ސިންގަޕޫރް (މާޗް 24) - ކޮވިޑް ވެކްސިން ފުރިހަމަކޮށްފައިވާ މީހުންނަށް އަންނަ ހަފްތާއިން ފެށިގެން އެއްވެސް ހުރަހެއް ނެތި ސިންގަޕޫރަށް އެތެރެވެވޭނެ ކަމަށް ބޮޑު ވަޒީރު ލީ ސިއެން ލޫންގް އިއުލާން ކުރައްވައިފި އެވެ.
ސިންގަޕޫރާ އެކު އިރުމަތީ އޭޝިއާގެ ގިނަ ގައުމުތަކުން ދަނީ ފިޔަވަޅުތައް އުވާލަމުންނެވެ. ވެކްސިން ފުރިހަމަކޮށްފައިވާ ހުރިހާ އެންމެންނަށް ސިންގަޕޫރް ހުޅުވާލަން ނިންމި އިރު، މީގެ ކުރިން ވެސް އެ ގައުމުން ވަނީ ބައެއް ގައުމުތަކުގެ ރައްޔިތުންނަށް އެ ފުރުސަތު ފަހިކޮށްފަ އެވެ.
އޮފިޝަލުން ބުނީ އޭޕްރިލް އެއް ވަނަ ދުވަހުން ފެށިގެން ވެކްސިން ފުރިހަމަކޮށްފައިވާ ހުރިހާ ބޮޑެތި މީހުންނާއި ވެކްސިން ނުޖަހާ ތިބި ކުޑަކުދިންނަށް ކަރަންޓީންވުމެއް ނެތި ސިންގަޕޫރަށް އެތެރެވެވޭނެ ކަމަށެވެ. ނަމަވެސް, ދަތުރު ފެށުމުގެ ކުރިން ކޮވިޑަށް ޓެސްޓު ކުރަން ޖެހޭނެ އެވެ.
"މީގެ ސަބަބުން ވިޔަފާރިތަކާއި، ވަކިން ހާއްސަކޮށް ފަތުރުވެރިކަމުގެ ސިނާއަތަށް ބޭނުންވާ ކުރިއެރުން ވަރަށް ބޮޑަށް ލިބޭނެ. ވިޔަފާރި އާއި ވައިގެ ދަތުރުފަތުރުގެ މައި މަރުކަޒެއްގެ ގޮތުގައި އަލުން ސިންގަޕޫރް ވަރުގަދަ ކުރެވޭނެ،" ޓީވީ މެދުވެރިކޮށް ބޮޑު ވަޒީރު ވިދާޅުވި އެވެ.
އޮފިޝަލުން ބުނީ އޭޕްރިލް މަހުން ފެށިގެން ސިންގަޕޫރަށް ދަތުރު ކުރުމުގައި ހުރަސްތައް އޮންނާނީ "ރެސްޓްރިކްޓެޑް" ލިސްޓުގައި ހިމެނޭ ފަރާތްތަކަށް އެކަނި ކަމަށެވެ. ނަމަވެސް, އެ ލިސްޓުގައި މި ވަގުތު އެއްވެސް ގައުމެއް ހިމަނާފައެއް ނުވެ އެވެ.
އޭގެ އިތުރުން ސިންގަޕޫރުގައި އަޅާފައިވާ ގިނަ ފިޔަވަޅުތަކެއް ވެސް ވަނީ އުވާލާފަ އެވެ. އެގޮތުން ބޭރުގައި އުޅޭއިރު މާސްކު އެޅުން މަޖުބޫރު ނުވުމާއި، އެއް ފަހަރާ 10 މީހުންނަށް އެއް ތަނެއްގައި ތިބެވޭނެ ގޮތް ހަދާފައިވެ އެވެ.
ކޮވިޑް ބަލިމަޑުކަން ފެށުމުން 5.5 މިލިއަންގެ އާބާދީއެއް އޮންނަ ސިންގަޕޫރުން ބޯޑަރު ބަންދުކޮށް، ހަރުކަށި ލޮކްޑައުންތައް ތަންފީޒު ކުރި އެވެ. މިދިޔަ އަހަރު ދޭތެރެ ދޭތެރެއިން ހަލުވިކަމާ އެކު ސިންގަޕޫރުގައި ބަލި ފެތުރުނެވެ.
ދުނިޔޭގައި ވެކްސިން ރޭޓް އެންމެ ރަނގަޅު ގައުމުތަކުގެ ތެރޭގައި ސިންގަޕޫރު ހިމެނޭ އިރު، ސަރުކާރުގެ މިހާރުގެ ސިޔާސަތަކީ ވައިރަހާ އެކު އުޅެން ދަސްކުރުމެވެ.
