ފުރޮއަކާއި ސާރިދޯޅު ފައްސަން ހާއްސަ ސްޕްރޭ ފުޅިއެއް ހިފައިގެން ކެނެޑާގެ މިސްކިތަކަށް ހަމަލާ ދޭން އުޅުނު މީހަކު ހުއްޓުވައިފި އެވެ.
ފުލުހުން ބުނީ ހޮނިހިރު ދުވަހު ބަޔަކު ނަމާދަށް ތިބި ވަގުތު ހަމަލާ ދޭން މަސައްކަތް ކުރި ނަމަވެސް، އެއްވެސް މީހަކަށް އަނިޔާ ނުވާ ކަމަށެވެ.
ޓޮރޮންޓޯގެ މިސިސައުގާ ހިސާބުގައި އޮންނަ މިސްކިތަށް ފުރޯ ހިފައިން ވަނީ އުމުރުން 24 އަހަރުގެ ފިރިހެނެކެވެ. ނަމާދަށް ތިބި މީހުންގެ ގަޔަށް ސްޕްރޭ ޖެހުމަށް ފަހު، ހަމަލާ ދޭން އުޅުމުން، އެންމެންވެގެން ވަނީ އޭނާ ހުއްޓުވާފަ އެވެ.
އޭގެ ފަހުން ފުލުހުން އައިސް ވަނީ އެ މީހާ ހައްޔަރުކޮށްގެން ގެންގޮސްފަ އެވެ. ސްޕްރޭ ޖެހުމުގެ ސަބަބުން މިސްކިތުގައި ތިބި ބައެއް މީހުންނަށް ކުދި އަނިޔާތައް ލިބުނު ކަމަށް ރިޕޯޓުތައް ބުނެ އެވެ.
ފުލުހުން ނެރުނު ބަޔާނެއްގައި ބުނީ މިއީ އެއްވެސް ބަޔަކާ ގުޅުމެއް އޮތް ހަމަލާއެއް ކަމަށް ނުބެލެވޭ ކަމަށާއި ހަމަލާ ދިނީ ނަފުރަތުގެ ސަބަބުން ކަމަށް ބެލެވޭ ކަމަށެވެ.
ބޮޑު ވަޒީރު ޖަސްޓިން ޓްރޫޑޯގެ ޓްވީޓެއްގައި ވަނީ ހަމަލާ ކުށްވެރި ކުރައްވާފަ އެވެ. އެފަދަ އަނިޔާވެރި އަމަލުތަކަކީ ކެނެޑާގައި ޖާގައެއް ނެތް ކަންކަން ކަމަށް ވިދާޅުވި އެވެ.
އޭގެ އިތުރުން ޓޮރޮންޓޯގެ މޭޔަރު އަދި އޮންޓާރިއޯ ޕްރޮވިންސްގެ ބޮޑު ވަޒީރު ވެސް ވަނީ ހަމަލާ ކުށްވެރި ކުރައްވާފަ އެވެ.
މިސްކިތުގެ އިމާމް އިބްރާހިމް ހިންދީ ވަނީ ނަމާދަށް ތިބި މީހުންގެ ހިތްވަރަށް ތައުރީފުކޮށްފަ އެވެ.
"އަޅުގަނޑުމެންގެ މި ކުޑަ މުޖުތަމައު ފަސާދައެއް ނުކުރެވޭނެ. އަދި އަޅުގަނޑުމެންނަށް ބިރެއް ވެސް ނުދެއްކޭނެ."
މިދިޔަ ޖޫން މަހު އޮންޓާރިއޯގައި ޕިކަޕެއް ދުއްވާފައި ދިޔަ މީހަކު ވަނީ ޕާކިސްތާން ދަރިފަސްކޮޅަށް ނިސްބަތްވާ ކެނެޑާ އާއިލާއެއްގެ ގައިގައި ގަސްތުގައި ޖައްސާފަ އެވެ.
އެ ހަމަލާގައި އާއިލާގެ ހަތަރު މެމްބަރުން މަރުވި އެވެ. ފުލުހުން ބުނީ އެއީ "އިސްލާމޮފޯބިއާ" ނުވަތަ އިސްލާމްދީނާ މެދު ނަފުރަތު އުފެދިގެން ހިންގި ޓެރަރިޒަމްގެ އަމަލެއް ކަމަށެވެ.
