ވިލިމާލޭގައި ގުރޫޕަކުން ހަމަލާދީ މަރާލި ނ. މާޅެންދޫ ވައިޓްހައުސް, އަހުމަދު މިރުޒާ އިބްރާހިމްގެ މަރުގެ މައްސަަލައިގައި މަރަން ހުކުމް ކޮށްފައިވާ ގާތިލަކަށް ހުރިހާ ވާރިސުން މިއަދު މައާފުކޮށްފި އެވެ.
އިސްލާމީ ޝަރީއަތުގައި މަރަށް މަރު ހިފޭނީ މަރާލި މީހާގެ ވާރިސުން އެކަމަށް ބޭނުންވާ ނަމަ އެވެ. އެއީ, ވާރިސުންގެ ހައްގެއްގެ ގޮތަށް އޮންނައިރު އެންމެ މީހަކު އެކަމަށް ދެކޮޅު ހެދި ނަމަވެސް, މަރުގެ އަދަބު ކަނޑައެއް ނޭޅޭނެ އެވެ.
މަރުގެ މައްސަލައެއްގައި މަރަން ހުކުމް ކޮށްފައިވާ ގާތިލަކަށް އެންމެ މަތީ މަރުހަލާގައި ރާއްޖޭގައި ވާރިސުން މައާފުދިން މިއީ ފުރަތަމަ ފަހަރެވެ.
މިރުޒާ މަރުގެ މައްސަލާގައި މަރަން ހުކުމް ކޮށްފައިވަނީ ފުވައްމުލައް ސިޓީ, ޒާވިއާ، އަބްދުﷲ ނަޒީފް އަދި ވ. ފަޒީލާމަންޒިލް, މުހައްމަދު ޝިފާއު އެވެ. މައާފު ދޭން ވާރިސުން ބޭނުންވާ ކަމަށް ބުނެފައިވަނީ އޭގެ ތެރެއިން ނަޒީފަށެވެ.
ނަޒީފަށް ކޮށްފައިވާ މަރުގެ ހުކުމް ހައިކޯޓުން ވެސް ދަމަހައްޓާފައިވާއިރު, އެ މައްސަލަ މިހާރު ވަނީ ނަޒީފްގެ ފަރާތުން ސުޕްރީމް ކޯޓުގައި އިސްތިއުނާފުކޮށްފަ އެވެ. މައްސަލާގައި ކުރިން ސުޕްރީމް ކޯޓުގައި ބޭއްވި އަޑުއެހުމުގައި އެއް މިރުޒާގެ ބައްޕަ ނަޒީފަށް މައާފްދޭން ބޭނުންވާ ކަމަށް ބުނެ ސިޓީ ފޮނުވާފައިވާކަން ދައުލަތުން ހާމަކޮށްފަ އެވެ.
ނަޒީފަށް މައާފުދޭން ބޭނުންވާ ސަބަބެއް ކަމަށް އޭނާ ސިޓީގައި ފާހަގަކޮށްފައިވަނީ ދައުލަތުގެ ވަކީލް ވިދާޅުވި ގޮތުގައި, ނަޒީފް ކުށަށް އިއުތިރާފުވެފައިވާތީ މާފުކޮށްދިނުމަށް އެދުމުންނެވެ. ނަމަވެސް, ނަޒީފް ކޯޓުގައި ކުށަށް އިއުތިރާފުވެފައެއް ނުވެ އެވެ.
އޭގެފަހުން މިއަދު ސުޕްރީމް ކޯޓުގައި ބޭއްވި އަޑުއެހުމުގައި މިރުޒާގެ ބައްޕަ ފޮނުވާފައިވާ ސިޓީ ޔަގީން ކުރުމަށް ހުރިހާ ވާރިސުން ކޯޓަށް ހާޒިރުކޮށް, އެމީހުންގެ ބަސް ހޯދި އެވެ. މައްސަލަ ބައްލަވާ ބެންޗުން މިރުޒާގެ ބައްޕަ އިބްރާހިމް ހަސަންއާ ސުވާލުކުރުމުން ބުނީ "އަޅުގަނޑު ވާނީ މައާފު ދެއްވާފައި," ކަމަށެވެ. މާފު ދިނީ އިބްރާހިމް ހަސަން ބުނި ގޮތުގައި, ނަޒީފުގެ ފަރާތުން ބައްދަލުކޮށް, މާފުދިނުމަށް އެދުމުންނެވެ.
ދެން ތިބި ވާރިސުންނާ ސުވާލުކުރުމުން އެމީހުން ވެސް ވަނީ ނަޒީފަށް މައާދީފައިވާ ކަމަށް ބުނެފަ އެވެ. އެމީހުން ބުނި ގޮތުގައި, ނަޒީފަށް މާފުދޭން ނިންމީ, ބައްޕަ މާފުދިނުމުންނެވެ.
އޭގެފަހުން ވެސް ބެންޗުން އިބްރާހިމް ހަސަންއާ ސުވާލުތައް ކުރި އެވެ. އެގޮތުން, މައާފުދިނީ އެއްވެސް ބިރެއް ދައްކައި ނުފޫޒެއްގެ ސަބަބުންތޯ އެއްސެވެ އެވެ. އޭގެ ޖަވާބުގައި އޭނާ ބުނީ, އޭނާއަށް އެއްވެސް ބިރެއް ދައްކާފައިނުވާ ކަމަށެވެ. ނަމަވެސް, އޭނާ ގަބޫލު ކުރާ ގޮތުގައި މައްސަލާގައި ގިނަ ދުވަސްވެފައިވުމާއި, އޭނާގެ އަހުލާގު މިހާރު ރަނގަޅު ވެފައިވާ ކަމަށް އާއިލާއިން ބުނާތީ, މާފުދިނުމަކީ އެންމެ ރަނގަޅު ގޮތް ކަމުގަ އެވެ.
އަދި, ނަޒީފުގެ އިއުތިރާފު މާފަށް އެދިފައިވަނީ, އޭނާ ކުށް ކުރުމުން ކަމަށް ގަބޫލުކުރާތީ ކަމަށް ވެސް މިރުޒާގެ ބައްޕަ ބުންޏެވެ. އޭނާ ބުނި ގޮތުގައި, މައާފުދޭން ނިންމީ, ދީނީ އިލްމްވެރިޔެއްގެ ލަފާ ވެސް ހޯދައިގެންނެވެ.
ނަޒީފްގެ ވަކީލް އިސްމާއިލް މުހައްމަދު މިއަދު ވިދާޅުވި ގޮތުގައި, ނަޒީފު ކުށަށް އިންކާރުކުރި ނަމަވެސް, އޭނާގެ އާއިލާ އާއި ރަހުމަތްތެރިން މިރުޒާގެ އާއިލާއާ ބައްދަލުކުރި ކަމާއި, ނަޒީފު ކުށެއް ނުކުރި ނަމަވެސް, މިރުޒާގެ ފުރާނަ ގެއްލިފައިވާތީ އެކަމާ އޭނާ ހިތާމަކުރާ ކަމަށް ވަކީލް ވިދާޅުވި އެވެ.
ނަޒީފަށް ވާރިސުން މައާފުކޮށްފައިވާއިރު, ދެން ސުޕްރީމް ކޯޓުގައި އޭނާގެ މައްޗަށް ކުށް ސާބިތުވި ނަމަވެސް މަރުގެ ހުކުމެއް ކަނޑައެއް ނޭޅޭނެ އެވެ. އޭގެ ބަދަލުގައި އިއްވަން ޖެހޭނީ އުމުރު ދުވަހުގެ ޖަލު ހުކުމެވެ.
