ރަޝިއާގެ ސިފައިން ޔޫކްރެއިނަށް އަރައި ހަނގުރާމަ ފެށިތާ މަހެއް ފުރިފައި ވަނިކޮށް، ރަޝިއާގެ ފޮރިން މިނިސްޓަރު ސާގެއި ލެވްރޯވް މި ހަފްތާގައި އިންޑިއާއަށް ދަތުރެއް ކުރައްވަން ހަމަޖެހިއްޖެ އެވެ.
މިއީ ރަޝިއާއިން ޔޫކްރެއިންގައި ހަނގުރާމަ ފެށި ފަހުން ރަޝިއާގެ އިސް އޮފިޝަލަކު އިންޑިއާއަށް ކުރައްވާ ފުރަތަމަ ދަތުރެވެ. ހުޅަނގުގެ ގައުމުތަކުގެ އޮފިޝަލުން ވެސް ދާދި ފަހުން އިންޑިއާއަށް ދަތުރު ކުރެއްވި އެވެ.
ޔޫކްރެއިންގައި ހަނގުރާމަ ފެށުމުން އިންޑިއާއިން މިހާތަނަށް ރަޝިއާއަށް ފާޑުކިޔާފައި ނުވާ އިރު، ހުޅަނގުން ބޭނުން ވަނީ އިންޑިއާގެ ވިސްނުން ބަދަލު ކުރުމަށެވެ.
އިންޑިއާގެ ނޫސްތަކުން ބުނީ ލެވްރޯވްގެ ދަތުރުގައި މަޝްވަރާ ކުރާނީ ހަނގުރާމައިގެ ސަބަބުން އުފެދިފައިވާ ސްޓްރެޓެޖިކް މައްސަލަތަކާއި، ރަޝިއާގެ ތެޔޮ އިންޑިއާއަށް ވިއްކުމާއި، ފައިސާ ދެއްކޭނެ ނިޒާމުތައް ރޭވުމާ ގުޅޭ ގޮތުން ކަމަށެވެ.
ހުޅަނގުން އެޅި ފިޔަވަޅުތަކާ އެކު ރަޝިއާ ވަނީ ބައިނަލްއަގްވާމީ ބޭންކިން ނިޒާމް ސްވިފްޓުން އެކަހެރިކޮށްފަ އެވެ. އެހެންކަމުން، ފައިސާގެ މުއާމަލާތްތައް ކުރުމަށް ރަޝިއާއަށް ހުރަސްތައް އެބަ ހުއްޓެވެ.
އޭގެ އިތުރުން ރަޝިއާއިން އިންޑިއާއަށް އަސްކަރީ ސާމާނު ސަޕްލައި ކުރުމަށް އެކުލަވާލާފައިވާ އެއްބަސްވުންތަކާ އެއް ގޮތަށް، ސަޕްލައި ނުކުރެވުމުގެ ފުރުސަތު އޮތުމުން އެކަމާ ގުޅޭ މަޝްވަރާތައް ވެސް ކުރާނެ ކަމަށް ބެލެވެ އެވެ.
މިދިޔަ ހަފްތާގައި އިންޑިއާގެ ޕާލިމެންޓުގައި ސަރުކާރުގެ މެމްބަރުން ވިދާޅުވީ ރަޝިއާގެ ތެޔޮ ހާއްސަ ޑިސްކައުންޓް އަގެއްގައި ގަތުމާ މެދު ސަރުކާރުން ވިސްނަމުންދާ ކަމަށެވެ.
