކުގެ އަގުތައް

• ކަރާ ކިލޯއެއް 25ރ.

• ދޮންކެޔޮ ކިލޯއެއް 30ރ.
• އިޒްރޭލު ފަޅޯ ކިލޯއެއް 45ރ.
• ޕެޝަން ފުރުޓް ކިލޯއެއް 90ރ.
• ކިޔުކަމްބާ ކިލޯއެއް 35ރ.
• ލެޓިއުސް ކިލޯއެއް 45-50ރ.
• ބަނބުކޭލެއް 90ރ.
• ވެކިޔުމް ޕެކްޑް ވަޅޯމަސް ކިލޯއެއް 90ރ.
• ވަޅޯމަހެއް 15-60ރ.
• ރޯ ކަނޑުމަސް ކިލޯއެއް 30-35ރ.
• ރޯ ކަންނެލި ކިލޯއެއް 40-45ރ.

ލޯކަލް މާރުކޭޓުގެ ގޮޅިތަކުން ބުނާ ގޮތުގައި މާދަމާ އަންނަ ދޯނިފަހަރުން ކަރަލާއި ކުރުނބަލާއި ރޯދަމަހަށް ބޭނުންވާ ދަނޑުވެރިކަމުގެ އެނޫން ވެސް ބާވަތްތައް ގެންނާނެ އެވެ. ލާފާ ކުރެވޭ ގޮތުގައި ބާޒާރުގައި ތަކެތީގެ އަގު ހަމައަކަށް އެޅޭނީ ރޯދަ މަސް ފެށޭތާ ދެތިން ދުވަހެއް ފަހުންނެވެ.