ބަންގްލަދޭޝުން އިތުރު 250 މިލިއަން ޑޮލަރުގެ މާލީ އެހީތެރިކަމަށް ސްރީލަންކާއިން އެދިފައިވާ ކަމަށް ޑެއިލީ މިރާ ނޫހުން ބުނެފި އެވެ.
ލަންކާ ސަރުކާރުން އެދުނީ 250 މިލިއަން ޑޮލަރުގެ ކަރަންސީ ސްވޮޕް އެއްބަސްވުމެއް ގާއިމް ކުރުމަށެވެ. މީގެ ކުރިން ވެސް ދެ ގައުމުން އޭގެ އެއްބަސްވުމެއްގައި ސޮއިކޮށްފައިވެ އެވެ.
މިދިޔަ އަހަރު ދެ ގައުމުން ސޮއިކުރި ކަރަންސީ ސްވޮޕް އެއްބަސްވުމަކީ ވެސް 250 މިލިއަން ޑޮލަރުގެ އެއްބަސްވުމެކެވެ.
ބަންގްލަދޭޝްގެ އިތުރުން ލަންކާ ސަރުކާރުން ދަނީ އިންޑިއާ އާއި ޗައިނާ އަދި ދެކުނު ކޮރެއާގެ އެހީތެރިކަން ވެސް ހޯދަމުންނެވެ.
އެގޮތުން މިދިޔަ އަހަރު ޗައިނާއާ އެކު 1.5 ބިލިއަން ޑޮލަރުގެ ކަރަންސީ ސްވޮޕް އެއްބަސްވުމެއްގައި ސޮއިކުރި އެވެ. އޭގެ ފަހުން މި އަހަރު ވެސް ޗައިނާގެ ލޯނެއް އަދި ކްރެޑިޓް ފެސިލިޓީއެއް ހޯދި އެވެ.
ލަންކާ ސަރުކާރުން އަނެއްކާވެސް ޗައިނާގެ އިތުރު ލޯނަކަށް އެދިފައިވާ އިރު، އެ ލޯން ބޭނުން ކުރާނީ ޗައިނާއަށް ދައްކަން ޖެހޭ ދަރަނިތައް އަދާ ކުރުމަށެވެ.
މިދިޔަ އަހަރު ދެކުނު ކޮރެއާއިން 500 މިލިއަން ޑޮލަރުގެ ލޯނެއް ލަންކާއިން ނެގި އިރު، އިންޑިއާއިން ވެސް ލޯނަކާއި ކްރެޑިޓް ފެސިލިޓީއެއް ވަނީ ހޯދާފަ އެވެ.
