މީގެ ދެ އަހަރު ކުރިން ކޮވިޑް ބަލިމަޑުކަން ފެށި ފަހުން ޗައިނާގެ ސިޓީއެއްގައި އެންމެ ބޮޑު ލޮކްޑައުން ތަންފީޒު ކުރަން އިއުލާންކޮށްފި އެވެ.
އިދާރާތަކުން ކޮވިޑަށް ޓެސްޓު ކުރަމުންދާ އިރު، ނުވަ ދުވަސް ވަންދެން، ދެ މަރުހަލާއަކަށް ބަހާލައިގެން ޝަންހާއީ ސިޓީ ލޮކްޑައުން ކުރާނެ އެވެ.
މާލީ ދާއިރާގެ މައި މަރުކަޒެއްގެ ގޮތުގައި މަގްބޫލް ޝަންހާއީގައި ފާއިތުވި މަސް ތެރޭގައި ކޮވިޑް ކޭސްތައް ވަނީ އިތުރު ވާން ފަށާފަ އެވެ.
ފަންސަވީސް މިލިއަން މީހުން ދިރިއުޅޭ ޝަންހާއީ ލޮކްޑައުންކޮށްފި ނަމަ އިގްތިސާދަށް އަސަރު ކުރުމުގެ ފުރުސަތު އޮތުމުން، މީގެ ކުރިން އެ ސިޓީ ލޮކްޑައުންކޮށްފައެއް ނުވެ އެވެ.
ނަމަވެސް ހޮނިހިރު ދުވަހު ޝަންހާއީގައި ކޮވިޑް ކޭސްތައް ވަރަށް ބޮޑަށް މަތިވުމާ އެކު އިދާރާތަކުގެ ވިސްނުން ވަނީ ބަދަލުކޮށްފަ އެވެ.
ޝަންހާއީގެ އިރުމަތީ ސަރަހައްދު ބަންދު ކުރާނީ ހޯމަ ދުވަހުން ފެށިގެން އެޕްރީލް އެއް ވަނަ ދުވަހާ ހަމައަށެވެ. އަދި ހުޅަނގު ސަރަހައްދު ބަންދު ކުރާނީ އެޕްރީލް އެއް ވަނަ ދުވަހު ފަސް ވަނަ ދުވަހަށެވެ.
އެ މުއްދަތުގައި އާއްމު ދަތުރުފަތުރު މެދުކަނޑާލައި، ފެކްޓްރީތަކުގެ މަސައްކަތް ވެސް މެދުކަނޑާލާނެ އެވެ. އަދި އޮފީސްތަކުގެ މަސައްކަތް ކުރަން ޖެހޭނީ ގޭގައި ތިބެގެންނެވެ.
މީގެ ކުރިން ވެސް ޗައިނާގެ ބައެއް ސިޓީތަކުގެ ސަރަހައްދުތަކާއި އަވަށްތައް ލޮކްޑައުންކޮށްފައިވެ އެވެ. ނަމަވެސް ޝަންހާއީއަކީ މިހާތަނަށް ލޮކްޑައުން ކުރާ އެންމެ ބޮޑު ސަރަހައްދެވެ.
ޗައިނާގައި އޮމިކްރޯން ވޭރިއެންޓާ ހެދި ކޮވިޑް ފެތުރުން އިތުރުވި ނަމަވެސް، އެހެން ގައުމުތަކާ އަޅާ ބަލާއިރު އެ ގައުމުން ފެންނަނީ މަދު ކޭސްތަކެކެވެ.
ނަމަވެސް ޗައިނާ ސަރުކާރުން ގެންގުޅެނީ "ޒީރޯ ކޮވިޑް" ގެ ސިޔާސަތެއް ކަމުން، މަދު ކޭސްތަކެއް ފެނުނު ނަމަވެސް ހަރުކަށި ފިޔަވަޅުތައް އަޅަމުންދެ އެވެ. އާދީއްތަ ދުވަހު މުޅި ޗައިނާއިން ރިޕޯޓުކުރީ 4،500 ކޭސް އެވެ.
