މިއަހަރުގެ ގައުމީ އިނާމަށް މައިގަނޑު 34 ދާއިރާއަކުން ނަން ހުށަހެޅުމުގެ ފުރުސަތު ގައުމީ އިނާމާ ބެހޭ ކޮމިޓީން މިއަދު ހުޅުވާލައިފި އެވެ.
އެގޮތުން، މި ދާއިރާތައް ކަނޑައަޅައި، ކަމާބެހޭ އިދާރާތަކުގެ ހިޔާލު ހޯދުމަށް ފަހު ގައުމީ އިނާމާ ބެހޭ ކޮމިޓީން ވަނީ އުސޫލަށް ގެންނަން ޖެހޭ ބަދަލުތައް ގެނެސް މިއަދު އާންމުކޮށްފަ އެވެ. މިއަހަރު ވެސް ޝަރަފުވެރިކަމުގެ ގައުމީ އިނާމާއި ހިތްވަރު ދިނުމުގެ ގައުމީ އިނާމު ދޭނެ އެވެ.
މި އިނާމަށް ނަން ހުށަހެޅުމުގެ ފުރުސަތު ބަންދު ވާނީ މެއި 31، ގަ އެވެ. މިއަހަރު ވެސް އިނާމު ދޭނީ ގައުމީ ދުވަހުގެ މުނާސަބަތުގައި ބާއްވާ ރަސްމީ ޖަލްސާގަ އެވެ.
އިނާމަށް އެދޭ އަމިއްލަ ފަރާތްތަކުންނާއި، އިނާމަށް އެހެން ފަރާތެއްގެ ނަން ހުށަހަޅުއްވަން ބޭނުންވާ ފަރާތްތަކުންނާއި، ކުންފުނި، ޖަމިއްޔާ ޖަމާއަތް ފަދަ ތަންތަނުން ސަރުކާރުގެ އިދާރާއެއް މެދުވެރިނުކޮށް، ނަން ހުށަހެޅޭނެ ގޮތް މިއަހަރު ވެސް ވަނީ ފަހިކޮށްދީފަ އެވެ.
އޭގެ އިތުރުން ސަރުކާރުގެ އިދާރާތަކުންނާއި، މިނިވަން މުއައްސަސާތަކުންވެސް ނަން ހުށަހެޅޭނެ ގޮތަށް ހަމަޖައްސާފައިވާ ކަމަށް ރައީސް އޮފީހުން ވަނީ ހާމަކޮށްފަ އެވެ.
އިނާމަށް ނަން ހުށަހެޅުމަށް ހާއްސަ ޕޯޓަލްއެއް ވެސް ރައީސް އޮފީހުން ވަނީ ގާއިމުކޮށްފަ އެވެ. އަދި، އެ އޮފީހުގެ ވެބްސައިޓުން ފޯމު ޑައުންލޯޑް ކުރެވޭނެ އެވެ. ބަންދު ނޫން ކޮންމެ ދުވަހެއްގެ ރަސްމީ ގަޑީގައި ރައީސް އޮފީހުން ފޯމު ބަލައިގަންނާނެ އެވެ.
ރައީސް ސޯލިހު ވަނީ ދާދިފަހުން ގައުމީ އިނާމާ ބެހޭ ކޮމިޓީ އަލުން އެކުލަވާލައްވާފަ އެވެ. އެ ކޮމިޓީގެ ޗެއާޕާސަން އަކީ ދައުލަތަށް ގިނަ ދުވަސްތަކެއް ވަންދެން ހިދުމަތް ކޮށްދެއްވި އަނީސާ އަހްމަދު އެވެ.
މިދިޔަ އަހަރު ޝަރަފުވެރިކަމުގެ ގައުމީ އިނާމު ހަތަރު ބޭފުޅަކަށް އަދި ހިތްވަރު ދިނުމުގެ އިނާމު 14 ބޭފުޅަކަށް ރައީސް ސޯލިހު ދެއްވި އެވެ.
