އަންނަ އާދީއްތަ ދުވަހު އޮންނަ އޮސްކާ އެވޯޑް ހަފްލާގައި ބިޔޯންސޭ އާއި ބިލީ އެއިލިޝްގެ ހުށަހެޅުމެއް ފެންނާނެކަން އިއުލާންކޮށްފި އެވެ.
އެ ދެ އާޓިސްޓުންނަކީ 94 ވަނަ އެކެޑެމީ އެވޯޑުގައި އެންމެ މޮޅު ލަވަޔަށް ނޮމިނޭޓްވެފައިވާ ދެ އާޓިސްޓުންނެވެ.
ބިޔޯންސޭގެ ލަވަ "ބީ އެލައިވް" ނޮމިނޭޓްވީ ވިލް ސްމިތްގެ ފިލްމް "ކިންގް ރިޗަޑް" އިންނެވެ. އެއިލިޝް އާއި އޭނާގެ ބޭބެ ފިނިއަސް ހުށަހަޅާނީ އެންމެ ފަހުން ނެރުނު ޖޭމްސް ބޮންޑް ފިލްމަށް އެ މީހުން ތައްޔާރު ކުރި "ނޯ ޓައިމް ޓު ޑައި" ލަވަ އެވެ.
އެންމެ މޮޅު ލަވަޔަށް ނޮމިނޭޓްވެފައިވާ އިތުރު ތިން އާޓިސްޓުން ހިމެނޭ އިރު، އޭގެ ތެރެއިން ދެ އާޓިސްޓުން ހަފްލާގައި ލަވަ ހުށަހަޅާނެ އެވެ.
އޭގެ އިތުރުން ބްލިންކް-182 ބޭންޑްގެ ޑްރަމަރު ޓްރޭވިސް ބާކާ އާއި ޑީޖޭ ޑީ-ނައިސް ހިމެނޭ "ތަރިންގެ ބޭންޑެއްގެ" ހުށަހެޅުމެއް ވެސް ހަފްލާގައި އޮންނާނެ ކަމަށް ރިޕޯޓުތައް ބުނެ އެވެ.
މި އަހަރުގެ އޮސްކާ އެވޯޑް ޝޯ ހުށަހަޅައިދޭނީ ތިން އަންހެން ކޮމެޑީ ތަރިން، ރެޖީނާ ހޯލް، އޭމީ ޝޫމާ އަދި ވޮންޑާ ސައިކްސް އެވެ.
މާޗް 27 ވަނަ ދުވަހު ހޮލީވުޑްގެ ޑޮލްބީ ތިއޭޓަރުގައި އޮންނަ 94 ވަނަ އެކެޑެމީ އެވޯޑް ހުށަހަޅައިދޭން ތިން އަންހެން ތަރިން ހޮވިއިރު، ފާއިތުވި ތިން އަހަރު ޝޯ ބޭއްވީ ހޯސްޓެއް ނެތި އެވެ.
މި އެވޯޑް ޝޯ ހުށަހެޅުމުގެ ފުރުސަތު އެއް ފަހަރާ ތިން ތަރިންނަށް ނުލިބޭތާ 35 އަހަރު ވެއްޖެ އެވެ. އެންމެ ފަހުން އެގޮތަށް ޝޯ ހުށަހެޅީ 1987 ވަނަ އަހަރު ޗެވީ ޗޭސް، ގޯލްޑީ ހޯވްން އަދި ޕައުލް ހޯގަން އެވެ. އަދި މިއީ ތިން އަންހެން ތަރިން އެކުގައި ޝޯ ހުށަހަޅަން ލިބޭ ފުރަތަމަ ފަހަރެވެ.
އެންމެ ފަހުން އެ އެވޯޑް ޝޯ ހުށަހަޅައިދިނީ އޭބީސީ އިން ދައްކާ ލޭޓް ނައިޓް ޝޯގެ ހޯސްޓް ޖިމީ ކިމެލް 2018 ވަނަ އަހަރު އެވެ. އޭގެ ފަހުން 2019 ގެ ޝޯއަށް ހަމަޖެއްސީ ކޮމީޑިއަން ކެވިން ހާޓް އެވެ.
ނަމަވެސް ކެވިން ހާޓް ކުރި ޓްވީޓްތަކަކާ ގުޅިގެން ފާޑުކިޔުން އަމާޒުވެ، އޭނާ ނިންމީ ޝޯއިން ވަކިވުމަށެވެ. އެއާ އެކު އެ އަހަރު ޝޯ ކުރިއަށް ދިޔައީ ހޯސްޓެއް ނެތި އެވެ.
އޭގެ ފަހުން 2020 ވަނަ އަހަރާއި 2021 ވަނަ އަހަރު ވެސް އެކެޑެމީ އޮފް މޯޝަން ޕިކްޗާ އާޓްސް އެންޑް ސައިންސަސްގެ ޝޯ ބޭއްވި ހުށަހެޅުންތެރިއަކު ނުލަ އެވެ.
އޮސްކާ އެވޯޑަށް އޮންނަ ތަރުހީބު ފަހަކަށް އައިސް ވަނީ ދަށްވާން ފަށާފަ އެވެ. މިދިޔަ އަހަރު ޝޯގެ ރޭޓިން ދުވަހަކު ވެސް ދަށަށް ނުދާ މިންވަރަށް ދަށަށް ދިޔަ އެވެ.
