ހޯމަ ދުވަހު 132 މީހުންނާ އެކު ދަތުރު ކުރަމުން ދަނިކޮށް ދެކުނު ޗައިނާއަށް ވެއްޓުނު މަތިންދާބޯޓުން އެކަކު ވެސް ސަލާމަތް ނުވާ ކަމަށް ރިޕޯޓުތައް ބުނެފި އެވެ.
ޗައިނާ އީސްޓާންގެ ފްލައިޓް އެމްޔޫ5735 ވެއްޓުނު ސަބަބު ވެސް ތަހުގީގު ޓީމުތަކަށް މިހާތަނަށް ހޯދިފައެއް ނުވެ އެވެ.
ބޮއިންގް 800-737 މަރުކާގެ ބޯޓު ވެއްޓުނު ހިސާބަކީ އެކި އުސްމިނުގެ ފަސްގަނޑު ހުރި ހިސާބަކަށް ވާތީ، ރެސްކިއު ޓީމުގެ މަސައްކަތަށް ވަނީ ބޮޑު ގޮންޖެހުމަކާ ކުރިމަތިވެފަ އެވެ.
ބޯޓު ވެއްޓުމުން ޗައިނާގައި ހިތާމަ ފާޅުކުރަމުންދާ އިރު، ޕަސެންޖަރުންނާއި ކްރޫގެ އާއިލާތަކުން މަޑުކޮށްގެން ތިބީ ބޯޓާ ގުޅޭ އެއްވެސް ހަބަރެއް ލިބޭނެ އިރަކަށެވެ.
ބޯޓު ވެއްޓުމާ އެކު އޭގެ ހުޅުގަނޑުގެ ސަބަބުން ޖަންގަލީގައި އަލިފާން ރޯވެފައިވާ އިރު، ރެސްކިއު ޓީމުގެ އެތައް ސަތޭކަ ބަޔަކު ދަނީ އެ ސަރަހައްދުގައި ހަރަކާތްތެރިވަމުންނެވެ.
ހާދިސާ ހިނގިތާ 36 ގަޑިއިރު ފާއިތުވެގެން ދިޔައިރު ވެސް، ބޯޓުގައި ތިބި މީހުންނާ ގުޅޭ އެއްވެސް ހަބަރެއް ކަމާ ބެހޭ އިދާރާތަކުން ހާމައެއް ނުކުރެ އެވެ.
ނަމަވެސް އަންގާރަ ދުވަހުގެ ރޭ ޗައިނާގެ ސިވިލް އޭވިއޭޝަން އެޑްމިނިސްޓްރޭޝަނުން ނިއުސް ބްރީފިން ބޭއްވުމަށް ފަހު ބުނީ މިހާތަނަށް ދިރިހުރި މީހަކު ނުފެންނަ ކަމަށެވެ.
"މި ވަގުތާ ހަމައަށް ލިބެން ހުރި މައުލޫމާތަށް ބަލާއިރު، ބޯޓު ވެއްޓެން ދިމާވި ސަބަބާ ގުޅޭ ގޮތުން ސާފުކޮށް ވަކި އެއްޗެއް ބުނާކަށް ނޭނގޭ،" އެ އިދާރާގެ އޭވިއޭޝަން ސޭފްޓީ އޮފީސް ޑައިރެކްޓަރު ޒޫ ޓާއޯ ވިދާޅުވި އެވެ.
ފްލައިޓް ބިމަށް ވެއްޓެން ފެށުމާ އެކު، އެއާ ޓްރެފިކް ކޮންޓްރޯލްގެ މުވައްޒަފުން ތަކުރާރުކޮށް ކްރޫއަށް ގުޅި ނަމަވެސް، އެއްވެސް ޖަވާބެއް ނުލިބޭ ކަމަށް އޭނާ ވިދާޅުވި އެވެ.
ބޯޓު އަނދާ ހުލިވެފައިވާ އިރު، އޭގެ ބައެއް ބައިތައް ރެސްކިއު ޓީމަށް ވަނީ ފެނިފަ އެވެ. ޗައިނާގެ ޓީވީތަކުން ދެއްކި މަންޒަރުތަކުން ފެންނަނީ އަލިފާނުގެ ސަބަބުން ގެއްލުންވެފައިވާ ސިޓީތަކާއި، ދަބަސްތަކާއި، ވޮލެޓްތަކާއި، އައިޑީ ކާޑާއި އެހެނިހެން ބައެއް ތަކެއްޗެވެ.
ޗައިނާ އީސްޓާން އެއާލައިންސްގެ ފްލައިޓް ދަތުރު ކުރަމުން ދިޔައީ ކުންމިންގުން ގުއާންގްޒޫ އަށެވެ. ހާދިސާއާ ގުޅިގެން އެއާލައިންގެ ބޮއިންގް 800-737 މަރުކާގެ ހުރިހާ ބޯޓެއް ވަނީ ދުއްވުން މެދުކަނޑާލާފަ އެވެ.
ބޯޓަށް މައްސަލަ ދިމާވާން ފެށީ ދަތުރު ފެށިތާ ގަޑިއެއްގެ އިރު ފަހުން ކަމަށް ރިޕޯޓުތައް ބުނެ އެވެ. ޗައިނާގެ ޓީވީތަކުން ވަނީ ބޯޓު ކުއްލިއަކަށް ވެއްޓެން ފަށާ މަންޒަރު ފެންނަ ވީޑިއޯއެއް އާއްމުކޮށްފަ އެވެ. އެއީ ކާރެއްގެ ޑޭޝްކޭމްއިން ރެކޯޑުވެފައިވާ މަންޒަރެކެވެ.
ވެއްޓުނު ބޮއިންގް 800-737 މަރުކާގެ ބޯޓަކީ ރައްކާތެރިކަމާ ގުޅޭ ރަނގަޅު ރެކޯޑެއް އޮތް ބޯޓެއް ކަމަށް ވައިގެ ދަތުރުފަތުރާ ގުޅޭ ތަޖުރިބާކާރުން ބުނެ އެވެ.
ބޯޓު ވެއްޓުނު ސަބަބާ ގުޅޭ ތަހުގީގުގައި ގިނަ ކަންކަން ބަލާނެ އެވެ. އެގޮތުން ގަސްދުގައި ބޯޓު ވައްޓާލުމުގެ އަމަލެއް ހިންގުން، ޕައިލެޓް އޮޅިގެން ގޯހެއް ހެދުން، ބޯޓަށް މައްސަލައެއް ދިމާވުން ނުވަތަ ވައިގެ ތެރެއިން އެއްޗެއްގައި ޖެހިފައި ވެއްޓުން ފަދަ ކަންކަން ހިމެނެ އެވެ.
