މުޅި ރާއްޖެ އަށް ހުޅުވާލައިގެން ބޭއްވޭ އެންމެ ބޮޑު ފުޓްސަލް މުބާރާތް، "ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2022" ގައި ރޭ ޕެނަލްޓީ ޖަހައިގެން ސ. ފޭދޫ ބަލިކޮށް ޒޯން ހަތެއްގެ ޗެމްޕިއަންކަން ޏ. ފުވައްމުލަކު، މާލެގަން ހޯދިއިރު، ޒޯން ދޭއްގައި ބ. އޭދުފުށްޓާއި މާލެ ޒޯންގައި މާފަންނުން ބޮޑު މޮޅެއް ހޯދައިފި އެވެ.
ރޭގެ މެޗުތަކުގައި ނަތީޖާތަކަށް ބަލާއިރު، ހއ. އިހަވަންދޫ އިން ވަނީ 3-1 އިން ށ. މިލަންދޫ ބަލިކޮށްފަ އެވެ. ށ. ކަނޑިތީމުން 6-3 އިން ހދ. ވައިކަރަދޫ ބަލިކުރި އެވެ. މި ނަތީޖާތަކާ އެކު އިހަވަންދޫ އާއި ކަނޑިތީމު ވަނީ ޒޯން ފައިނަލުން ފުރުސަތު ހޯދައިފަ އެވެ.
ރޭ ކުޅުނު އެހެން މެޗުތަކަށް ބަލާއިރު، މާފަންނުން 4-0 އިން ހުޅުމާލެ ބަލިކުރިއިރު، ބ.އޭދަފުށިން ވަނީ 8-0 އިން ނ.ކުޑަަފަރި ބަލިކޮށްފަ އެވެ. މާލެގަން އަތުން ރޭ ސ.ފޭދޫ 3-2 އިން އެއްވަރުވުމުން ދެ ޓީމު ދެ ލެގުން އެގްރިގޭޓް އެއްވަރުވެގެން ޖެހުނީ ޕެނަލްޓީ ޖަހާށެވެ. ޕެނަލްޓީގައި މާލެގަން މޮޅުވީ 4-3 އިންނެވެ. އަދި ވިލިމާލެ އިން ވަނީ 4-3 އިން ހެންވޭރު ބަލިކޮށްފަ އެވެ.
އިހަވަންދޫ އަށް ރޭގެ މެޗުގައި ގޯލުތައް ޖަހައިދިނީ މޮޅު ކުޅުންތެރިޔާ އަހުމަދު ސާޖިދު ދެ ގޯލާއި އިބްރާހިމް ހާމިދު އެވެ. މިލަންދޫގެ ހަމައެކަނި ގޯލު ޖެހީ އަހުމަދު ޝާނީ އެވެ. ރޭގެ މެޗުގެ މޮޅު ކުޅުންތެރިއަކަށް ހޮވުނު ކަނޑިތީމުގެ މުހައްމަދު ޝާން ވަނީ ހެޓްރިކެއް ހަދައިފަ އެވެ. އެ ޓީމުގެ އަނެއް ގޯލުތައް ޖެހީ ހުސެއިން ނައުޝާދާއި އިބްރާހިމް ނަދާދު އަދި އިބްރާހިމް ޒަމީން އެވެ.
ކުޑަފަރި ޓީމުގެ ހަސީބު (ކ) އަތުން ބޯޅަ ހޯދަން އޭދަފުށީ ޓީމުގެ ހަމްދާން މަސައްކަތް ކުރަނީ.-- ފޮޓޯ: ގޯލްޑަން ފުޓްސަލް އެސޯސިއޭޝަން
ފުރަތަމަ މެޗުގައި ދުވާފަރު އަތުން ބަލިވި ނަމަވެސް އެ މާޔޫސްކަމުން އަރައިގަންނަން ރޭ ވަނީ 8-0 އިން ނ.ކުޑަފަރި ބަލިކޮށްފަ އެވެ. މި މެޗުގައި އޭދަފުށި ޓީމުގެ ހަމްދާން އަބްދުލް ސައްތާރު ވަނީ ހަތަރު ގޯލު ޖަހައި މެޗުގެ މޮޅު ކުޅުންތެރިޔާގެ މަގާމު ހޯދައިފަ އެވެ. އަނެއް ގޯލުތައް ޖެހީ އަހުމަދު އަޝްރަފު ޔޫސުފް (ސޮބީ) ހެޓްރިކެއްގެ އިތުރުން އިސްމާއިލް ޝަރީފް އެވެ.
މާފަންނުން ފުރަތަމަ މެޗުގައި ވިލިމާލެއާ އެއްވަރުވިއިރު، ރޭ ވަނީ ހުޅުމާލެ އަތުން ފުރިހަމަ މޮޅެއް ހޯދައިފަ އެވެ. މެޗުގެ މޮޅު ކުޅުންތެރިއަކަށް ހޮވުނު ހުސެއިން އަފްޒަލް (އޮޒިލް) ވަނީ ހެޓްރިކެއް ހަދައިފަ އެވެ. އަނެއް ގޯލު ޖެހީ މުހައްމަދު ލިޔާހު އެވެ. ވިލިމާލެ އިން ރޭގެ މެޗުން މޮޅުވިއިރު، އެ ޓީމުގެ އަލީ ޝިޔާހު ވަނީ ހެޓްރިކެއް ހަދައި، މެޗުގެ މޮޅު ކުޅުންތެރިޔާގެ މަގާމު ހޯދައިފަ އެވެ. އަނެއް ގޯލު ޖެހީ އަބްދުﷲ މުއާޒް (އޮޓޯ) އެވެ. ވިލިމާލެ ކޮޅަށް ހެންވޭރުގެ ގޯލުތައް ޖެހީ އަހުމަދު އަރީސް، ހުސެއިން ފައްޔާޒް އަދި މުހައްމަދު ރިއްފަތު (ރިއްޕެ) އެވެ.
މުބާރާތުގައި މިރޭ ހަ މެޗެއް ކުޅޭނެ އެވެ. އެ ގޮތުން 20:15 ގައި ފަށާނީ ޒޯން ތިނެއްގައި ޅ. ހިންނަވަރާއި ކ. ކާށިދޫގެ މެޗާއި ހަމަ އެ ޒޯނުގައި އއ. މަތިވެރި އާއި ކ. ގާފަރު ބައްދަލުކުރާ މެޗެވެ. ދެ ވަނަ މެޗުތައް، 21:15 ގައި ފަށާއިރު، އދ. އޮމަދޫން ކުޅޭނީ މ. ދިއްގަރާ އެވެ. އަދި އދ. މާމިގިލިން މ. މުލަކާ ބައްދަލުކުރާނެ އެވެ. އެންމެ ފަހު މެޗުތަކުގައި ގއ. ކޮނޑޭ އާއި ލ.ގަން އެއް މެޗުގައި ކުޅޭއިރު، އަނެއް މެޗުގައި ގދ. ވާދޫން ކުޅޭނީ ގއ. މާމެންދޫއާ އެވެ.
