ލަންޑަން (މާޗް 31) - އަންނަ ސީޒަނުން ފެށިގެން އިނގިރޭސި ޕްރިމިއާ ލީގުގެ މެޗެއްގެ ތެރެއިން ފަސް ބަދަލު ގެނެވޭ ގޮތަށް ހަދަން ކްލަބްތަކުގެ މެޖޯރިޓީ ތާއީދާ އެކު ނިންމައިފި އެވެ.
ކޮވިޑް-19ގެ ސަބަބުން 2020 ވަަަނަ އަހަރުގެ ކުރީކޮޅުގައި ފުޓްބޯޅަ ކުޅުން ހުއްޓާލުމަށް ފަހު އެ އަހަރު މެއި މަހު އަލުން ފެށި ފަހުން ޔޫރަޕާއި ދުނިޔޭގެ އެކި ކަންކޮޅުތަކުގައި ކުޅޭ ގިނަ މުބާރާތްތަކުގައި ފަސް ބަދަލު ގެނެވޭ ގަވާއިދަށް ވަނީ އަމަލުކުރަން ފަށައިފަ އެވެ.
އޭގެ ފަހުން ފުޓްބޯޅައިގެ ގަވާއިދު ހަދާ އިންޓަނޭޝަނަލް ފުޓްބޯލް އެސޯސިއޭޝަން ބޯޑް (އައިފެބް) އިން ވަނީ ފުޓްބޯޅައިގެ ގަވާއިދުގައި މެޗުތަކުގެ ތެރެއިން ދާއިމަށް ފަސް ބަދަލު ކުރެވޭ ގޮތަށް ހުށަހަޅައިފަ އެވެ. ފަސް ބަދަލު ކުރެވޭނީ ތިން ފުރުސަތުންނެވެ. މި ތިން ފުރުސަތުގެ ތެރޭގައި ހާފް ޓައިމްގައި ކުރާ ބަދަލު ނުގުނާނެ އެވެ.
އިނގިރޭސި ޕްރިމިއާ ލީގުން މިހާތަނަށް އައިއިރު ވެސް އެކަން ނުކުރެވި އޮތީ މެޖޯރިޓީ ކްލަބްތަކުގެ ތާއީދު އެކަމަށް ނެތުމުންނެވެ. މީގެ ކުރިން ދެ ފަހަރެއްގެ މަތިން ކްލަބްތަކުގެ ވޯޓަށް އަހައިގެން ވެސް އޮތީ ފަސް ބަދަލު ގެންނަ ގަވާއިދަށް ޕްރިމިއާ ލީގުގައި އަމަލުކުރަން ނުފެށި އެވެ. އެކަމަކު، އެންމެ ފަހުން ކްލަބްތަކުގެ މެދުގައި ބޭއްވި ބައްދަލުވުމުގައި އެ ގަވާއިދަށް އަމަލުކުރަން މެޖޯރިޓީގެ ތާއީދު ލިބި އަންނަ ސީޒަނުން ފެށިގެން ފަސް ބަދަލުގެ ގަވާއިދު ގެންނަން ނިންމީ އެވެ.
އިނގިރޭސި އެފްއޭ ކަޕްގައި މިހާރު ވެސް އަންނަަނީ ފަސް ބަދަލުގެ ގަވާއިދަށް އަމަލު ކުރަމުންނެވެ.
ޕްރިމިއާ ލީގުގެ ކްލަބްތަކުން ދެން އެއްބަސްވެފައިވާ އުސޫލުތަކަށް ބަލާއިރު، އަންނަ ސީޒަނުގެ ޓްރާންސްފާ މާކެޓް ފަށާނީ ޖޫން 10 އިންނެވެ. އަދި ސެޕްޓެމްބަރު 1 ވަނަ ދުވަހަށް ޔޫރަޕްގެ އެހެން ގައުމުތަކެކޭ އެއްގޮތަށް ޓްރާންސްފާ މާކެޓް ބަންދުވާނެ އެވެ. މީގެ އިތުރުން އަންނަ މަހު ހަތަރަކުން ފެށިގެން ޕްރިިމިއާ ލީގުގެ ކުޅުންތެރިންނާއި އޮފިޝަލުން ހަފްތާ އަކު ދެ ފަހަރު ކޮވިޑަށް ޓެސްޓް ކުރުމުގެ ކަންކަން ދޫކޮށްލާނެ އެވެ. ދެން ޓެސްޓް ކުރާނީ ހަމައެކަނި ސިމްޕްޓަމްސް ފެންނަ މީހުން އެކަންޏެވެ.
