އިރުމަތީ އެންޓާކްޓިކާއަށް މި ހަފްތާގައި ރެކޯޑް މިންވަރަށް ހޫނުވެ، އާއްމު ފިނިހޫނުމިނަށް ވުރެ 30 ޑިގްރީ ސެލްސިއަސް މަތީގައި ހުރި ކަމަށް ތަޖުރިބާކާރުން ބުނެފި އެވެ.
އެންޓާކްޓިކްގެ ޑޯމް ސީގައި ހުންނަ ކޮންކޯޑިއާ ރިސާޗް މަރުކަޒުން ހުކުރު ދުވަހު ރެކޯޑް ކުރި ފިނިހޫނު މިނަކީ 11.5- ޑިގްރީ ސެލްސިއަސް އެވެ. އެ މަރުކަޒަކީ 3000 ފޫޓު އުހުގައި ހުންނަ ތަނެކެވެ.
ދުނިޔޭގެ ދެކުނަށް ހޫނު މޫސުން ނިމެން ފެށުމާ އެކު އާއްމުކޮށް އެންޓާކްޓިކާގެ ފިނިހޫނުމިން ތިރިވާން ފަށަ އެވެ. އެކަމަކު މި އަހަރު ފިނިހޫނުމިން ހުރީ އެހެން އަހަރުތަކަށް ވުރެ މަތީގަ އެވެ.
އެގޮތުން މާޗް މަހު އާއްމުކޮށް އެންޓާކްޓިކާގެ ފިނިހޫނުމިން ސުމަކަށް ވެއްޓި މައިނަސް ވާން ފަށަ އެވެ. ނަމަވެސް މި އަހަރު ހުރީ 4.9 ޑިގްރީ ސެލްސިއަސްގަ އެވެ.
ފްރާންސް މީޓިއޯގެ އޮފިޝަލަކު ބުނީ މިއީ ތާރީހީ ކަމެއް ކަމަށެވެ. ޖިއޯސައިންޓިސްޓް ޖޮނަތަން ވިލް ކުރި ޓްވީޓެއްގައި ބުނީ މިއީ ވެގެން ނުވާނެ ކަމެއް ކަމަށެވެ.
