ދޮޅު މިލިއަން ރުފިޔާގެ ދަރަންޏެއްގެ މައްސަލައިގައި މަޝްހޫރު ވިޔަފާރިވެރިޔާ މުހައްމަދު ޝަވީދުގެ ބޭންކް އެކައުންޓް ފްރީޒްކުރަން ސިވިލް ކޯޓުން އަންގައިފި އެވެ.
ސިވިލް ކޯޓުން ހުކުމް ތަންފީޒުކުރުމުގެ މައްސަލައަކާ ގުޅިގެން އިއްޔެ ނެރުނު އެ ކޯޓު އަމުރުގައި ޝަވީދު ހިމެނޭހެން ޖުމްލަ އަށް މީހެއްގެ އެކައުންޓް ފްރީޒްކުރުމަށް ބޭންކް އޮފް މޯލްޑިވްސްގެ މައްޗަށް ވަނީ އަންގައިފަ އެވެ.
ސިވިލް ކޯޓުން ނެރުނު އަމުރަކީ ޝަވީދުގެ އާއިލާ މީހެއްކަމުގައިވާ މުހައްމަދު އަނީސް، ޝަވީދު ހިމެނޭހެން އަށް މީހެއްގެ މައްޗަށް 2011 ވަނަ އަހަރު ކުރި ދައުވާއެއްގެ މައްސަލައެއްގެ ހުކުމް ތަންފީޒުކުރުމުގެ އަމުރެކެވެ. އެ މައްސަލަ އިސްތިއުނާފީ މަރުހަލާތަކުން ނިމުނީ 2021 ވަނަ އަހަރު ސުޕްރީމް ކޯޓުން ސިވިލް ކޯޓުގެ ހުކުމަށް ތާއިދުކުރުމުންނެވެ.
އެ މައްސަލައިގައި ޖުމްލަ އަށް މީހެއްގެ އެކައުންޓްގައި ހުރި ފައިސާ ހިފަހައްޓަން ސިވިލް ކޯޓުން އެންގިއިރު، އެމީހުންނަކީ ހ. ވާލީވިލާ، މާލެއަށް ނިސްބަތްވާ މުހައްމަދު ޝަވީދު، ފާތިމަތު ފަރީދާ، އަހުމަދު ޝިޔާމް، އާމިނަތު އަޝްފާ، އާމިނަތު ޝިފާ، ހަސަން ޝިޔާމް، އަލީ ޝިޔާމް އަދި ސ. މަރަދޫފޭދޫ، ފަހާގެ، ހައުލަތު ފަހީމް އެވެ.
ސިވިލް ކޯޓުން އެމީހުންގެ އެކައުންޓް ފްރީޒްކުރަން އަންގައި ނެރުނު އަމުރުގައި ބުނީ އެމީހުންގެ ނަމުގައި ބީއެމްއެލްގައި ހުޅުވާފައިވާ އެކައުންޓްތަކުގެ މައުލޫމާތު ކޯޓަށް އެންގުމަށެވެ. އަދި އެމީހުންގެ އެއްވެސް އެކައުންޓެއްގައި 1.4 މިލިއަން ރުފިޔާ ނުވަތަ އެ އަދަދަށްވާ ފައިސާ ހުރިނަމަ ހިފެހެއްޓުމަށް ކޯޓުން ވަނީ ބީއެމްއެލްގެ މައްޗަށް އަމުރުކޮށްފަ އެވެ. އަދި އަމުރުގައިވާ މީހުންގެ ނަމުގައި ހުޅުވާފައިވާ އެކައުންޓެއްގައި އެ އަދަދަށް ހުރި ފައިސާ ހިފެހެއްޓުމަށްފަހު ސިވިލް ކޯޓަށް އެންގުމަށް އެ ކޯޓުން ނެރުނު އަމުރުގައި ބުނެ އެވެ.
ޝަވިދާ ދެކޮޅަށް އަނީސް 2011 ވަނަ އަހަރު ހުށަހެޅި މައްސަލައަކީ އަނީސްގެ ވެސް ހިއްސާ އޮންނަ އާއިލީ ކުންފުނިތަކެއްގައި ހުރި އަނީސްގެ އަމިއްލަ މުދާ ހިމެނޭހެން މުދާތަކެއް ލިކުއިޑޭޓްނުކޮށް އާއިލާގެ މެމްބަރުންތަކެއްގެ މެދުގައި ވާރިސުންގެ ގޮތުގައި ބަހާލި މައްސަލައެކެވެ. އެ މައްސަލައިގައި އަނީސްކުރި ހުށަހެޅި މައްސަލަ 2011 ވަނަ އަހަރު ސިވިލް ކޯޓުން ނިންމީ އޭނާއާ އެއްކޮޅަށެވެ.
ޝަވީދު އަދި އެ މައްސަލައިގައި ދެން ހިމެނޭ ވާރިސުންއެ މައްސަލަ ހައި ކޯޓުގައި އިސްތިއުނާފްކުރުމުން ހައި ކޯޓުން ވަނީ އެ މައްސަލައިގައި ޝަވީދަށް ބޮޑަށް ބުރަވާ ގޮތަށް ހުކުމްކޮށްފަ އެވެ. ހައި ކޯޓުން އެގޮތަށް ނިންމީ 2017 ވަނަ އަހަރު އެވެ. ނަމަވެސް އަނީސްގެ ފަރާތުން އެ މައްސަލަ ސުޕްރީމް ކޯޓަށް އިސްތިއުނާފަށް ހުށަހެޅުމުން އެ ކޯޓުން މިދިޔަ އަހަރު ނިންމީ ސިވިލް ކޯޓުން އެންމެ ފުރަތަމަ 2011 ވަނަ އަހަރު ކުރި ހުކުމަށް ތާއިދުކުރުމަށެވެ.
މި މައްސަލައިގައި އެކައުންޓްގައި ހުރި ފައިސާތަކެއް ފްރީޒްކުރުމަށް ސިވިލް ކޯޓުން އެންގި ޝަވީދަކީ ކުރިން އޮލިމްޕިކް ކޮމިޓީގެ ރައީސްކަން ކުރެއްވި ބޭފުޅެކެވެ. އޭނާ ވަނީ އެފްއޭއެމްގެ އިސް މަގާމުތަކެއް ވެސް މީގެ ކުރިން އަދާކޮށްފަ އެވެ.
އޭގެ އިތުރުން ވެސް ޝަވީދަކީ ރާއްޖޭގައި މަޝްހޫރު ވިޔަފާރިވެރިއެކެވެ. އެގޮތުން ވީބީ ބްރަދާޒް ކުންފުނި، ޓީއެސްއެމްއައިސީ ރިސޯޓު ކުންފުނި އަދި ކޯސްޓްލައިން ފަދަ ބޮޑެތި ކުންފުނިތަކާއި ޝަވީދުއާ އޭނާގެ އާއިލާއާ ގުޅުން އޮވެ އެވެ. ޝަވީދުގެ އިތުރުން ކޯޓު އަމުރުގައި ދެން ހިމެނޭ ހަސަން ޝިޔާމް އަކީ 2019 ވަނަ އަހަރު އޮތް ރައްޔިތުންގެ މަޖިލީހުގެ އިންތިހާބުގައި މެދު ހެންވޭރު ދާއިރާއަށް ވާދަ ކުރެއްވި ބޭފުޅެކެވެ.
