ސްޓެލްކޯގެ ވެބްސައިޓާއި މޯބައިލް އެޕްލިކޭޝަނާއި މޯބައިލް އައުޓްލެޓްތަކަށް ދިން ސައިބާ ހަމަލާއެއްގެ ސަބަބުން އެ ހިދުމަތްތައް ހުއްޓިއްޖެ އެވެ.
ސްޓެލްކޯއިން މިއަދު ބުނީ އެކުންފުންޏަށް ކުރިމަތިވީ ރޭންސަމްވެއާ އެޓޭކެއް ކަމަށެވެ. އެހެންވެ ވެބްސައިޓާއި މޯބައިލް އެޕާއި މޯބައިލް އައުޓްލެޓްތައް އަދި ކައުންޓަރުތަކުން ދެމުން އައި ހުރިހާ ހިދުމަތެއް މިދިޔަ ބުރާސްފަތި ދުވަހުން ފެށިގެން ހުއްޓިފައިވާ ކަމަށް ވެސް އެ ކުންފުނިން ބުންޏެވެ.
"މައްސަލަ ހައްލުކޮށް، ކަސްޓަމަރުންނަށް އޮންލައިންކޮށާއި، ކައުންޓަރުތައް މެދުވެރިކޮށް ދެމުންއައި ހިދުމަތްތައް އަލުން ފޯރުކޮށް ދިނުމަށް އަދިވެސް އިތުރު ވަގުތު ނަގާނެކަމަށް ބެލެވޭ. މި މައްސަލަ ވީ އެންމެ އަވަހަކަށް ހައްލު ކުރުމަށްޓަކައި،" ސޯޝަލް މީޑިއާގައި ޖެހި ޕޯސްޓެއްގައި ސްޓެލްކޯއިން ބުންޏެވެ.
އެކުންފުނިން ބުނީ އައިޓީ ނެޓްވޯކަށް ދިމާވި އެ މައްސަލަ ހައްލުކުރަން އައިޓީ އިންޖިނޭރުން މެދުނުކެނޑި މަސައްކަތްކުރަމުން އަންނަ ކަމަށާއި ހިދުމަތްތައް ހުއްޓުމުން ކަސްޓަމަރުންނަަށް ދިމާވެދާނެ ދަތިތަކަށް މައާފަށް އެދޭ ކަމަށެވެ.
ސަރުކާރުގެ އިދާރާތަކާއި ކުންފުނިތަކަށް ސައިބާ ހަމަލާ ދިނުމަކީ ރާއްޖޭގައި ފަހަކަށް އައިސް ގިނައިން ހިނގާ ކަމެކެވެ.
