ރާއްޖޭގައި ބޭއްވޭ އެންމެ ފޯރިގަދަ ފުޓްސަލް މުބާރާތް، ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2022 ގައި މިހާތަނަށް ވަނީ 174 މެޗު ކުޅެވިފަ އެވެ. މުބާރާތުގައި ބާކީ އޮތް ތިން މެޗަކީ ގިނަ ބަޔެއްގެ ލޯ އަމާޒުވާނެ މެޗުތަކެކެވެ. އެއީ މިރޭ ކުޅޭ ދެ ސެމީ ފައިނަލާއި އަންނަ ބުދަ ދުވަހުގެރޭ ކުޅޭ ފައިނަލް މެޗެވެ. މިރޭ ސެމީ ފައިނަލުގައި ކުޅެން އޮތް ދެ މެޗަށް ބަލާއިރު، ފުރަތަމަ ސެމީ ފައިނަލުގައި ކ.ގާފަރު ނުކުންނާނީ ޏ. ފުވައްމުލަކު މާލެގަންއާ ދެކޮޅަށެވެ. އަދި ދެ ވަނަ ސެމީ ފައިނަލުގައި އެންމެ ފަހުގެ ޗެމްޕިއަން، ތ. ތިމަރަފުށި ބައްދަލުކުރާނީ ދ. ކުޑަހުވަދޫއާ އެެވެ.
ސެމީ ފައިނަލް 1: މާލެގަން - ގާފަރު (މިރޭ، 20:15)
މި ފަހަރުގެ ގޯލްޑަން ފުޓްސަލް ޗެލެންޖްގައި މިހާތަނަށް އައިއިރު، މާލެގަން މުބާރާތުގެ ގަދަ ހަތަރު ޓީމުގެ ތެރޭގައި އޮތުމަކީ އެ ޓީމުން ކުރި މަސައްކަތް އަގުވަޒަންކުރަން ޖެހޭ ސަބަބެކެވެ. މާލެގަން ޓީމުން ފުރަތަމަ ފެށިިއިރު، ޓީމުގެ މުހިންމު ބައެއް ކުޅުންތެރިން ނެތި އެ ޓީމުން ނަތީޖާ ނެރުނެވެ. އެކަމަކު، ޒޯން ބުރުން ފެށިގެން މާލެގަން ޓީމުގެ މުހިންމު، ކުޅުންތެރިން ޓީމާ ގުޅި، ނޮކައުޓް ބުރުގައި މި ވަނީ ނަތީޖާ ނެރެފަ އެވެ.
ގަދަ 16 ބުރުގައި މާލެގަން ޓީމުން ވަނީ ށ. ކަނޑިތީމު ބަލިކޮށްފަ އެވެ. މުބާރާތުގައި ރަނގަޅު ފޯމެއްގައި ކުޅެމުން އައި ކަނޑިތީމުގެ މައްޗަށް މާލެގަން އިން ކުރިހޯދީ މޮޅަށް ކުޅެގެންނެވެ. ކުއާޓާ ފައިނަލުގައި ހުޅުމާލެ އަތުން މާލެގަން މޮޅުވިިއިއިރު، އެ ޓީމުގެ ތަރިންނަކީ މުހައްމަދު ސާދު ނިޒާރު, އިބްރާހިމް އަރީޝް އަދި މެޗުގެ މޮޅު ކުޅުންތެރިއަކަށް ހޮވުނު ގޯލްކީޕަރު އަހުމަދު ޝަރަފް އެވެ. ޓީމު ލީޑުކުރުމުގައި އަޖުމަލް އަހުމަދު ވެސް މުހިންމު ރޯލެއް އަދާކުރެ އެވެ.
މި ފަހަރުގެ މުބާރާތުން ފެށިގެން މިހާތަނަށް ދަނޑު ބޭރުން ފޯރިނަގައި، މޮޅު ކުޅުމެއް ދައްކަމުން އަންނަ އެއް ޓީމަކީ ގާފަރެވެ. ގާފަރު ޓީމަކީ ފުޓްސަލް ތަރިން ގިނަ، މަޝްހޫރު ކުޅުންތެރިން ގިނަ ޓީމެއް ވެސް މެ އެވެ. އެ ގޮތުން އެ ޓީމުން މިހާތަނަށް މި މުބާރާތުގައި ކުޅުނު އެއް މެޗު ފިޔަވައި ކޮންމެ މެޗަކުން މޮޅުވެފައިވާއިރު، ޓީމުގެ އެޓޭކުގައި އެންމެ މުހިންމު ރޯލެއް ކުޅޭ އެއް ކުޅުންތެރިއަކީ އަލީ މާއިސް (މައްޓު) އެވެ. މައްޓު ވަނީ ގާފަރުން ނޮކައުޓް ބުރުގައި ގއ. ކޮނޑޭ އާއި މާފަންނު ބަލިކުރިއިރު، މޮޅު ކުޅުމެއް ދައްކައި މުހިންމު ގޯލުތަކެއް ޖަހައިފަ އެވެ. ގާފަރުގެ ގޯލު ބެލެހެއްޓުމުގައި ހުށިޔާރު، ކުޅުމެއް ދައްކަމުން އަންނަ ފައްޔާޒު ފަޔާޒް (ފައިއްޓެ) އަކީ ވެސް ޓީމު މިހާ ހިސާބަށް ގެންގޮސްދިނުމުގައި މުހިންމު ހިއްސާދާރެކެވެ.
ސެމީ ފައިނަލް 2: ތިމަރަފުށި - ކުޑަހުވަދޫ (މިރޭ، 22:15)
އެންމެ ފަހުގެ ޗެމްޕިއަން ތިމަރަފުށްޓައް މި ފަހަރުގެ މުބާރާތުގައި ކުޅުނު މެޗުތަކުން ކާމިޔާބު ނުކުރެވުނު ހަމައެކަނި މެޗަކީ ޒޯން ބުރުގައި ކުޑަހުވަދޫއާ ބައްދަލުކުރި މެޗެެވެ. ޒޯން ބުރުގައި ކުޑަހުވަދޫ އާއި ތިމަރަފުށީގެ ކުރިމަތިލުން ނިމުނީ 2-2 އިން އެއްވަރުވެގެންނެވެ. ދެ ޓީމަށް ވެސް ލީޑުލިބުނު މި މެޗުގައި ފެނުނީ ފޯރިގަދަ ކުޅުމެކެވެ.
ކުޑަހުވަދޫން ނޮކައުޓް ބުރު ފަށައިގެން ދެ މެޗުން ވެސް މޮޅުވީ ޕެނަލްޓީ ޖަަހައިގެންނެވެ. ގަދަ 16 ބުރުގައި އިހަވަންދޫ އަތުން ޕެނަލްޓީގައި މޮޅުވިއިރު، ކުއާޓާ ފައިނަލުގައި ވަނީ އެންމެ ފަހުގެ ރަނަރަޕް ބ. އޭދަފުށި އަތުން ޕެނަލްޓީ ޖަހައިގެން މޮޅުވެފަ އެވެ. ކުޑަހުވަދޫން މި ފަހަރުގެ މުބާރާތުގައި ދައްކަމުން އަންނަ މޮޅު ކުޅުމުގެ އެންމެ ބޮޑު ކްރެޑިޓެއް ހައްގުވާ އެއް ކުޅުންތެރިއަކީ އެ ޓީމުގެ ގިނަ މެޗުތަކެއްގެ މޮޅު ކުޅުންތެރިއަކަށް ހޮވުނު ޖުމައިލް ޖަލީލް (ޖުމްބެ) އެވެ. އޭގެ އިތުރުން އެ ޓީމުގެ ގޯލު ބަލަހައްޓަމުން އަންނަ އަބްދުލް މާނިއު ވަނީ ޕެނަލްޓީ ޖަަހައިގެން ދެ ފަހަރު މޮޅުވިއިރު ތަފާތު ދައްކައިފަ އެވެ.
އަތޮޅު ޗެމްޕިއަންކަމާއި ޒޯން ޗެމްޕިއަންކަން މި ފަހަރު ވެސް ހޯދާފައިވާ ތިމަރަފުށިން މިރޭގެ ސެމީއާ ކުރިމަތިލާނީ ސަސްޕެންޝަނުގެ ސަބަބުން ޓީމުގެ ކެޕްޓަން އިބްރާހިމް ސިނާހު (ސިނާ) ނެތި އެވެ. ތިމަރަފުށިން މި ފަހަރުގެ ނޮކައުޓް ބުރުގައި ނުކުމެފައިވަނީ މި ފަހަރުގެ މުބާރާތުގައި އަތޮޅު ޗެމްޕިއަންކަން ހޯދި ދެ ޓީމާ ދެކޮޅަށެވެ. ގަދަ 16 ބުރުގައި ތިމަރަފުށިން ފަހަތުން އަރައި އއ. މަތިވެރި ބަލިކުރިިއިރު، ކުއާޓާ ފައިނަލުގައި ބޮޑު ތަފާތަކުން ރ. ދުވާފަރުގެ މައްޗަށް ކުރިހޯދި އެވެ. ސެމީ ފައިނަލުގައި ކުޑަހުވަދޫއާ ދެކޮޅަށް ކުޅޭއިރު، ނޮކައުޓް ދެ މެޗުގައި ޖެހި 12 ގޯލާ އެކު ތިމަރަފުށި އޮތީ ކޮންފިޑެންސް ލެވަލް ރަނގަޅުކޮށެވެ. ނޮކައުޓް ބުރުގައި އެންމެ ގިނަ ގޯލު ތިމަރަފުށިން ޖެހިއިރު، އެ ޓީމުގެ އިބްރާހިމް އަސްވަދު (ގަބޭ)، އާދަމް ނާސިހު (އާދަންނާ)، އަލީ ސިފާއު (ރޮނާ) އަދި އިސްމާއިލް މުނީޒް ވަނީ މުހިންމު ގޯލުތަކެއް ޖަހައިފަ އެވެ.
